युक्रेनबाट चार नेपाली स्वदेश फिर्ता

युक्रेनमा जारी युद्धको क्रममा अलपत्र परेका आफ्ना नागरिकहरूलाई लक्षित गर्दै भारत सरकारले अपरेशन गंगा कार्यक्रम मार्फत् स्वदेश फिर्ता गरिरहेको छ । सोही क्रममा भारत सरकारले चार जना नेपालीलाई पनि फिर्ता ल्याएको हो ।

प्रधानमन्त्री शेरबहादुर देउवाले नेपाली नागरिकलाई फिर्ता ल्याउन सहयोग गरेकोमा भारतका प्रधानमन्त्री नरेन्द्र मोदी र भारत सरकारलाई धन्यवाद ज्ञापन गरेका छन् । शनिबार प्रधानमन्त्री देउवाले ट्विट गर्दै मोदी र उनको सरकारलाई धन्यवाद दिएका हुन् ।

देउवाका अनुसार ती नेपाली नागरिकहरू भारत हुँदै काठमाडौं आइपुगेका हुन् । प्रधानमन्त्री देउवाले लेखेका छन्, 'युक्रेनबाट भारत हुँदै चार जना नेपाली नागरिकहरू भर्खरै नेपाल आइपुगेका छन् । नेपाली नागरिकलाई स्वदेश फिर्ता गर्ने काममा सहयोग गरेकोमा प्रधानमन्त्री नरेन्द्र मोदी र भारत सरकारलाई धन्यवाद ।'

युक्रेनमा जारी युद्धको क्रममा अलपत्र परेका भारतीय विद्यार्धीसहित सयौं नागरिकहरूलाई भारत सरकारले अपरेशन गंगा कार्यक्रममार्फत् स्वदेश फिर्ता गरेको छ । सोही क्रममा चार जना नेपाली नागरिकलाई पनि भारत सरकारले नेपाल फिर्ता गर्न सहयोग गरेको हो । युक्रेनमा जारी युद्धको क्रममा भारतीय विद्यार्थीको मृत्यु समेत भएको थियो।

Four Nepali nationals have just arrived in Nepal from Ukraine via India.

Thank you Prime Minister @narendramodi and the Government of India for the assistance in repatriating Nepali nationals through the #OperationGanga.

— Sher Bahadur Deuba (@SherBDeuba) March 12, 2022