झूटो प्रचारमा मानवअधिकार आयोग नै क्रियाशील : ओली

एमालेनिकट राष्ट्रिय मानवअधिकार तथा सामाजिक न्याय मञ्च नेपाल (मानवअधिकार–एलाइन्स) को पाँचौं राष्ट्रिय सम्मेलनका क्रममा सोमबार पोखरामा बोल्दै उनले आफ्नो नेतृत्वको सरकार भएका बेला आयोग सरकारविरुद्ध लागेको उनले बताए । यसअघिका आयोगका सदस्य दक्षिणपन्थी भएकाले राजनीतिक आस्थाकै भरमा सरकारप्रति पूर्वाग्रह राखेको उनको भनाइ थियो ।

निष्पक्ष न्याय पाइने सर्वोच्च अदालत भ्रष्टाचारमा लिप्त भइरहँदा संवैधानिक निकाय मानिने मानवअधिकार आयोग दुरुपयोग हुनु कुनै नौलो नरहेको ओलीले बताए । एमाले नेतृत्वको सरकार हुँदा देशमा कहींकतै मानवअधिकार उल्लंघनका घटना नभएको दाबी गर्दै उनले केही विरोधीले झूटा हल्ला मात्रै चलाएको दाबी गरे । जेनेभामा भएको मानवअधिकारसम्बन्धी अन्तर्राष्ट्रिय कार्यक्रममा तत्कालीन सरकारमाथि हमला गर्ने काम भएको र तत्कालीन परराष्ट्रमन्त्रीले खण्डन गर्नुपरेको अध्यक्ष ओलीको भनाइ थियो ।

बुद्धिजीवीहरुप्रति असन्तुष्टि जनाउँदै उनले आफ्नो नेतृत्वको सरकार हुँदा विरोध गर्नेहरु परमादेशको सरकार हुँदा खस्किँदै गएको अर्थतन्त्रबारे चुप रहेको बताए ।

महाधिवेशनमा हुम्ला र लमजुङबाहेकका जिल्लाबाट २ सय ४१ प्रतिनिधि पोखरा आएका छन् । महाधिवेशनले ७७ सदस्यीय नयाँ समिति चयन गर्नेछ ।