एमसीसी अनुमोदनसँगै गठबन्धन बनाएर चुनावमा जाने वातावरण बन्यो : दाहाल- समाचार - कान्तिपुर समाचार
कान्तिपुर वेबसाईट
AdvertisementAdvertisement

एमसीसी अनुमोदनसँगै गठबन्धन बनाएर चुनावमा जाने वातावरण बन्यो : दाहाल

कान्तिपुर संवाददाता

काठमाडौँ — नेकपा माओवादी केन्द्रका अध्यक्ष पुष्पकमल दाहालले अमेरिकी सहयोग निकाय मिलेनियम च्यालेन्ज कर्पोरेसनसँगको एमसीसी अनुदान सम्झौता अनुमोदन भएसँगै स्थानीय निर्वाचनमा गठबन्धनका दल मिलेर जाने वातावरण बनेको बताएका छन् । 

शुक्रबार केन्द्रीय समितिको बैठकलाई ब्रिफिङ गर्दै अध्यक्ष दाहालले बिहीबार सत्ता गठबन्धनको उच्चस्तरीय संयन्त्रको बैठक बसेको र बैठकमा एमसीसी सम्झौता अनुमोदनको समीक्षा गरिएको जानकारी दिएका हुन् । उक्त समीक्षामा स्थानीय तहको चुनावमा सत्ता गठबन्धनका दलहरू मिलेरै जाने कुरा भएको दाहालले बैठकमा जानकारी दिएको एक केन्द्रीय सदस्यले जानकारी दिए ।

त्यस्तै प्रतिनिधिसभा लामो समयदेखि अवरुद्ध रहेकाले त्यसको हल निकाल्न पनि पहल गर्ने विषयमा बैठकमा छलफल भएको दाहालले बताएका छन् । लामो समय अवरोधकै बीचमा संसद् चलाइराख्ने हो भने संसदीय प्रणालीमै प्रश्न चिन्ह खडा हुने पनि दाहालको भनाइ थियो ।

एमसीसी सम्झौता अनुमोदनपछि पार्टीभित्र मतभेद चुलिएपछि माओवादी केन्द्रले शुक्रबार केन्द्रीय समितिको बैठक बोलाएको हो । व्याख्यात्मक घोषणासहित एमसीसी अनुमोदन गर्ने विषयमा नेता नारायणकाजी श्रेष्ठ र उनी पक्षधर नेताहरुले असन्तुष्टि जनाउँदै आएका छन् । एमसीसी सम्झौता अनुमोदनप्रति असन्तुष्टि व्यक्त गर्दै आएका नेता नारायणकाजी श्रेष्ठलाई अध्यक्ष पुष्पकमल दाहालले ‘आफ्नो बाटो लागे हुन्छ’ भनेपछि पूर्वएकता केन्द्र समूह आक्रोशित भएको छ ।

केन्द्रीय समिति बैठकमा सम्झौता अनुमोदनकै विषयमा बहस चर्किने सम्भावना देखिएको छ । एमसीसी सम्झौता अनुमोदनमा दाहालको भूमिकाप्रति असन्तुष्ट नेता श्रेष्ठको समूहले वैकल्पिक पार्टी निर्माणसम्मको विकल्पमा छलफल गरिरहेको छ । एमसीसीमा राष्ट्रघात भएको तर्क उक्त समूहको छ ।

प्रकाशित : फाल्गुन २०, २०७८ १६:२२
प्रतिक्रिया
पठाउनुहोस्

कम्युनिष्टले उत्तेजनाको राजनीति गरिरहेका छन् : महामन्त्री थापा

रासस

काठमाडौँ — नेपाली कांग्रेसका महमन्त्री गगनकुमार थापाले उत्तेजनाको राजनीति देश र समाजका लागि घातक हुने बताएका छन् । नेपाली कांग्रेस मादी गाउँपालिका कार्यसमिति कास्कीद्वारा आयोजित दुई दिवसीय अगुवा कार्यकर्ता भेलाको उद्घाटन गर्दै उनले कम्युनिष्टले उत्तेजनाको राजनीति गरिरहेको बताए । 

एमसीसी सम्झौतामा कम्युनिष्टले दोहोरो भूमिका खेलेर जनतालाई उत्तेजित बनाएको उल्लेख गर्दै उनले कांग्रेस सभापति एवं प्रधानमन्त्री शेरबहादुर देउवाले यति ठूलो परियोजनामा सबैलाई मिलाउन सफल बनेको बताए । महामन्त्री थापाले जनताबीच कांग्रेसको परिचय फरक रहेको उल्लेख गर्दै कांग्रेसले सधैं उत्तेजना फैलाउने नभई चेतना फैलाउने, भड्काउने नभई मिलाउने जस्ता चरित्र देखाउँदै आएको बताए ।

आसन्न निर्वाचनका लागि पार्टी संगठनलाई मजबुद बनाउँदै अघि बढ्न आग्रह गर्दै उनले भने, 'कांग्रेससँग अहिले १०० जनामा ३३ जना मतदाता छन्, यसलाई बढाएर ४५ भन्दामाथि पुर्‍याउनुछ ।' महामन्त्री थापाले उम्मेदवार टुंग्याउने जिम्मा महानगरको हकमा नगर र जिल्लाको सिफारिसमा केन्द्रले टुंग्याउने र अन्यका हकमा प्रदेश, नगर, क्षेत्र र जिल्लाले टुंग्याउने गरी कार्यविधि केन्द्रले ल्याउने जानकारी दिए । आगामी निर्वाचनमा ठूलो वा सानो जोसुकै नेता भए पनि उसले आफ्नो टोललाई सम्हाल्ने जिम्मा लिनुपर्ने उनले बताए ।

प्रकाशित : फाल्गुन २०, २०७८ १६:१९
पूरा पढ्नुहोस्
प्रतिक्रिया
पठाउनुहोस्
x
×