मुख्यमन्त्री पाण्डेले भने- ‘मन्त्रालय विभाजन गरेकोमा पश्चताप छैन’- समाचार - कान्तिपुर समाचार
कान्तिपुर वेबसाईट
AdvertisementAdvertisement

मुख्यमन्त्री पाण्डेले भने- ‘मन्त्रालय विभाजन गरेकोमा पश्चताप छैन’

सुवास विडारी

मकवानपुर — वाग्मती प्रदेशका मुख्यमन्त्री राजेन्द्र पाण्डेले मन्त्रालय विभाजन गरेको विषयमा आफूलाई पश्चताप नभएको टिप्पणी गरेका छन् । गठबन्धनको नेतृत्व गर्दै मुख्यमन्त्री बनेका पाण्डेले ७ वटा मन्त्रालय फुटाएर १४ वटा पुर्‍याएसँगै उनको चौतर्फीरुपमा आलोचना भइरहेको छ । हाल वाग्मती प्रदेशमा १६ सदस्यीय जम्बो मन्त्रिपरिषद् रहेको छ । 

पाण्डेको नेतृत्वको प्रदेश सरकार गठनको १०० दिन पूरा भएको सन्दर्भमा शुक्रबार पत्रकार सम्मेलन गर्दै उनले मन्त्रालय विभाजनको विषयमा औपचारिक भनाइ राखेका हुन् । ‘हामीसँग भएका विगतका पुराना मन्त्रालयबाट सेवा दिन केही समस्या भयो । त्यसो भएकाले हामीले सेवा प्रभावकारी बनाउन १४ वटा मन्त्रालय बनाएका छौं । त्यो १४ वटा मन्त्रालयले प्रभावकारी काम गरेर केही समयभित्रमा देखाउने छन् । मन्त्रालयको संख्या धेरै भयो भनेर मैले हिच्किचाउनुपर्ने अवस्था छैन,’ उनले भने, ‘काम गर्नकै लागि विभाजन गरिएको हो ।’ उनले मन्त्रालय विस्तार संविधानअनुसार भएको दाबीसमेत गरेका छन् ।

सामान्यतया सरकार गठन भएको यस अवधिलाई 'हनिमुन पिरियड'को रुपमा व्याख्या गरिन्छ । मुख्यमन्त्री पाण्डेले आफू नेतृत्वको सरकारले पहिलो सय दिनमा उल्लेख्य काम गरेको दाबीसमेत गरे । सरकारको उपलब्धि सार्वजनिक गर्दै उनले प्रदेशलाई सशक्त बनाउन नीतिगत रूपमा धेरै भूमिका खेलेको बताए ।

सरकारले प्रदेशको आर्थिक, सामाजिक रुपान्तरण गर्न, नागरिकलाई सरल एवम् सहज गुणस्तरीय सेवा प्रवाह गर्न, पूर्वाधार विकासलाई व्यवस्थित तथा सुशासन प्रवर्द्धन गर्न प्रदेश सरकार नियमावलीमा केही हेरफेर गरी मन्त्रालयको संख्यामा केही वृद्धि गरिएको बताए । यसबाट सरकारको काम छिटो तथा पुँजीगत खर्च प्रभावकारी रूपमा वृद्धि हुने र जनताले सहज सेवा पाउने विश्वास लिइएको उनको दाबी थियो ।

मुख्यमन्त्री पाण्डेले प्रदेश सरकारको निर्णयलाई प्रभावकारी कार्यान्वयन एवम् व्यवस्थित गर्न मन्त्रिपरिषद् समितिका संयोजक तथा सदस्य तोक्ने कार्य गरिएको, प्रदेश सरकारको सचिवालय तथा प्रशासनिक भवनहरु निर्माण गर्न 'प्रशासकीय भवनका लागि जग्गा पहिचान समिति गठन' गरी आवश्यक कार्य अघि बढाइएको उल्लेख गरे । उनले चालु आर्थिक वर्षभित्रै जग्गा पहिचान गरेर प्रशासकीय भवन निर्माणको प्रक्रिया अघि बढाइने बताए ।

प्रकाशित : माघ २१, २०७८ १६:२७
प्रतिक्रिया
पठाउनुहोस्

सीमाको हेल्थ डेस्कमा कोरोना संक्रमितको संख्या घट्दै

शंकर आचार्य

पर्सा — देशकै मुख्य स्थल नाका वीरगन्जस्थित नेपाल-भारत सीमामा रहेको हेल्थ डेस्कमा कोरोना संक्रमण पुष्टि हुनेहरूको संख्या घटेको छ । डेस्ककी प्रमुख डा अनिशा महतोका अनुसार एक सातायता संक्रमण पुष्टि हुने क्रम ओरालो लागेको हो । 

शुक्रबार बिहान पहिलो चरणमा १ सय २५ जनाको एन्टिजेन परीक्षण गर्दा एक जनामा पनि कोरोना संक्रमण पुष्टि भएन । बिहीबार ३ सय ३३ जनाको एन्टिजेन परीक्षण गर्दा ८ जनामा र बुधबार ३ सय ४२ जनाको एन्टिजेन परीक्षण गर्दा ८ जनामा कोरोना संक्रमण पुष्टि भएको थियो ।

‘२७ जनवरीदेखि डेस्कमा संक्रमितको संख्या १० भन्दा मुनि झरेको छ,’ डा महतो भन्छिन्, ‘२६ जनवरीसम्म पनि दैनिक ३ सयभन्दा बढीको एन्टिजेन परीक्षण गर्दा १६ देखि १७ जनासम्म पनि संक्रमित पुष्टि भइरहेका थिए ।’ उनले यसले भारत र नेपालमा एकै साथ कोरोना संक्रमण ओरालो लागेको संकेत गरेको बताइन् ।

पुस ८ गतेयता डेस्कमा संक्रमित फेला पर्न थालेका हुन् । त्यसअघिको करिब ६ महिनासम्म एक जनामा पनि संक्रमण पुष्टि भएको थिएन । पुसको तेस्रो सातामा संक्रमण पुष्टि हुने क्रम बढेर दैनिक ३२ देखि ४० जनासम्म पनि पुगेको थियो ।

यता नारायणी अस्पतालमा बिहीबार ५० जनाको पीसीआर परीक्षण गर्दा २४ जनामा संक्रमण पुष्टि भएको अस्पतालका कोभिड संयोजक डा उदयनारायण सिंहले जानकारी दिए । संक्रमितहरू २ देखि ७० वर्ष उमेर समूहका छन् ।

प्रकाशित : माघ २१, २०७८ १६:२३
पूरा पढ्नुहोस्
प्रतिक्रिया
पठाउनुहोस्
×