गौतमबुद्ध विमानस्थल निरीक्षण गर्दै मन्त्री आलेले भने- कुनै हालतमा बुद्धजयन्ती अगावै अन्तर्राष्ट्रिय उडान हुनुपर्छ- समाचार - कान्तिपुर समाचार

गौतमबुद्ध विमानस्थल निरीक्षण गर्दै मन्त्री आलेले भने- कुनै हालतमा बुद्धजयन्ती अगावै अन्तर्राष्ट्रिय उडान हुनुपर्छ

माधव ढुंगाना

भैरहवा — संस्कृति, पर्यटन तथा नागरिक उड्ययनमन्त्री प्रेमबहादुर आलेले आउँदो बुद्ध जयन्तीभन्दा अगावै निर्माणाधीन गौतमबुद्ध अन्तर्राष्ट्रिय विमानस्थल संचालनमा ल्याउने तयारी भइरहेको बताएका छन् । 

भैरहवामा निर्माणाधीन गौतमबुद्ध अन्तर्राष्ट्रिय विमानस्थल आयोजनाको प्रगति विवरण लिँदै शनिबार मन्त्री आलेले विमानस्थल संचालनमा अब कुनै पनि खालको बिलम्ब नहुने गरी योजना बनाइएको बताएका हुन् । तर मौसम प्रतिकूलताका कारण पछिल्लो समयमा परीक्षण उडानमा ढिलाइ भइरहेको उनको भनाइ छ ।

उनको साथमा, मन्त्रालयका सचिव, नेपाल नागरिक उड्ययन प्राधिकरणका निमित्त महानिर्देशक, राष्ट्रिय गौरव आयोजनाका निर्देशक, राष्ट्रिय गौरव आयोजनाका उपनिर्देशक लगायतको टोली स्थलगत अनुगमनमा पुगेको थियो ।

‘यो विमानस्थलप्रति विश्वकै ध्यानाकृष्ट भएकाले अब कुनै पनि खालको बिलम्ब हुनु हुँदैन’, मन्त्री आलेले भने, ‘बुद्ध जयन्ती अगावै यस विमानस्थलमा ठूल्ठूला विमान उडेर संचालन भएको देख्न पाइयोस् । म यसका लागि यहींबाटै निर्देशन दिन्छु, कुनै पनि हालतमा बुद्ध जयन्तीभन्दा अगावै अन्तर्राष्ट्रिय उडान हुनु पर्छ ।’

यो विमानस्थल संचालनमा आउनासाथ काठमाडौंको त्रिभुवन अन्तर्राष्ट्रिय विमानस्थलमा हाल विद्यमान रहेको दुई/तीन घण्टासम्मको एयर ट्राफिकको समस्या समाधान हुने भएकाले पनि जतिसक्दो चाडो संचालनमा ल्याउन जरुरी भएको उनको भनाइ थियो ।

नेपाल नागरिक उड्ययन प्राधिकरणका निमित्त महानिर्देशक प्रेमनाथ ठाकुरले मौसमले साथ अनुकूल बन्दै गएको खण्डमा ढिलोमा पनि परीक्षण उडानका लागि थाइल्याण्डदेखि आउँदो फेब्रुअरी २१ (फागुन ९ गते) का दिन विमान नेपाल अवतरण हुने गरी कार्यतालिका तयार पारिएको जनाए । यदि संभव भएमा त्यो भन्दा अगाडि पनि विमान नेपाल आउन सक्ने उनले बताए ।

‘आउँदो बुद्ध जयन्तीसम्ममा यो विमानस्थल संचालनमा आइसक्ने छ’, ठाकुरले भने, ‘बुद्ध जयन्तीमा लुम्बिनी आउने विदेशी पाहुनाले चार्टर्ड फ्लाइट ल्याउन सक्ने गरी निर्माण कार्य अघि बढाइएको छ ।’

परीक्षण उडानका लागि विमानसहित मौसम, संचार र विमानको दिशा पत्ता लगाउने लगायतका निर्माण कार्यको ठेक्का लिएको थाइल्याण्डको एरो थाइ कम्पनीका नेपाल प्रतिनिधि बिजेन्द्र श्रेष्ठले, एरो थाइ कम्पनीका तर्फबाट विमानस्थलमा जडान गरिएका उपकरण र ग्राउन्ड चेकको कार्य जारी रहेको बताए ।

नेपालको विगत तीन वर्षको मौसमको अवस्थालाई विमानस्थलमा परीक्षण उडान संचालन तयारीका लागि आइपुगेको थाइल्यान्डको टिमले अध्ययन गरिरहेको र फेब्रुअरीको दोस्रो सातादेखि मौसम सुधार आउने देखिएकाले २१ तरिखमा परीक्षणको विमान ल्याउने तयारी गरिएको उनले बताए ।

प्रकाशित : माघ १५, २०७८ १६:०६
प्रतिक्रिया
पठाउनुहोस्

संघीय कानुन आएपछि शिक्षामा लगानी गर्ने वातावरण बन्छ : राज्यमन्त्री श्रेष्ठ

रासस

काठमाडौँ — प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठले शैक्षिक विकासका लागि निजी क्षेत्रको समेत अपनत्व हुने गरी विभिन्न संघीय कानुन ल्याउन लागेको जानकारी दिएका छन् । 

काठमाडौंको स्वस्तिश्री गुरुकुल स्कुलमा शनिबार भएको कार्यक्रमलाई सम्बोधन गर्दै मन्त्री श्रेष्ठले संघीय कानुन आएपछि शिक्षामा निजी क्षेत्रले थप लगानी गर्नसक्ने वातावरण तयार हुने जानकारी दिए । उनले समारोहमा भर्चुअल माध्यमबाट सहभागिता जनाएका थिए । उनले प्राविधि र उच्च शिक्षा तथा विद्यालय तहको शिक्षाका विषयमा छुट्टाछुट्टै कानुन बन्ने जानकारी दिए ।

मन्त्री श्रेष्ठले परिवर्तित समय र आवश्यताअनुसारको शिक्षा जरुरी रहेको उल्लेख गर्दै नेपाल शिक्षा र स्वास्थ्यको हब बन्ने दाबी गरे । 'अहिले पनि ६०/७० हजार विद्यार्थी पढ्न विदेश जाने गरेका छन्, अर्बौं पैसा विदेश जान्छ,' उनले भने, 'त्यसलाई रोक्न नेपालमा गुणस्तरीय शिक्षा आवश्यक छ, संघीय कानुन बनेपछि केही प्रभावकारी हुन्छ ।'

राम्रो काम गर्दा टीकाटिप्पणी आउने उल्लेख गर्दै उनले धैर्य गर्न पनि सुझाव दिए । आजै स्वस्तिश्री गुरुकुललाई ‘आइबी वर्ल्ड स्कुल’ घोषणा गरिएको थियो ।

प्रकाशित : माघ १५, २०७८ १५:४२
पूरा पढ्नुहोस्
प्रतिक्रिया
पठाउनुहोस्
×