संसदीय सुनुवाइ सम्बन्धी पुस्तिका तयार पारिँदै
काठमाडौँ — संसदीय सुनुवाइ समितिले संसदीय सुनुवाइ सम्बन्धी पुस्तिका नै प्रकाशित गर्ने भएको छ ।
समितिको शुक्रबार सिंहदरबारमा बसेको बैठकले हालसम्म भएका संसदीय सुनुवाइ सम्बन्धी व्यवस्था, निर्णय प्रक्रिया तथा विभिन्न पदमा प्रस्तावित व्यक्तिहरूको सुनुवाइ सम्बन्धी विवरण पुस्तिका तयार पार्न मातहतको सचिवालयलाई निर्देशन दिएको हो ।
समितिको काम प्रभावकारी बनाउने गरी त्यससम्बन्धी विगतका कामको विवरणसहितको पुस्तिका तयार गर्न सचिवालयलाई निर्देशन दिइएको सभापति लक्ष्मण लाल कर्णले जानकारी दिए ।
‘नेपालको संसद्मा संसदीय सुनुवाइको अवधारणा प्रारम्भ भएदेखि हालसम्मको संसदीय सुनुवाइ सम्बन्धी भएका व्यवस्था, निर्णय प्रक्रिया तथा विभिन्न पदमा प्रस्तावित व्यक्तिहरूको सुनुवाइ सम्बन्धी विवरण पुस्तिका तयार पार्न र समितिमा पेस गर्न सचिवलाई निर्देशन दिने निर्णय गरिएको छ,’ समितिका सभापति कर्णले बताए ।
सभापति कर्णले संसदीय सुनुवाइ समितिको काम प्रभावकारी बनाउन संघीय संसद् ऐन नै परिमार्जन गरेर अघि बढनुपर्ने पनि बताए । संसदीय सुनुवाइ समितिको कामबारे विभिन्न ठाउँमा प्रश्न उठने गरेकाले पनि यसको प्रभावकारिताका लागि आवश्यक कानुनी व्यवस्था गर्नुपर्ने उनको भनाइ थियो ।
प्रकाशित : माघ १४, २०७८ १६:०८