यो सुनुवाइ समिति रहनु र नरहनुको औचित्य छैन : गुरुङ- समाचार - कान्तिपुर समाचार

यो सुनुवाइ समिति रहनु र नरहनुको औचित्य छैन : गुरुङ

कान्तिपुर संवाददाता

काठमाडौँ — सत्तारुढ नेकपा (माओवादी केन्द्र)का प्रमुख सचेतक देवप्रसाद गुरुङले संसदीय सुनुवाइ समितिको कुनै औचित्य नरहेको बताएका छन् । संसदीय सुनुवाइ समितिको शुक्रबारको बैठकमा माओवादीका प्रमुख सचेतक गुरुङले हालसम्मको अनुभवलाई स्मरण गराउँदै संसदीय सुनुवाइ समितिको औचित्य र अर्थ नरहेको बताएका हुन् । 

पूर्वकानुनमन्त्री समेत रहेका गुरुङले संविधानले परिकल्पना गरेअनुसार काम गर्न नसकेको उल्लेख गर्दै संसदीय सुनुवाइ समितिलाई प्रभावकारी बनाउने हो भने संघीय संसद् ऐनलाई संशोधन गरेर अघि बढ्नुको विकल्प नरहेको तर्क गरेका थिए ।

मन्त्रिपरिषद्, कानुन परिषद् वा संवैधानिक परिषद्ले सिफारिस गरेका प्रस्तावलाई स्वीकार गरेर जाने अवस्था हाल रहेको उल्लेख गर्दै यसबाट समितिको काममा प्रभावकारिता नआउने उनको भनाइ थियो । ‘अहिलेसम्मको हाम्रो अनुभव के हो त भन्दाखेरी यो सुनुवाइ समिति रहनु र नरहनुको कुनै औचित्य छैन । यही नियमावलीको सीमा भित्र रहने हो भने यो सुनुवाइ समितिको कुनै अर्थ र औचित्य छैन,' उनले भने, 'संविधानले जो परिकल्पना गरेको छ, त्यो परिकल्पना कार्यान्वयन हुने देखिँदैन । किन त भन्दाखेरी अहिलेसम्मको अभ्यासको आधारमा सरकारले जे सिफारिस गरेको छ त्यसलाई अंगीकार गर्नु, त्यसलाई अनुमोदन गर्नुको विकल्प देखिराखेको छैन । त्यही रुपमा गइराखेको छ, अहिलेसम्म ।'

गुरुङले समितिलाई प्रभावकारी बनाउने खालका कुनै पनि काम हालसम्म नभएको र त्यसका लागि कानुनी प्रबन्धमा परिवर्तन गर्नुपर्ने बताएका थिए । 'एउटा प्रधानन्यायाधीशको केसमा बाहेक जस्ताको तस्तै अनुमोदन भएको अवस्था छ । कुनै पनि इस्यूमा रिजेक्ट हुन सकेको छैन । जे–जे प्रस्ताव गरेका छन त्यसैलाई एक्सेप्ट गरेको गएको देखिन्छ । त्यो खालको स्थिति छ । यहीस्थिति रहँदाखेरी यो समितिको औचित्य देखिराख्या छैन । यसलाई प्रभावकारी बनाउने हो भने संघीय संसद ऐननै संशोधन गर्नुपर्ने हुन्छ,’ उनले भने ।

प्रकाशित : माघ १४, २०७८ १५:५२
प्रतिक्रिया
पठाउनुहोस्

नेपालले सच्चिएर मोरिससको सामना गर्ने

कान्तिपुर संवाददाता

काठमाडौँ — नेपाली राष्ट्रिय फुटबल टिमले शनिबार पहिलो मैत्रीपूर्ण अन्तर्राष्ट्रिय खेलमा मोरिससको सामना गर्दैछ र त्यस अगाडि सहायक प्रशिक्षक किरण श्रेष्ठले नेपाली टिमको सबै तयारी पूरा भएको बताएका छन् । उनले मोरिसासको सामना गर्दा आफ्नो टिमले यस अगाडिका भुललाई सच्याएर खेल्ने बताए ।

उनले भने, ‘यसअघिका खेलमा टिमले जे जस्तो भुल गरेको थियो, त्यसको हामीले विश्लेषण गर्नेछौं र त्यसलाई सच्चाउने प्रयास गर्नेछौं । हामी पक्कै पनि जितका लागि खेल्नेछौं ।’ यस्तै नेपाली कप्तान किरण लिम्बुले पनि टिमले जितकै लागि खेल्ने दाबी गर्दै मोरिससको सामना गर्न आफना सबै साथी खेलाडी उत्साहित रहेको बताए ।

मोरिससको प्रशिक्षक टोनी फ्रान्कोइसले आफ्नो घरेलु मैदानमा नेपाल बलियो प्रतिद्वन्द्वी हुने माने । उनले भने, ‘हामीले खालि ४५ दिनको तयारीपछि नेपाल आएका छौं । हाम्रो राष्ट्रिय टिमले साढे दुई वर्षपछि पहिलो पल्ट खेल्दैछ । त्यसैले हामीलाई पक्कै पनि सजिलो हुने छैन् । हामीलाई थाहा छ, नेपाल बलियो टिम हो ।’

उनले नेपालले माल्दिभ्समा भएको साफ च्याम्पियनसिपका केही खेलको विश्लेषण गरेको बताए र भने, ‘हाम्रो टिम नयाँ छ र हाम्रा केही खेलाडी भर्खर मात्र राष्ट्रिय टिममा प्रवेश गरेका छन् । हामी अहिले अफ्रिकी कप अफ नेसन्सको तयारीका लागि नेपाल आएका छौं र राम्रो खेल्न सक्नेमा विश्वस्त छौं ।’

प्रकाशित : माघ १४, २०७८ १५:४५
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×