कोरोना घरघरै छ तर सतर्कता छैन- समाचार - कान्तिपुर समाचार

कोरोना घरघरै छ तर सतर्कता छैन

सन्जु पौडेल

लुम्बिनी — कोरोना संक्रमणको तेस्रो लहरका कारण लुम्बिनी प्रदेशका घरघरै बिरामी छन् । कोरोनासँग मेल खाने लक्षणका बिरामी धेरै छन् । स्वास्थ्यमा जटिल समस्या नदेखिएकाले सर्वसाधारण लक्षण भए पनि अस्पताल गएका छैनन् । यो लहरमा न त संक्रमणको डरले सर्वसाधारण ‘आतंकित’ बनेका छन्, न संक्रमितलाई पहिलेजस्तो ‘असभ्य’ व्यवहार नै गरिएको छ ।

कोरोना भाइरसको नयाँ भेरिएन्ट ओमिक्रोन यसअघिका भेरिएन्टभन्दा बढी संक्रामक भएको चिकित्सकहरूले बताइरहे पनि सार्वजनिक स्थल, बजारमा भीड घटेको छैन । सार्वजनिक यातायातका साधनमा समेत यात्रु कोचिएरै यात्रा गरिरहेका छन् । माघ लागेयता त रूपन्देहीमा धमाधम विवाहका कार्यक्रमसमेत गर्न थालिएको छ ।

विभिन्न संघसंस्थाले गरेका कार्यक्रम, खुला स्थान र बसपार्कमा मानिसको उपस्थिति बाक्लै छ । मास्क लगाउने, भौतिक दूरी कायम गर्नेलगायत स्वास्थ्य मापदण्ड उतिसारो पालना भएको देखिँदैन । ओमिक्रोनबाट संक्रमित भए पनि जटिल स्वास्थ्य समस्या ल्याउने अवस्था कम रहेको सुनिएको र दुवै मात्रा खोपसमेत लगाइसकेकाले घरबाहिर निस्किरहेको सर्वसाधारण बताउँछन् ।

तिलोत्तमा–३ का माधवकुमार पौडेल र उनको परिवार हालै मात्र संक्रमणमुक्त भयो । संक्रमण भएपछि स्वास्थ्यमा खासै समस्या नदेखिएको उनले सुनाए । पहिलेजस्तो कोरोना संक्रमित भन्नेबित्तिकै मानिस अगाडि देखा नै नपर्ने व्यवहार पनि उनीहरूले यसपटक सहनुपरेन । मानिसमा बिस्तारै रोगसँग घुलमिल हुँदै जाने बानी परेको उनको बुझाइ छ । ‘अहिले मानिसले लिभिङ विथ कोरोनाको धारणा बनाइसकेका छन्,’ उनले भने, ‘ओमिक्रोन देखा परेपछि अब कोरोनासँग भागेर, लुकेर साध्य छैन भन्ने भएको छ । सचेतनाको अवस्था भने मिश्रित तरिकाको छ ।’ भीड हुने स्थानमा मानिसले त्यति धेरै सावधानी अपनाएको नदेखिएको उनले सुनाए ।

अघिल्ला लहरमा घरमै बसेर जोगिएको र अहिले त संक्रमित भएजस्तै महसुस नभएको सिद्धार्थनगर–८ की शोभा गौतमले बताइन् । उनले हिजोआज ‘संक्रमण जोखिम कायम छ, खतरा टरेको छैन’ भन्ने सोच नै नआउने बताइन् । ‘यसभन्दा अघि घरमा चाहिने सामान किन्न जाँदा पनि डरले मुटु काँप्थ्यो,’ उनले भनिन्, ‘यसपटक बाँचिन्छ केरे भन्ने भएको छ ।’ संक्रमण भइहाले पनि धेरै समस्या हुँदैन भन्ने सुनेकाले नआत्तिएको र पसल, यातायातका साधनमा सहज तरिकाले हिँडिरहेको उनले बताइन् । कोरोनाविरुद्धको खोप लगाइसकेको भएर पनि त्यति त्रास नभएको उनको भनाइ थियो ।

रूपन्देहीमा ३ वटा अस्पतालमा संक्रमितको उपचार हुने गरी प्रदेश सरकारले समन्वय गरेको छ । अघिल्ला २ लहरमा यी अस्पतालमा संक्रमितलाई राख्ने ठाउँ खाली नभएरै कतिको ज्यान गयो भने कतिलाई जिल्लाबाहिर लैजाने अवस्था आयो । तर अहिले बिरामीको संख्या न्यून छ । भर्ना भएका बिरामी उपचारपछि घर जाने स्थितिका छन् । लुम्बिनी प्रादेशिक अस्पतालमा सञ्चालित कोरोना वार्डमा ३२ जना बिरामीको उपचार भइरहेको अस्पतालका कोरोना फोकल पर्सन डा. नन्दु पाठकले बताए ।

खोप लगाएका र रोगसँग लड्ने क्षमता भएका मानिसलाई नयाँ भेरिएन्ट लाग्दा अवस्था असहज नदेखिए पनि उनीहरूबाट अन्यमा सर्दा ती मानिसको रोगसँग लड्न सक्ने क्षमता कमजोर पनि हुन सक्ने डा. पाठकको भनाइ छ । ‘ओमिक्रोन नै भएकाले केस जटिल छैन भन्ने पनि होइन,’ उनले भने, ‘संख्या बढी र मृत्युदर कम हुनुले भेरिएन्ट नै नयाँ भनेर प्रमाणित गरिहाल्ने स्थिति छैन ।’

प्रकाशित : माघ १०, २०७८ ११:३४
प्रतिक्रिया
पठाउनुहोस्

धमाधम स्वास्थ्यकर्मी संक्रमित, अस्पतालको सेवा कटौती

तेस्रो लहर सुरू भएयता चितवनमा मात्रै साढे २ सयभन्दा बढी स्वास्थ्यकर्मीमा कोरोना पुष्टि, स्वास्थ्य संस्थामा जनशक्ति व्यवस्थापनमा सकस थपिँदो
रमेशकुमार पौडेल

चितवन — कोरोना संक्रमितको संख्या ह्वात्तै बढे पनि चितवनका अस्पतालहरूमा उपचारका लागि भर्ना हुने संक्रमितको चाप खासै छैन । तर, अस्पतालका चिकित्सक, नर्स, प्राविधिकसहितका स्वास्थ्यकर्मीहरू धमाधम संक्रमित हुन थालेकाले उपचार सेवा प्रभावित भएको छ । संक्रमण दर यस्तै रहे आउँदा दिन झनै कठिन हुन सक्ने आकलन उपचारमा संलग्न चिकित्सकहरूको छ ।

भरतपुर अस्पताल कोरोना संक्रमितहरूको उपचार हुने जिल्लाको मुख्य अस्पताल हो । अस्पतालले सयभन्दा बढी शय्या संक्रमितहरूको उपचारका लागि व्यवस्था गर्न सक्छ । अहिले अस्पतालमा ४० जना संक्रमित भर्ना छन् । बिरामीको चाप कम भए पनि स्वास्थ्यकर्मीहरू धमाधम संक्रमित हुन थालेपछि अस्पतालले सेवा कटौती गर्न सुरु गरेको छ ।

अस्पतालले बहिरंग (ओपीडी) र नियमित शल्यक्रिया सेवा आइतबारदेखि रोकेको जनाएको छ । ‘अत्यावश्यक सेवा र शल्यक्रिया जारी राख्न सकिन्छ कि भनेको हो । तर जुन दरमा स्वास्थ्यकर्मीहरू संक्रमित हुन थाले, यसले यी सेवाहरू सञ्चालन गर्न पनि चुनौती हुने देखेको छु,’ भरतपुर अस्पतालका मेडिकल सुपरिन्टेन्डेन्ट डा. कृष्ण पौडेलले भने ।

डा. पौडेल आफैं पनि संक्रमित भएर हालै मात्र सेवामा फर्केका हुन् । ‘७ दिन घरमै बसेर अस्पताल आएको छु । काम गर्न सकिन्छ भन्ने लागेको छ, तर हेर्दै जाऊँ । मैले सजिलो देखेको भने छैन,’ उनले भने । कोरोनाको तेस्रो लहर सुरु भएसँगै भरतपुर अस्पतालका मात्रै ७० भन्दा बढी स्वास्थ्यकर्मी संक्रमित भइसकेको उनले जानकारी दिए ।

स्वास्थ्य कार्यालयका अनुसार जिल्लाभर यो संख्या २ सय ५० भन्दा बढी छ । स्वास्थ्य कार्यालय प्रमुख दीपक तिवारी पनि संक्रमित भएर हालै मात्र काममा फर्केका छन् । जिल्लामा देखिएका चुनौतीको व्यवस्थापन के कसरी गर्ने भन्ने बारेमा चल्ने बैठकहरूमा उनको दौडधुप सुरु भएको छ । ‘अबको मुख्य चुनौती नै यही होला जस्तो छ । किनकि स्वास्थ्यकर्मीहरू धेरै नै संक्रमित भएका छन् । यसले गाह्रो बनाउने भयो,’ आइतबार जिल्ला प्रशासन कार्यालयमा भएको बैठकबाट बाहिरिँदै गर्दा तिवारीले भने ।

कोरोना भाइरसको नयाँ भेरिएन्ट ओमिक्रोनको संक्रमण फैलने दर यसअघिका अन्य भेरिएन्टको भन्दा अत्यधिक भएका कारण स्वास्थ्यकर्मी पनि धेरै प्रभावित भएको भरतपुर अस्पतालका मेसु डा. पौडेलको भनाइ छ । अस्पतालमा सामान्य अवस्थामा दिनमै १५ सयभन्दा बढी बिरामी उपचारका लागि आउने गर्छन् । चितवन आसपासका १२ जिल्लाका बिरामीहरू यो अस्पतालमा नियमित जस्तो उपचारका लागि आउने गरेको उनले बताए । सुत्केरी हुने धेरै महिला यो अस्पतालमा आउने गर्छन् ।

गत साता मात्रै २४ घण्टामा ५४ जनासम्मलाई सुत्केरी सेवा दिएको उनले बताए । त्यसैले स्वास्थ्यकर्मी संक्रमित हुँदा धेरैजनालाई मर्का पर्ने उनले बताए । सेवा कटौती गर्ने भनिए पनि आइतबार संक्रमितबाहेक ९ सय १२ जना उपचारका लागि आएको अस्पतालले जनाएको छ । अस्पतालले संक्रमित हुने स्वास्थ्यकर्मीलाई कडा लक्षण नदेखिए ७ दिनपछि र अस्पताल भर्ना भएकाहरूलाई डिस्चार्ज भएको ३ दिनपछि काममा फर्कन भनेको छ । ‘तर होम आइसोलेसनमा बसेका केही चिकित्सकहरूमा ५/६ दिनपछि कडाखाले लक्षणहरू देखा परेको पाइएको छ,’ डा. पौडेलले भने, ‘ओमिक्रोनको चरित्रका बारेमा धेरैखाले दुविधा कायमै छ ।’

स्वास्थ्य कार्यालय प्रमुख तिवारी संक्रमण रोक्न सबैले सचेत भएर काम गरे व्यवस्थापन सहज हुने बताउँछन् । कोरोना संक्रमण दर बढ्दै गए र स्वास्थ्यकर्मी पनि यही अनुपातमा संक्रमित हुन थाले आउँदा दिनहरू कठिन हुने उनको पनि आकलन छ । आइतबार मध्याह्नसम्म जिल्लामा सक्रिय संक्रमितको संख्या २ हजार ८ सय ६१ पुगेको छ । तीमध्ये अस्पताल भर्ना हुने ४२ जना मात्रै छन् ।

प्रकाशित : माघ १०, २०७८ ११:३१
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×