मस्जिद रहेको जग्गा सरकारको नाममा ल्याउन माग- समाचार - कान्तिपुर समाचार

मस्जिद रहेको जग्गा सरकारको नाममा ल्याउन माग

कान्तिपुर संवाददाता

काठमाडौँ — काठमाडौंको सुन्धारास्थित मुस्लिम समुदायको मदनी मस्जिद रहेको सरकारी जग्गा व्यक्तिको नाममा गरिएको भन्दै मुस्लिम समुदायका अगुवाहरुले सरकारको नाममा ल्याउन माग गरेका छन् ।

मुस्लिम आयोग, विभिन्न राजनीतिक दलका मुस्लिम समुदायसँग सम्बन्धित भ्रातृ संगठनका प्रमुख तथा प्रतिनिधिहरुले बिहीबार भूमि व्यवस्था, सहकारी तथा गरिबी निवारण मन्त्री शशि श्रेष्ठलाई भेटेर सुन्धाराको मदनी मस्जिद रहेको जग्गा सरकारको नाममा ल्याउन माग गरेका हुन् । सरकारी जग्गा मुस्लिम समुदायले लामो समयदेखि भोगचलन गर्दै आए पनि पछिल्लो समय भुमाफियाहरुले व्यक्तिको नाममा पारी हडपेको सरोकारवालाले बताएका छन् ।

मन्त्री श्रेष्ठलाई सो जग्गा मस्जिद कायम रहने गरी सरकारको नाममा ल्याउन अनुरोध गरिएको र उनले सो जग्गा सरकारको नाममा फिर्ता आउने तथा मस्जिद कायम रहने आश्वासन दिएको मुस्लिम आयोगका अध्यक्ष समिम मियाँ अन्सारीले बताए ।

प्रकाशित : माघ ६, २०७८ २२:०४
प्रतिक्रिया
पठाउनुहोस्

महाकाली अस्पतालमा सामान्य अवस्थाका बिरामी नआउन आग्रह

भवानी भट्ट

कञ्चनपुर — महेन्द्रनगरस्थित महाकाली प्रादेशिक अस्पतालले सामान्य अवस्थाका बिरामीलाई अस्पताल नआउन आग्रह गरेको छ । कोरोना संक्रमणले स्वास्थ्यकर्मीसँगै सर्वसाधारणसमेत प्रभावित भएकाले जोखिम बढ्न सक्ने भन्दै सामान्य अवस्थाका बिरामीलाई अस्पतालमा नआउन आग्रह गरेको हो । 

बिहीबारसम्म महाकाली प्रादेशिक अस्पतालका १५ जना स्वास्थ्यकर्मीमा कोरोना संक्रमण पुष्टि भइसकेको छ । लक्षणमात्रै देखिएको स्वास्थ्यकर्मीको संख्या अझ बढी छ । यस्तो अवस्थामा अन्य बिरामीलाई समेत संक्रमण फैलन सक्ने भएकाले सामान्य अवस्थामा अस्पताल नआउन आह्वान गरिएको निमित्त मेडिकल सुपरिटेन्डेन्ट डा अर्जुन भट्टले बताए ।

उनका अनुसार अहिले महाकाली प्रादेशिक अस्पताल आउने बिरामीमध्ये अधिकांश बिरामी संक्रमित छन् । उनका अनुसार बिहीबारमात्रै आकस्मिक कक्षमा ३५ जना संक्रमित भर्ना भएका छन् । जिल्लामा कोरोना संक्रमणदर दिन प्रतिदिन बढ्दै गएको छ‚ जसका कारण विभिन्न सेवाहरू बन्द हुँदै आएका छन् ।

बुधबारमात्रै जिल्ला सदरमुकाममा रहेको भीमदत्त नगरपालिकाका १६ जना कर्मचारीमा कोरोना संक्रमण देखिएपछि अत्यावश्यक बाहेकका सबै सेवाहरू बन्द गरिएको छ ।

प्रकाशित : माघ ६, २०७८ २१:०७
पूरा पढ्नुहोस्
प्रतिक्रिया
पठाउनुहोस्
×