प्रधानमन्त्री कार्यालयका ३ सचिवसहित ४० कर्मचारीमा कोरोना- समाचार - कान्तिपुर समाचार

प्रधानमन्त्री कार्यालयका ३ सचिवसहित ४० कर्मचारीमा कोरोना

कान्तिपुर संवाददाता

काठमाडौँ — प्रधानमन्त्री तथा मन्त्रिपरिषद् कार्यालयका ३ सचिवसहित ४० जना कर्मचारीमा कोरोना संक्रमण पुष्टि भएको छ । दुई दिनमा २ सय जना कर्मचारीको पीसीआर परीक्षण गर्दा ४० जनामा कोरोना संक्रमण पुष्टि भएको प्रधानमन्त्री तथा मन्त्रिपरिषद्को कार्यालयले जनाएको छ ।

आर्थिक तथा पूर्वाधार विकास हेर्ने सचिव शिशिरकुमार ढुंगाना, सीसीएमसीसीका प्रमुख रहेका प्रादेशिक समन्वय र सामाजिक विकास हेर्ने सचिवहरु रामप्रसाद थपलिया र कृष्णबहादुर रावतसहित ४० जना कर्मचारीमा कोरोना पुष्टि भएको कार्यालयका प्रवक्तासमेत रहेका सहसचिव महादेव पन्थले जानकारी दिए ।

कार्यालका सचिव थपलिया र ढुंगानालाई भने केही दिनअघि नै संक्रमण पुष्टि भएको थियो । उनीहरु दुवै जना संक्रमणमुक्त भइनसकेको कार्यालयले जनाएको छ ।

प्रवक्ता पन्थका अनुसार प्रधानमन्त्री तथा मन्त्रपरिषद् कार्यालयका २ सचिवमा कोरोना संक्रमण पुष्टि भएपछि राष्ट्रिय जनस्वास्थ्य प्रयोगशालाको टोली बोलाएर कार्यालयमा नै पीसीआर परीक्षण गराएको थियो । उनका अनुसार थप केही कर्मचारीको आइतबार परीक्षण गरिएकाले उनीहरुको रिपोर्ट आउन बाँकी छ ।

कर्मचारीमा कोरोना संक्रमण पुष्टि भएपछि प्रधानमन्त्री कार्यालयले संक्रमित तथा सामान्य ज्वरो तथा रुघाखोकी लागेका कर्मचारीलाई घरमै बस्न भनेको प्रवक्ता पन्थले बताए ।

प्रकाशित : माघ २, २०७८ २१:३०
प्रतिक्रिया
पठाउनुहोस्

अफगानिस्तानमा महिला प्रदर्शन खुर्सानीको धुलो फ्याँक्दै तालिबान सेना

एजेन्सी

काबुल — अफगानिस्तानमा काम र शिक्षाको अधिकार माग्दै आइतबार प्रदर्शनमा उत्रिएका महिलाहरूको आन्दोलन दबाउने प्रयास गर्दै तालिबान सेनाले खुर्सानीको धुलो (पिरो पदार्थ) फ्याँकेको छ ।

गत अगस्टमा तालिबानले सत्ता कब्जा गरेपछि महिलाहरूले स्वतन्त्र रुपमा काम गर्न पाएका छैनन् । साथै शिक्षाको हकबाट पनि उनीहरूलाई वञ्चित गरिएको छ । आइतबार भने २० भन्दा बढी महिलाहरूले काबुल विश्वविद्यालय अगाडि समानता र न्यायको माग गर्दै नाराबाजी गरेका थिए ।

महिला अधिकारकर्मीहरूले अधिकारीसम्बन्धी नारा लेखिएका व्यानरसहित प्रदर्शन गरेका थिए । यद्यपि तालिबान सेनाले प्रदर्शन दबाउन पिरो पदार्थ फ्याँकेको हो । 'हामी जब काबुल विश्वविद्यालय अगाडि थियौं त्यसबेला तालिबान लडाकुहरू गाडीमा आएर हामीमाथि खुर्सानीको धुलो फ्याँके,' आन्दोलनकारीमध्ये एक महिलाले भनिन् । साथै तालिबान सेनाले उनीहरूमाथि बन्दुक तेर्स्याएर धम्क्याएको पनि अन्तर्राष्ट्रिय सञ्चारमाध्यममा लेखिएको छ ।

पिरो पदार्थबाट भएको एलर्जी उपचारका लागि एक प्रदर्शनकारीलाई अस्पताल लगिएको पनि बताइएको छ । अफगानिस्तानमा यसअघि पनि शिक्षाको अधिकार माग्दै महिलाहरू प्रदर्शनमा उत्रिएका थिए ।

तालिबान सरकारले महिलाहरूलाई स्वतन्त्र रुपमा काममा जान प्रतिबन्ध लगाएको छ । साथै महिलालाई स्कुल तथा कलेज पनि बन्द गरिएको छ । कतिपय सार्वजनिक छवि भएका महिलाहरूले भने आफ्नो पहिचान लुकाउने गरेको अन्तर्राष्ट्रिय सञ्चारमाध्यमले जनाएका छन् ।

प्रकाशित : माघ २, २०७८ २१:१९
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×