बर्दियामा बाघ गणनामा प्रयोग भएको क्यामेरा चोरी- समाचार - कान्तिपुर समाचार
कान्तिपुर वेबसाईट
AdvertisementAdvertisement

बर्दियामा बाघ गणनामा प्रयोग भएको क्यामेरा चोरी

कमल पन्थी

बर्दिया — बाघ गणनामा प्रयोगमा भएको एक थान ट्रयापिङ क्यामेरा चोरी भएको छ । बर्दिया राष्ट्रिय निकुञ्जको सीमासँग जोडिएको मध्यवर्ती क्षेत्रमा राखिएको क्यामेरा चोरी भएको हो ।

चोरी गर्ने मानिसलाई पक्राउ गर्न सजिलो होस् भन्दै ठाउँको नाम उल्लेख गर्न नमिल्ने निकुञ्जका प्रमुख संरक्षण अधिकृत विष्णु प्रसाद श्रेष्ठले बताए । क्यामेरा चोर पत्ता लगाउन स्काई क्यामेरा प्रयोग गरिएको उनले जनाए ।

निकुञ्ज र आसपास बाँके र बर्दियामा एकै साथ बाघ गणना भइरहेको छ । बाघ गणनामा सात सय वटा ग्रीडमा ७ सय २० वटा स्वचालित क्यामेरा राखिएको छ । एउटा ग्रीडमा कम्तिमा १५ देखि २१ दिन सम्म क्यामेरा ट्रयाप राखिएको छ ।

बाघ गणना निकुञ्ज, मध्यवर्ती क्षेत्र, खाता जैविक मार्ग र आसपासका जंगलमा भइरहेको छ । ९ सय ६८ वर्ग किमी क्षेत्रफल रहेको बर्दिया निकुञ्जको चुरे पहाडको बबई उपत्यकामा बाघको बासस्थान बन्दै गएको छ ।

बर्दिया राष्ट्रिय निकुञ्ज वन्यजन्तु विभाग, विश्व वन्यजन्तु संरक्षण कोष, राष्ट्रिय प्रकृति संरक्षण कोष, नेपाली सेना र चोरी सिकारी नियन्त्रण युवा अभियानबाट संयुक्तरुपमा प्राविधिक टोलीले गणना गरिरहेका छन् । निकुञ्ज बाहेक खाता जैविक मार्ग,आसपासका क्षेत्र र कैलालीको छतिवन क्षेत्रबाट पनि बाघको गणना हुँदै आएको छ ।

यसअघि चितवनमा भएको गणनामा प्रयोग भएका ५ थान क्यामेरा चोरी भएका थिए ।

प्रकाशित : पुस १७, २०७८ १५:१४
प्रतिक्रिया
पठाउनुहोस्

नयाँ वर्षले जनकपुरमा पर्यटकहरुको भरिभराउ

कान्तिपुर संवाददाता

काठमाडौँ — विश्वव्यापी रुपमा फैलिएको कोरोना संक्रमणको कारणले थला परेको जनकपुरको पर्यटन क्षेत्र अहिले नयाँ वर्षमा भरिभराउ भएको छ ।

अंग्रेजी नयाँ वर्ष मनाउन जनकपुरमा भारतीय पर्यटकहरुको घुइँचो लागेको छ । भगवानको दर्शन र पूजापाठ गरेर नयाँ वर्षको सुरुवात सुखमय होस् भन्ने अभिलाषाका साथ जनकपुरमा पर्यटकहरु भरिएका छन् । शनिबार बिहानैदेखि जनकपुरको जानकी मन्दिर, राममन्दिरलगायतका धार्मिक मठमन्दिरहरुमा पर्यटकहरुको भिड लागेको छ । भारतीय गाडीहरुको चाप बढेको छ । महोत्तरीको जलेश्वर र धनुषाको जटही नाकाबाट भारतीय पर्यटकहरु अत्याधिक रुपमा जनकपुर आएका छन् ।

कोरोनाको कारणले जनकपुरसहितको पर्यटन क्षेत्र सुस्त भएको थियो । अहिले बिहार राज्यको मात्रै नभई अन्य प्रान्तबाट समेत जनकपुरमा पर्यटकहरुको भिड देखिएको छ । नेपालका साथै छिमेकी मुलुक भारतका दक्षिण भारत, राजस्थान, गुजरात, महाराष्ट्र, हरियाणा, दिल्ली, बिहार, उत्तरप्रदेश सिमला, उत्तराखण्डलगायत राज्यबाट हजारौंको संख्यामा पर्यटक जनकपुरधाम आउने गरेका छन् । त्यसैगरी, मौरिसस, फिजी, मलेसियाको बाली, इन्डोनेसिया, श्रीलंका, अमेरिका, चीनलगायत मुलुकबाट पर्यटक जनकपुरधाम आउने गरेको यहाँका होटेल व्यवसायी बताउँछन् ।

नयाँ वर्षको अवसरमा भने बिहारसहित विभिन्न प्रान्तका पर्यटकहरु जनकपुर आएका छन् । अहिले जनकपुरको होटलहरु पर्यटकले भरिभराउ भएको छ । जानकी मन्दिरका उत्तराधिकारी महन्थ राम रोशन दासले जानकी मन्दिरमा तीन चार वर्षपछि यतिको संख्यामा पर्यटक आएको भन्दै खुशी व्यक्त गरे ।

अहिले भारतीय गाडीको चापसमेत अत्यधिक बढेको छ । भारत मध्य प्रदेशस्थित टिकमगढकी राजकुमारी वृषभानुकुमारीले ९ लाख चाँदीका असर्फी खर्चेर निर्माण गराएकाले यसलाई नौलखा मन्दिर पनि भन्ने गरिन्छ ।

प्रकाशित : पुस १७, २०७८ १४:४७
पूरा पढ्नुहोस्
प्रतिक्रिया
पठाउनुहोस्
×