केरूङ च्छो तालको सतह एक मिटर घट्यो- समाचार - कान्तिपुर समाचार
कान्तिपुर वेबसाईट
AdvertisementAdvertisement

केरूङ च्छो तालको सतह एक मिटर घट्यो

'तत्कालका लागि जोखिम टर्‍यो'
अनिश तिवारी

सिन्धुपाल्चोक — केरुङ च्छो तालको एक मिटर सतह घटेको जिल्ला प्रशासन कार्यालय सिन्धुपाल्चोकले बताएको छ । तालमा पानी भरिएपछि चिनियाँ अधिकारीले फुट्न सक्‍ने चेतावनी दिएका थिए ।

चीनको न्यालम र खासाक्षेत्रका वैदेशिक विभाग प्रमुख र प्रतिनिधिले वर्षात रोकिएपछि तालको सतह एक मिटर घटेको जानकारी आफूलाई दिएको सिन्धुपाल्चोकका प्रमुख जिल्ला अधिकारी उमेशकुमार ढकालले बताए ।

चिनियाँ विशेषज्ञसहित भूगर्भविद्को ७ जनाको टोलीले उक्त तालको सतह घटबढले जोखिम बढाउन सक्ने या नसक्ने भन्नेबारेमा अध्ययन गरिरहेको उनले बताए । ‘विषयविज्ञको टिम तालमा पुगेर अध्ययन गर्दैछ, त्यसपछि जोखिम हुने या नहुने भन्नेबारेमा निर्क्यौल आउनेछ, तत्कालका लागि जोखिम भने टरेको देखिन्छ,’ प्रजिअ ढकालले कान्तिपुरलाई भने ।

सीमावर्ती तातोपानी क्षेत्रबाट झण्डै ५० किलोमिटरको दुरीमा रहेको तिब्बतको कुती बजारको माख्लो भेगस्थित च्छो ताल फुट्ने आशंकामा चीन पक्षले मंगलबार जानकारी दिएको थियो ।

बेलुकीपख प्रशासन र सुरक्षाकर्मीले हुनसक्ने जोखिमको बारेमा सुचना फुकेपछि नदीको तटीय भेगमा रहेका सीमावर्ती क्षेत्र तातोपानी ,हिन्दी,चाकुदेखि बाह्रबिसे, खाडीचौर, बलेफी ,सुकुटेजस्ता दुई दर्जन बजारका स्थानीयमा दौडादौडी चलेको थियो । उनीहरुले रातारात सामाग्री ओसारेका थिए ।

प्रकाशित : श्रावण ६, २०७७ १६:०४
प्रतिक्रिया
पठाउनुहोस्

फुल्पिङकट्टी पहिरोमा पुरिएका १ को शव फेला, २ अझै बेपत्ता

अनिश तिवारी

सिन्धुपाल्चोक — भोटेकोसी गाउँपालिका ४ फुल्पिङकट्टीमा गएको पहिरोमा बेपत्तामध्ये १ जनाको शव फेला परेको छ । अविरल वर्षापछि खकुण्डोलमाथिबाट बुधबार आएको पहिरोमा परी एकै परिवारका ५ जना बेपत्ता भएका थिए । 

तस्बिर सौजन्य : भोटेकोसी गाउँपालिका 

शुक्रबार दिउँसो १४ वर्षीया छिरिङवाङ्गु शेर्पा शव फेला परेको जिल्ला प्रहरी नायव उपरीक्षक (डीएसपी) माधवप्रसाद काफ्लेले जानकारी दिए । पहिरोले फुल्पिङकट्टीकै दुई घर बगाउँदा बेपत्ता ३५ वर्षीया साङ्मु शेर्पा र १६ वर्षीयाकी याङ्जी शेर्पाको शव बिहीबार भेटिएको थियो ।

यस्तै ७५ वर्षीया सुमबुट्टी शेर्पा र ४० वर्षीया सेमसङ्ग शेर्पा भने अझै बेपत्ता छन् । ‘सशस्त्र, नेपाली सेनासहित अन्य सुरक्षाकर्मी स्थानीयसँग मिलेर बेपत्तालाई पहिरो खन्दै खोजिरहेका छन्, त्यहाँ वर्षात् भइरहेकाले पहिरो झर्ने डरमा एक्स्काभेटर प्रयोग रोकिएको छ,’ डीएसपी काफ्लेले भने ।

बस्तीबीच निरन्तर पहिरो खसिरहेकाले ६० परिवार विस्थापित बनेको छ भने पञ्‍चकन्या आधारभूत विद्यालयमा क्षति भएको छ ।

प्रकाशित : श्रावण २, २०७७ १७:१७
पूरा पढ्नुहोस्
प्रतिक्रिया
पठाउनुहोस्
×