राहत माग्दै गाउँपालिकाको कार्यालय घेराउ
महोत्तरी — राहत वितरण नगरेको भन्दै स्थानीयले मोहत्तरीको साम्सी गाउँपालिकाको कार्यालय घेराउ गरेका छन् ।
लकडाउनका कारण रोजगारी गुमेपछि खान समस्या हुँदा समेत गाउँपालिकाले कसैलाई राहत वितरण नगरेको भन्दै स्थानीयले सोमबार गाउँपालिकाको कार्यालय घेराउ गरेका हुन् ।
वडा कार्यालयले घर–घर पुगेर नाम संकलन गरी हस्ताक्षर गराएको महिना दिन बितिसक्दा समेत राहत वितरण हुन सकेको छैन । खाद्यान्न नभएपछि आक्रोशित बनेका स्थानीयले गाउँपालिका कार्यालय घेराउ गरेका हुन् ।
गाउँपालिकाबाट राहत वितरण गर्न ७ वटा वडालाई १० लाखको दरले बजेट पठाएको थियो । तर, वडा कार्यालयहरुले राहतको सट्टा मास्क र सेनिटाइजर मात्रै बाँडेको पाइएको छ ।
गाउँपालिका घेराउ गर्न पुगेका आक्रोशित समूहले जनप्रतिनिधि र कर्मचारीविरुद्ध नाराबाजी गरेका थिए ।
गाउँपालिकाका अध्यक्ष शेष फारुकले राहत वितरणका लागि वडा कार्यालयलाई रकम उपलब्ध गराएको बताए ।
यो पनि पढ्नुहोस्ः
सम्सी गाउँपालिका अध्यक्षद्वारा अधिकृतविरुद्ध अख्तियारमा उजुरी
प्रकाशित : वैशाख २२, २०७७ १६:३७
