कान्तिपुर वेबसाईट
AdvertisementAdvertisement

मेची पुलमा रोकिएका नेपाल आए

पर्वत पोर्तेल

काँकडभिट्टा — प्रदेश १ का मुख्यमन्त्री शेरधन राईले नाकाबन्दीका कारण सीमा नाकामा अलपत्र नेपालीलाई प्रवेशका लागि स्थानीय सरकार र प्रशासनलाई निर्देशन दिएपछि उनीहरु नेपाल प्रवेश गरेका छन् । अपरान्ह उनीहरुलाई नेपाल आउने अनुमति दिइएको थियो । नेपालतिर अलपत्र भारतीयहरुलाई पारी पठाइएको छ ।  


नाकाबन्दीका कारण बन्द सीमा नाकाको निरीक्षणका लागि सोमबार पूर्वी नाका काँकडभिट्टा आएका उनले सीमामा अलपत्र यात्रीहरुलाई प्रवेशका लागि केन्द्र सरकारसँग समन्वय गरेको जनाए।


उनले नेपालतिर अलपत्र भारतीय र भारततिर अलपत्र नेपाली नागरिकसँग भेटेका थिए। नेपाली नागरिकसँग उनले भने,‘तपाईंहरुको समस्यालाई मध्यनजर गरेर हामी प्रवेश दिदैछौं। तर, तपाईंहरु कम्तिमा ७ दिन सेल्फ क्वारेन्टाइनमा बस्दिनु होला।’


नाकाबन्दीका कारण नेपाल आउने र भारत जाने यात्रीले पूर्वी नाका दिनभर अस्तव्यस्त थियो। नेपाल आउन लागेका यात्रीको शरीरको तापक्रम जाँचेर छाडिने र सेल्फ क्वारेन्टाइनमा बस्न आग्रह गरिने डीएसपी राजेन्द्र पोख्रेलले जनाए।


भारतबाट नेपाल फर्किन लागेका करिब पाँच सय यात्रीले नेपाल प्रवेशको माग गर्दै केही समय अघि मेची पुलमा नाराबाजी समेत गरेका थिए।


यो पनि पढ्नुहोस्ः

घर फिर्न पाउनुपर्ने भन्दै मेची पुलमा नाराबाजी प्रकाशित : चैत्र १०, २०७६ १८:५१

ADVERTISEMENT
प्रतिक्रिया
पठाउनुहोस्

गुल्मी रातिदेखि लकडाउन

वीरेन्द्र केसी

गुल्मी — कोरोना संक्रमणबाट जोगिन गुल्मीलाई पूर्ण रुपमा लकडाउन गरिने भएको छ । प्रमुख जिल्ला अधिकारी भरतकुमार शर्माको अध्यक्षतामा बसेको सुरक्षा समिति र सरोकारवालाको छलफलपछि सुरक्षित रहन सम्पूर्ण सार्वजनिक र निजी सवारी साधनलाई राति १२ बजेदेखि आवतजावतमा रोक लगाइने भएको छ । मोटरसाइकल पनि अर्को सूचना जारी नभएसम्मको लागि चल्ने छैनन् ।

एम्बुलेन्स, दूधका गाडी, खाद्यान्न बोक्ने मालवाहक गाडी, पानी, फलफूल औषधि र तरकारी बोक्ने गाडीलाई रोक लगाइएको छैन। जिल्ला भित्रिने मालवाहक गाडीमा एक चालक र एक सहचालक मात्रै रहनेछन्। उनीहरुको हेल्थ डेस्कमा स्वास्थ्य जाँच गर्ने र आवश्यक परेमा क्वारेन्टाइनमा राखिने शर्माले बताए।

अत्यावश्यक दैनिक उपभोग्य वस्तुहरु इन्धन, दाल, चामल, तेल, नुन, दूध डेरी तरकारी तथा फलफूल बाहेकका अन्य सम्पूर्ण पसलहरु राति १२ बजेदेखि अर्को सूचना नभएसम्म पूर्ण रुपमा बन्द रहनेछन्। अस्पताल स्वास्थ्य संस्था, औषधि पसलहरु र पेट्रोल पम्म २४ सै घन्टा सञ्चालन रहने शर्माले बताए।

सबै स्थानीय तहमा हेल्थ डेस्क राखिएको छ। घरबाट कोही पनि बाहिर निस्कन प्रतिबन्ध लगाइएको छ। अत्यावश्यक बाहेक अरु बाहिर ननिस्कन भनिएको छ। भारत लगायत स्वदेशका अन्य ठाउँबाट आएकालाई १४ दिन अनिवार्य घरको क्वारेन्टाइनमा राख्न जनप्रतिनिधिलाई सर्कुलर प्रशासनले गरेको छ। १२ वटै स्थानीय तहका नागरिकलाई कोरोनाबाट जोगिन सरकार र प्रशासनले जारी गरेको सर्तहरु पालना नगरे कानुन बमोजिम कारबाही गरिने शर्माले बताए।

प्रकाशित : चैत्र १०, २०७६ १८:३१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×