फरक पार्टीबाट आएकाले कांग्रेसका के-के जिम्मेवारी पाए ?
काठमाडौँ — २०७४ सालको चुनाव दौरान फरक पार्टीबाट कांग्रेसमा प्रवेश गरेका मध्य केन्द्रीय समितिमा एकजनाले पदाधिकारी र १३ जनाले सदस्यको जिम्मेवारी पाएका छन् । यस्तै ९ जना आमन्त्रित केन्द्रीय सदस्य भएका छन् ।
शुक्रबार सभापति शेरबहादुर देउवाले तत्कालीन नेपाल लोकतान्त्रिक फोरमका ११ नेतालाई केन्द्रीय सदस्यमा मनोनयन गरेपछि फरक पार्टीबाट कांग्रेस प्रवेश गरेर केन्द्रमा जिम्मेवारी पाउने नेताको संख्या २३ पुगेको हो ।
तत्कालीन नेपाल लोकतान्त्रिक फोरमलगायत अन्य राजनीतिक दलको सांगठनिक संरचना समायोजनका लागि उपसभापति विमलेन्द्र निधिको संयोजकत्वमा गठीत समायोजन समितिको सिफारिसमा उनीहरुलाई जिम्मेवारी दिइएको पार्टीले बताएको छ । यसअनुसार तत्कालीन लोकतान्त्रिक फोरमका अध्यक्ष विजय गच्छदार उपसभापति मनोनित भइसकेका छन् । उनी कांग्रेस संसदीय दलका उपनेता पनि हुन् । तर, गत माघ २२ गते अख्तियार दुरुपयोग अनुसन्धान आयोगले गच्छदारलाई ललिता निवास जग्गा प्रकरणमा दोषी ठहर्याउँदै विशेष अदालत काठमाडौंमा मुद्दा दायर गरेपछि उनको सांसद पद निलम्बन भएको छ ।
देउवाले यसअघि फागुन १९ गते २ जनालाई केन्द्रीय सदस्य र ६ जनालाई आमन्त्रित केन्द्रीय सदस्य बनाए । बनाइएका सबै अन्य पार्टीबाट २०७४ को निर्वाचनको पूर्वसन्ध्यामा कांग्रेस प्रवेश गरेका नेताहरु हुन् । त्यस दिन देउवाले जंगीलाल राय (सर्लाही) र कर्णबहादुर बुढा (डोल्पा)लाई केन्द्रीय सदस्य बनाएका थिए । राय राजपाको महासचिव छोडेर कांग्रेस प्रवेश गरेका थिए भने बुढा राप्रपा छोडेर । रायलाई कांग्रेसले प्रतिनिधिसभा सदस्यको उम्मेदवार पनि बनायो । तर, उनी पराजीत भए ।
आमन्त्रित केन्द्रीय सदस्यमा देउवाले मोहनसिंह राठौर (कैलाली), शम्भुलाल श्रेष्ठ (सर्लाही), अभिशेकप्रताप शाह (कपिलवस्तु), दयाराम पाण्डे (लम्जुङ), जनकराज कलौनी (डडेलधुरा) र भूमिबहादुर (विश्व) गुरुङ (स्याङ्जा)लाई मनोनीत गरेका थिए । आमन्त्रित केन्द्रीय सदस्यमा मनोनीत राठौर तत्कालीन एमालेबाट कांग्रेस प्रवेश गर्दै कैलाली–२ बाट प्रतिनिधिसभामा टिकट पनि पाए । तर, पराजित भए ।
श्रेष्ठ माओवादीबाट कांग्रेस प्रवेश गरेका हुन् । उनले २०७० सालमा भएको दोस्रो संविधानसभा निर्वाचनमा तत्कालीन एमाले नेता पूर्वप्रधानमन्त्री झलनाथ खनाललाई पराजित गरेका थिए ।
शाह तत्कालीन संघीय समाजवादी पार्टीको केन्द्रीय सदस्यबाट कांग्रेस प्रवेश गरेका हुन । उनी कपिलवस्तु–३ बाट प्रतिनिधिसभा सदस्यमा निर्वाचित पनि भएका छन् । शाह यसअघि २०७० र २०६४ मा भएका संविधानसभा निर्वाचनमा पनि त्यही निर्वाचन क्षेत्रबाट निर्वाचित भएका थिए ।
पाण्डे अखण्ड नेपाल पार्टीको एउटा समूहको अध्यक्ष थिए । उनले आफ्नो नेतृत्वको पार्टीलाई कांग्रेसमा विलय गराएका थिए । कलौनी र गुरुङ पनि फरक पार्टीबाट कांग्रेस प्रवेश गरेका थिए ।
यसअघि देउवाले फरक पार्टीबाट आएका तीनजनालाई आमन्त्रित सदस्य बनाएका हुन् । उनले नरेन्द्र चौधरी, सूर्यबहादुर केसी र कुमार खड्कालाई आमन्त्रीत केन्द्रीय सदस्य बनाका हुन् । यीमध्ये चौधरी र केसी राप्रपाबाट र खड्का अखण्ड नेपाल पार्टीबाट कांग्रेस प्रवेश गरेका थिए । केसी कांग्रेसबाट अहिले प्रतिनिधिसभामा सभानुपातिक तर्फबाट सांसद छन् भने खड्का गण्डकी प्रेदशका सांसद छन् । उनी प्रदेशसभामा प्रमुख सचेतकसमेत हुन्।
प्रकाशित : फाल्गुन २६, २०७६ १८:३३