अग्‍नि सापकोटाविरुद्धको मुद्दा न्यायाधीश फुँयालले हेर्न नमिल्ने- समाचार - कान्तिपुर समाचार
कान्तिपुर वेबसाईट
AdvertisementAdvertisement

अग्‍नि सापकोटाविरुद्धको मुद्दा न्यायाधीश फुँयालले हेर्न नमिल्ने

कान्तिपुर संवाददाता

काठमाडौँ — सभामुखका उम्मेदवार अग्‍नि सापकोटाविरुद्धको मुद्दा सर्वोच्चका न्यायाधीश हरि फुँयालले हेर्न नमिल्ने भएको छ ।

सापकोटाविरुद्धको मुद्दामा सर्वोच्च अदालतको न्यायातधीश नियुक्त हुनु अघि कानुन व्यवसायीका रूपमा बहस गरेकाले फुँयालले उक्त मुद्दा हेर्न नमिल्ने भएको सर्वोच्च अदालतका सञ्चार विज्ञ किशोर पौडेलले जानकारी दिए ।

सापकोटाविरुद्ध वरिष्ठ अधिवक्ता दिनेश त्रिपाठीले दायर गरेको रिटमा अब अर्को पेशी तोकिने भएको छ । आइतबारको पेशीमा उक्त मुद्दा फुँयालको एकल इजलासमा परेको थियो ।

शुक्रबार त्रिपाठीले दायर गरेको रिटमा सापकोटा द्वन्द्वकालमा व्यक्ति हत्यामा संलग्न रहेको आरोप लगाउँदै पक्राउ गरेर अनुसन्धान गर्न पनि माग गरिएको थियो । त्यस्तै, उनी विरुद्ध सर्वोच्च अदालतको संवैधानिक इजलसमा र सत्य निरुपण तथा मेलमिलाप आयोग लगायतमा मुद्दा रहेकाले सभामुखमा निर्वाचित हुनबाट रोक्न त्रिपाठीको रिटमा माग गरिएको थियो ।

उक्त मुद्दाको पेशी आइतबार बिहान १० बजे तोकिएको थियो । न्यायाधीश फुँयालको इजालसमा उक्त रिटमाति बहस हुने भएपछि सापकोटाविरुद्धको मुद्दामा बहस गरेका उनले उक्त मुद्दा हेर्न मिल्ने कि नमिल्ने भन्ने प्रश्न उठेको थियो ।

सुशील प्याकुरेललगायत ८ जनाले २०७२ सालमा हालेको मुद्दामा सापकोटाविरुद्ध फुँयालले बहस गरेका थिए ।

सम्बन्धित समाचारः

अग्नि सापकोटाविरुद्ध परेको रिटमाथि आज सर्वोच्चमा प्रारम्भिक सुनुवाई


प्रकाशित : माघ १२, २०७६ ११:२९
प्रतिक्रिया
पठाउनुहोस्

अमेरिकामा रहेकी उपप्रमुखको प्रतिक्रिया- 'म हराएको छैन, कतै लुकेको पनि छैन'

कान्तिपुर संवाददाता

काठमाडौँ — अमेरिकामा पुगेर पार्टीको सम्पर्कमा नआएको आरोप लागेकी कालीकोटको तिलागुफा नगरपालिकाकी उपप्रमुख दन्ता नेपालीले आफू बिरामी परेका कारण नेपाल फर्किन नसकेको प्रतिक्रिया जनाएकी छन् । 

सामाजिक सञ्जाल फेसबुकमा आइतबार स्टाटस लेख्दै उपप्रमुख नेपालीले आफू मेयर रतनबहादुर शाहीलाई जानकारी दिएर अमेरिका गएको भन्दै कतै नलुकेको प्रस्ट्याएकी हुन् । 'म हराएको पनि छैन, कतै लुकेको पनि छैन', उनले लेखेकी छन्, 'म मेयर रतन शाहीलाई जानकारी नदिएर पनि आएको होइन, उहाँले नै भ्रमण स्वीकृत गरेर आएको हो ।'
अमेरिकामा आयोजित गोष्ठीमा भाग लिन कात्तिक पहिलो साता गएकी उपप्रमुख नेपाली फर्किएकी छैनन् । पार्टी र नगरपालिकालाई समेत जानकारी नभएको खबर विभिन्न सञ्चारमाध्यममा आएपछि उनले खण्डन गरेकी हुन् ।

उपप्रमुख नेपालीले आफ्नो स्वास्थ्यमा सामान्य सुधार भएको तर चिकित्सकले निको हुन अझै ५ महिना लाग्ने बताएको उल्लेख गरेकी छन् । 'अहिले म राम्रोसँग बोल्न पनि सक्दिनँ अलि अलि चल्न सक्ने भएको छु । यसको सबै उपचार भारतकी डा. अञ्जीर कुमारले गर्दै हुनुहुन्छ । म पूर्ण रुपमा निको हुन अझै समय लाग्छ, ५ महिना भनेको छ ।'

अमेरिकाबाट मेयरलाई बारबार फोन गर्दा केही प्रतिक्रिया नआएको गुनासो पनि उनले गरेकी छन् ।
उपप्रमुखको फेसबुक स्टाटस



प्रकाशित : माघ १२, २०७६ ११:१७
पूरा पढ्नुहोस्
प्रतिक्रिया
पठाउनुहोस्
×