दामन घटना छानबिन गर्न समिति गठन- समाचार - कान्तिपुर समाचार
कान्तिपुर वेबसाईट
AdvertisementAdvertisement

दामन घटना छानबिन गर्न समिति गठन

१५ दिनभित्र प्रतिवेदन बुझाउनुपर्ने 
कान्तिपुर संवाददाता

काठमाडौँ — मकवानपुरको दामनस्थित एभरेष्ट पानोरमा रिसोर्टमा निसासिएर मंगलबार मृत्यु भएका ८ भारतीय पर्यटकको घटनाबारे पर्यटन विभागले छानबिन गर्ने भएको छ ।

संस्कृति, पर्यटन तथा नागरिक उड्डयन मन्त्री योगेश भट्टराईका अनुसार पर्यटकको सुरक्षामा रिसोर्टका तर्फबाट कमीकजोरी भएको हो या होइन ? लगायतका विषयमा छानबिन हुनेछ । ‘दामनको घटना निकै गम्भीर छ,’ पर्यटनमन्त्री भट्टराइले कान्तिपुरसँगको कुराकानीमा भने, ‘एउटै कोठामा ८ जना किन सुताइए ? रिसोर्ट व्यवस्थापन वा अतिथि कसको कमीकमजोरी भएको हो ? कारबाही गर्नुपर्ने विषय भएमा कारबाही हुनेछ ।’


मन्त्रालयको निर्देशन अनुसार छानबिन समितिले यस घटनाको स्थलगत अध्ययन गरी १५ दिन्भित्र प्रतिवेदन बुझाउनुपर्ने छ ।


छानबिन समितिको नेतृत्व विभागको होटल शाखाका निर्देशक सुरेन्द्र थापालाई तोकिएको छ । यसमा स्वास्थ्य तथा जनसंख्या मन्त्रालय, होटल संघ नेपाल र पर्यटक प्रहरी प्रमुख (निरीक्षक) र होटल विभागकै शाखा अधिकृत तिलक रिजाल सदस्य छन् ।


यो पनि पढ्नुहोस्ः

दामनबाट उद्धार गरिएका ८ भारतीयको मृत्यु, मृतकमध्ये ४ नाबालक

हिटर बालेर सुतेकाहरू उठेनन्, किन एसी नराखेको ?

प्रकाशित : माघ ८, २०७६ १९:४५
प्रतिक्रिया
पठाउनुहोस्

नेकपा रसुवाका ५० कार्यकर्ताद्वारा पार्टी परित्याग

कान्तिपुर संवाददाता

रसुवा — नेकपा रसुवाका ५० जनाले पार्टी परित्या गरेका छन् । खेलकुद विकास समितिमा एकलौटी ढंगले नियुक्ति गरेको भन्दै नेकपा कार्यकर्ताले बुधबार पार्टी परित्याग गरेका हुन् ।

नेकपामा आबद्ध जिल्ला खेलकुद विकास समिति रसुवाका पूर्वअध्यक्ष तेम्पासिंगी तामाङ सहित ५० जनाले पार्टी परित्याग गरेका हुन् ।

खेलकुद विकास समितिमा सहमति बेगर नयाँ अध्यक्ष नियुक्त गरेको भन्दै तामाङ सहित ५० जनाले प्रेस विज्ञप्ति जारी गर्दै पार्टी परित्यागको घोषणा गरेका हुन् ।

तामाङलाई नै अध्यक्ष पदमा पुनर्बाहली गर्ने सहमति भएकोमा अन्तिममा आएर धोका दिएको प्रेस विज्ञप्तिमा उल्लेख छ । तामाङले २०७२ सालदेखि हालसम्म जिल्ला खेलकुद विकास समिति रसुवाको अध्यक्ष पदमा रहेर काम गरेका थिए ।

दावा तामाङ जिल्ला खेलकुद विकास समिति रसुवाको अध्यक्ष पदमा चयन भएका छन् । पूर्वअध्यक्ष तामाङ पार्टी कार्यसमिति सदस्य, २०६५ सालमा युवा संघ रसुवजाको अध्यक्ष, २०६७ सालमा युवा संघ नेपालको केन्द्रिय सदस्य तथा युवा संघ नेपालको पश्चिम वागमती सचिव भएका थिए । मागको सुनुवाइ नभए आन्दोलन गर्ने उनीहरूले चेतावनी दिएका छन् ।

प्रकाशित : माघ ८, २०७६ १९:३६
पूरा पढ्नुहोस्
प्रतिक्रिया
पठाउनुहोस्
×