नागढुंगा–नौबिसेमा १२ घन्टासम्म जाम, यात्रुलाई चरम सास्ती

तत्काल जाम खुलाउन संसदीय समितिको निर्देशन
विमल खतिवडा

काठमाडौँ — दसैं नजिकिदैं गर्दा राजधानी प्रवेश गर्ने र बाहिरिने प्रमुख सडकको नागढुंगा–नौबिसे खण्डमा यात्रुले आवागनममा सास्ती भोगिरहनु परेको छ । सडक जाम हुँदा उपचार नपाएर एम्बुलेन्समा चल्न नपाएर बिरामीको ज्यानसमेत गएको छ ।

ZenTravel

उपत्यका भित्रने र बाहिरिने सवारी साधन यही खण्डमा आएर १२ घन्टासम्म जाममा पर्ने गरेका छन् ।

लामो समयको जामले चरम सास्ती भोग्नु परेको गुनासो यात्रुहरूको छ । जब चाडबाड आए सडक मर्मत थालिँदा जाम हुन थालेको गुनासो यात्रुहरूको छ । बिहीबारभन्दा शुक्रबार कम जाम भएको महानगरी ट्राफिक प्रहरी महाशाखाका एसपी रवि पौडेलले दाबी गरेका छन् ।

गत वर्ष यही समयमा नागढुंगादेखि पिपलामोडसम्म सडक मर्मत गर्दा यात्रुले यस्तै चरम सास्ती खेप्नु परेको थियो । ठीक एक बर्षपछि त्यही समस्या दोहोरिएको छ । सडक विभागले सडक मर्मत गर्न थालेको दुइ साता हुँदै छ । तर अझै पूरा भएको छैन । विभागले भने सडक मर्मतले गर्दा जाम नभएको दाबी गरेको छ । आवागमन कम हुने रातिको १२ बजेदेखि ३ बजेसम्ममात्र सडक मर्मतको काम भइरहेको दाबी विभागको छ ।

‘नागढुंगा–नौबिसे खण्डमा एकदमै जाम भएको छ, बढी सवारी साधन गुड्ने यो सडकलाई बर्षेनी टालटुल गर्दै चलाउनु पर्ने बाध्यता छ,’ सडक विभागका उपमहानिर्देशक एवं प्रवक्ता शिवहरि सापकोटाले भने, ‘पानी पर्न थालेपछि मर्मतको काम भएको छैन, मर्मत गरिएको सडकसमेत पानीले बगाएको छ ।’

उनले सडक मर्मतका कारण नभई लरी (१८ चक्के सवारी साधन) बिग्रिएका कारण जाम भएको बताए । यो काठमाडौं भित्रने मुख्य नाका हो । यो खण्ड भएर दैनिक ८ हजारभन्दा बढी साना/ठूला सवारीसाधन ओहोर/दोहोर गर्छन । चाडबाडको समयमा यो संख्या दोब्बर हुन्छ । ‘क्षमता भन्दा बढी सामान बोकेर आउने सवारी साधनका कारण यो खण्डमा बढी जाम हुने गरेको छ,’ उनले भने, ‘अहिले भएकै त्यही हो, जाम घटाउनका लागि सरोकारवाला निकाय लागिपरेका छौं ।’ यो खण्ड समस्याको रूपमा देखा परेको छ ।

महानगरीय ट्राफिक प्रहरी महाशाखाका एसपी पौडेलका अनुसार बुधवार राती १८ चक्के लरी बिग्रँदा जाम भएको हो । ‘पानी परिरह्यो, त्यसलाई राती नै निकाल्न सक्ने अबस्था भएन’ उनले भने, ‘विहिवार विहान पानी कम भएपछि निकाल्यौं, यो निकाल्नासाथ फेरी ६ वटा गाडी बिग्रिँदा समस्या भयो ।’ विहिवार विहानदेखिको जामले गर्दा समस्या भएको हो । राजधानीबाट बाहिरिने सवारी साधनका लागि समस्या छैन । बाहिरबाट राजधानी भित्रिने सवारी आवागमन शुक्रवार राती अवेरसम्म सहज बनी सकेको छैन ।

‘बाहिरबाट आउँदा सडक उकालो छ, ठूला गाडी लाइनमा छन्, विस्तारै गुड्छन्’ उनले भने, ‘त्यसैले जाम भएको हो ।’ सडक मर्मतले समस्या नभई सवारी साधन बिग्रिएकै कारण जाम भएको उनले दाबी गरे । चाडबाडलाई लक्षित गर्दै शुक्रबारबाट प्रहरी निरिक्षकको कमाण्डमा १० जना ट्राफिक प्रहरी खटाइएको छ ।

‘प्रहरी टोली बढी जाम हुने नागढुंगा खण्ड हेर्नकै लागि खटाइएको हो’ उनले भने, ‘चारवटा मोटरसाइकल पनि पठाएका छौं, मोटरसाइकलमा २/२ जना बसेर सडक हेर्ने छन् ।’ तत्काल गाडी बिग्रिए २ वटा ४० टनसम्मका तौल भएका गाडीलाई उचालेर सडक छेउमा लगेर यातायात सुचारु गर्ने र्‍याकरसमेत परिचालन गरिएको छ ।

उनका अनुसार जाम हुन नदिन ओभरटेक गर्ने सवारी चालकलाई कारबाही गरिने छ । ओभरटेकले गर्दा समेत जाम हुने गरेको छ । ‘यति भएपछि केही सहज हुनेछ,’ उनले भने,‘ अहिले भएको जाम शुक्रवार राती अबेरसम्म हटाउने छौं ।’

यसैबीच प्रतिनिधी सभाको सार्वजनिक लेखा समितिले नागढुंगा–नौबिसे खण्डमा यात्रुले भोग्नु परेको समस्या समाधानप्रति तत्काल कदम चाल्न सरकारको ध्यानाकर्षण भएको जनाएको छ । ‘हामीले गृह र भौतिक पूर्वाधार तथा यातायात मन्त्रालयलाई शुक्रवार पत्र लेखेर पठाएका छौं’ समितिका सचिव रोजनाथ पाण्डेले भने, ‘तीन दिनभित्रमा लिखित जवाफ मागेका छौं ।’

‘चाडपर्वको समयमा नागढुंगा–नौबिसे सडक खण्डमा यात्रुको आवत/जावत बढी हुन्छ । यो सडक उपत्यका भित्रने र बाहिरिने लाइफलाइन हो,’ उनले भने, ‘जामले गर्दा एम्बुलेन्स पनि चल्न नपाएर बिरामीको मृत्यु भएको कुरा आएको छ, सडक खुलाउन र व्यवस्थित गर्नका लागि के योजना छ, मन्त्रालयले के गरिराखेको छ र किन यस्तो समस्या भइरहेको छ भनेर कारणसहित जवाफ मागेका हौं ।’

प्रकाशित : आश्विन १०, २०७६ १९:३९
ADVERTISEMENT
प्रतिक्रिया
पठाउनुहोस्

मनमोहक लाङटाङ

विमल खतिवडा

राजधानी काठमाडौंबाट नजिकको पर्यटकीय गन्तव्य हो लाङटाङ उपत्यका  । यस क्षेत्रको यात्राका लागि उपयुक्त मौसम यही नै हो  । अर्थात् दसैं छेका । फोटो र भिडियोको सौखिनहरूका लागि यो जति उपयुक्त समय अर्को नहोला । पुग्नलाई समस्या छैन । काठमाडौंबाट १७० किमिको स्याफ्रुबेंसीसम्म बस पाइन्छ । मौसम राम्रो भयो भने जिपमा थाङजिमसम्मै पुगिन्छ । बालाजु बसपार्कबाट यहाँसम्म पुग्न करिब आठ घण्टा लाग्छ ।

धेरैले स्याफ्रुबेंसीलाई पहिलो दिनको गन्तव्य बनाउँछन् । यहाँ बस्ने–खानेको समस्या हुन्न । लाङटाङका व्यवसायी तेम्बा लामा थाङजिममा बास बस्नु राम्रो मान्छन् । ‘थाङजिङको प्राकृतिक दृश्यले लोभ्याउँछ । गाउँ साह्रै रमाइलो छ’ उनले भने । लाङटाङ, गणेशलगायत हिमालहरूले मोहित बनाउँछ । तिब्बततर्फको हिमशृंखला लोभलाग्दा छन् । चिलिमे हाइड्रोपावर रहेको यस क्षेत्रमा पैदल घोडतबेला पुग्न सकिन्छ । त्यसको अर्को दिनमात्र लाङटाङ पुगिन्छ । लाङटाङ राष्ट्रिय निकुञ्ज नुवाकोट, सिन्धुपाल्चोक र रसुवा जिल्लामा फैलिएको छ । तामाङ र शेर्पा जातिको संस्कृतिलाई यहाँ नजिकबाट चिन्न सकिन्छ ।

‘राजधानीबाट सबभन्दा नजिक र छोटो दूरीको गन्तव्य भनेकै लाङटाङ हो, जहाँ हिमाल र हिमनदीले सबैको ध्यान तान्छ,’ पर्यटन व्यवसायी लामा भन्छन्, ‘एक दिनको गाडी र दुई दिनको पैदलबाट लाङटाङ पुगिन्छ ।’ महाभूकम्पले ध्वस्त बनाएर फेरि उठेको लाङटाङको बस्तीमा करिब १५ वटा होटल छन् । यसमा करिब ३ सय पर्यटक अटाउने उनले बताए । एक जनालाई दैनिक २ हजारदेखि २५ सय रुपैयाँ खर्चले पुग्छ ।

यहाँको दालभातको स्वादै बेग्लै लाग्छ । ढिँडो, शेर्पा सुप, लोकल आलुको स्वाद नयाँ लाग्न सक्छ । समुद्री सतहबाट ३,५०० मिटरको उचाइमा अवस्थित लाङटाङमा हिमनदी, झरना र आकर्षक बस्तीले यात्राको थकानलाई बिर्साइदिन्छ । लाङटाङबाट करिब तीन घण्टामा पुगिने ३,९८० मिटरस्थित क्यान्जिङ गुम्बाको महत्त्व र यहाँका बौद्ध कलाकृतिको बेग्लै महत्त्व छ । यहाँबाट दृश्यावलोकन गर्नुको अनुभव बिछट्टै हुने गर्छ । यहाँ पनि तामाङ जातिकै बाक्लो बस्ती छ ।

लाङटाङ क्षेत्र घुम्नलाई एक साता पर्याप्त हुन्छ । दसैंका बेला विदेशी पर्यटक धेरै हुन्छन् । धेरै यात्रु स्याफ्रुबेंसीबाटै हिँड्ने गर्छन् । यो क्षेत्र पद यात्राकै लागि चर्चित पनि हो । यस क्षेत्रको आम्दानीको मुख्य स्रोत पनि हो पर्यटन । लाङटाङ निकुञ्जमा चितुवा, हाब्रे (रेडपान्डा), कस्तूरी, मृग, हिमाली भालु, थार, घोरललगायत वन्यजन्तुसँगै विभिन्न प्रजातिका वनस्पति र चराचुरुंगी पाइन्छन् ।

अरु ५ गन्तव्य
कालिञ्चोक
दोलखास्थित कालिञ्चोकमा केबलकार चढ््दै गौरीशंकरसहितको हिमाली दृश्यलाई नजिकबाट हेर्न सकिन्छ ।
सौराहा
चितवन राष्ट्रिय निकुञ्जको एकसिंगे गैंडा, बाघ, गोही, चराचुरूंगी हेर्दै थारु संस्कृति बुझ्न र जंगल सफारीका लागि प्र्रसिद्ध क्षेत्र हो, सौराहा ।
चित्लाङ
मकवानपुरको चित्लाङ हाइकिङका लागि लोकप्रिय छ र यहाँ टेन्ट, होम स्टेमा रहेर स्थानीय र अर्ग्यानिक खानेकुराको स्वाद लिन सकिन्छ ।
भोटेकोसी
सिन्धुपाल्चोक जिल्लास्थित भोटेकोसी नदीको पुलमा बन्जी र स्वीङ गर्नु तथा र्‍याफ्टिङ, कायकिङ, कनोइङलगायत साहसिक पर्यटकका लागि राम्रो विकल्प हो, यो ।
सुकुटे
सिन्धुपाल्चोकस्थित सुनकोसी किनारको मनोरम दृश्य नियाल्ने यस क्षेत्रमा र्‍याफ्टिङ, कायकिङ तथा बिच भलिबल, फुटबल खेल्न सकिन्छ ।

bimalnews@gmail.com

प्रकाशित : आश्विन १०, २०७६ १२:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
×