पहिरोका कारण बाटो अवरुद्ध भएपछि उदयपुरको लिम्चुङबुङ र ताप्ली गाउँपालिकामा हेलिकप्टरबाट खाद्यान्न

देवनारायण साह, डिल्लीराम खतिवडा

(मोरङ) — प्रदेश १ सरकारले उदयपुरको लिम्चुङबुङ र ताप्ली गाउँपालिकामा हेलिकप्टरबाट बिहीबार खाद्यान्न पठाएको छ । प्रदेश विपद व्यवस्थापन कार्यकारी समितिको बुधबारको निर्णय अनुसार दुवै गाउँपालिकाका लागि चामल ८ हजार १० किलो, रहर दाल १ हजार ९ सय ९५ किलो, नुन ५ सय किलो र खाने तेल ५ सय लिटर पठाएको हो । 


नेपाली सेनाको हेलिकप्टरमा विराटनगर विमानस्थलबाट प्रदेश सरकारका आन्तरिक मामिला तथा कानुन मन्त्री हिक्मत कार्कीले खाद्यान्न पठाएको बताएका छन् ।
हेलिकप्टरमा एकपटकमा २ हजार १० किलो चामल, १ सय ८० किलो रहर दाल, १ सय २० किलो नुन र १ सय २० लिटर खानेतेल दुई पटक ताप्लीमा र दुई पटक लिम्चुङबुङमा ढुवानी गर्ने मन्त्री कार्कीले जानकारी दिए ।
लिम्चुङबुङ र ताप्लीमा खाद्यान्न संकट भएपछि प्रदेश विपद् व्यवस्थापन समितिले हेलिकोप्टरबाट खाद्यान्न ढुवानी गरी स्थानीयलाई राहत वितरण गर्न लागेको हो ।

लिम्चुङबुङ गाउँपालिकाका अध्यक्ष मेजरकुमार राईका अनुसार पहिरोका कारण गाउँपालिका जाने गाईघाट–लिम्चुङबुङ–हलेसी, कटारी–बेतेनी–इनामे–लिम्चुङबुङ र गाईघाट–फाक्सिङटार–लिम्चुङबुङ गरी ३ वटै सडक लगातारको वर्षाका कारण पहिरो गई क्षतिग्रस्त भएकाले खाद्यान्न संकट उत्पन्न भएको छ ।

उनले असार ३१ गते गाउँपालिकाले संकटग्रस्त घोषणा गरी खाद्यान्न आपुर्तिका लागि संघीय र प्रदेश सरकारलाई आग्रह गरेको बताए । उनले बर्षाले ३ सय घर पूर्णरुपमा क्षति पुगेको र ४ सय घर प्रभावित भएर ६ हजार बढी जनसंख्या प्रभावित भएको बताए ।

मन्त्री कार्कीले प्रदेशस्थित लिम्चुङबुङ र ताप्ली गाउँपालिकामा खाद्यान्न संकट उत्पन्न भएकोले संघीय सरकारको गृह मन्त्रालयले एकपटकका लागि खाद्यान्न आपूर्तिका लागि हेलिकप्टर उपलब्ध गराएको बताए । हेलिकप्टर उपलब्ध हुने भएपछि विपद व्यवस्थापनको बैठकले सात दिनका लागि खाद्यान्न राहत स्वरुप पठाएको उनले बताए ।

उनले क्षतिग्रस्त सडकहरुको मर्मत र ट्रयाक खोल्नका लागि प्राबिधिकहरुलाई निर्देशन दिइसकेकोले एक साताभित्र सडक सुचारु गर्ने गरी काम थालेको बताए ।

प्रकाशित : श्रावण ९, २०७६ १४:११
प्रतिक्रिया
पठाउनुहोस्

दोर्दीमा बाढी : भेटिएका चारैवटा शवको सनाखत, बेपत्ता ६ जनाको खोजी जारी, ८ जनाको उपचार हुँदै (अपडेट)

आश गुरुङ

लमजुङ — दोर्दीखोलामा बुधबार दिउँसो एक्कासी आएको बाढीले बगाउँदा मृत्यु भएका चारै जनाको सनाखत भएको प्रहरीले बताएको छ । बाढीले बगाएका २ जनाको शव दोर्दी गाउँपालिका–४, नौथर शेरामा भेटिएको थियो भने शेरा नजिकै एउटा र कीर्तिपुर बेंसीमा एउटा शव भेटिएको थियो।

उनीहरु बारा जिल्लाको जितपुर सिमरा उपमहानगरपालिकाका अन्दाजी ३५ वर्षीय सइद अन्सारी र पर्सा जिल्ला पोखरिया नगरपालिकाका अन्दाजी बर्ष ३० शिवधुन चौधरी रहेको प्रहरीले बताएको छ। शेराभन्दा माथि भेटिएकाको शव सप्तरी जिल्ला सप्तकोशी नगरपालिका–८ का अन्दाजी ५० वर्षीय भुवनेश्वर चौधरीको र कीर्तिपुर बेसीमा भेटिएका १ जना डडेल्धुराको आलिताल गाउँपालिका ६ का अन्दाजी ३५ वर्षीय रमेश बुढा रहेको जिल्ला प्रहरी कार्यालयका निरिक्षक बसन्त पाण्डेले बताए। उनीहरुको बेंसीसहरस्थित लमजुङ जिल्ला सामुदायिक अस्पतालमा पोष्टमार्टम भइरहेको छ।

दोर्दीखोलामा निर्माणाधिन २५ मेगावाटको माथिल्लो दोर्दी ‘ए’ जलविद्युत आयोजनाको हेडवर्क्समा डिसेन्डर बनाउँदै गरेका कामदारलाई दोर्दीको बाढीले बगाएको प्रहरीले बताएको छ। बगाएर ल्याएको शवलाई निर्माणस्थलबाट करिब ८ किलोमिटर तल नौथर शेरामा २ शव, ७ किलोमिटर तल शेरा नजिकै एउटा र ४ किलोमिटर तल कीर्तिपुर बेंसीमा एउटा शव भेटिएको थियो।

डीएसपी रबिन्द्रमान गुरुङका अनुसार बेपत्ता ६ जनाको खोजी भइरहेको छ। उद्धार गरिएका ८ घाइतेको लमजुङ जिल्ला सामुदायिक अस्पतालमा उपचार भइरहेको प्रहरीले बताएको छ। बेपत्ताको बिहानैदेखि नेपाली सेना, नेपाल प्रहरी, सशस्त्र प्रहरी, जलविद्युत आयोजना, जनप्रतिनिधि र स्थानीयले खोजी थालेका छन्।

दोर्दी गाउँपालिका अध्यक्ष ओमबहादुर गुरुङले बेपत्ताको खोजीखार्य भइरहेको बताए। माथिल्लो दोर्दी ‘ए’ जलविद्युत आयोजनाको प्रवर्द्धक टिबर्टी इनर्जी कम्पनीका संचालक राजेन्द्र वस्तीले बाढीले धनजनको क्षति पुर्‍याएको बताए। जलविद्युत आयोजनामा क्षति पुर्‍याएपनि पहिले उद्दार र खोजीमा लागेको उनले बताए।

दोर्दीखोलाको मुहानतिर पहिरो गएर थुनिन गई एक्कासी बाढी आएको हुनसक्ने अनुमान गरिएको छ। तर, यसको कारण यही हो भनेर पत्ता लगाउन नसकिएको प्रमुख जिल्ला अधिकारी डा. डिजन भट्टराईले बताए।

प्रकाशित : श्रावण ९, २०७६ १३:५५
पूरा पढ्नुहोस्
प्रतिक्रिया
पठाउनुहोस्