काठमाडौं–५ लाई मेडिकल केन्द्र बनाउने स्वतन्त्र उम्मेदवार कँडेलको प्रतिबद्धता

आसन्न आमनिर्वाचनमा ‘जोडी चप्पल’ चुनाव चिन्ह लिएर प्रतिस्पर्धामा रहेका कँडेलले प्रतिवद्धता पत्र सार्वजनिक गर्दै काठमाडौं- ५ मा रहेका प्रमुख अस्पतालहरूको स्तरोन्नती गरी औषधोपचारका लागि छिमेकी देशबाट विरामी भित्राउन सकिने जनाएका छन् । त्यसका साथै मेडिकल शिक्षाका लागि समेत विद्यार्थी आकर्षित गर्न सकिने उनको भनाइ छ ।

त्यस्तै, उनले टोखा–चण्डेश्वरी–बुढानिलकण्ठ र हाँडीगाँउलाई सम्पदा पर्यटनको प्रमुख गन्तव्यका रुपमा विकास गर्ने प्रतिद्धता पत्रमा उल्लेख गरेका छन् । त्यसका लागि टोखा तथा बुढानीलकण्ठका स्थानीयलाई नि:शुल्क पर्यटनसम्बन्धी तालिम दिने र व्यवस्थित होमस्टे निर्माणका लागि आर्थिक लगायतका सहयोग उपलब्ध गराउने कँडेलको प्रतिबद्धता छ । कँडेल एक दशकभन्दा लामो समयदेखि काठमाडौं-५ लाई आधार बनाएर विभिन्न व्यवसायमा संलग्न छन् ।

कँडेलले कृषि र पर्यटनमार्फत् उद्यमशीलता विकास गर्ने, प्रमुख सहरहरूमा स्ट्याण्डसहितको साइकल, बिद्युतीय बस र ट्राम संचालन गरी सार्वजनिक यातायात व्यवस्थापन गर्ने, प्रत्येक नागरिकलाई ६/६ महिनामा नि:शुल्क स्वास्थ्य परीक्षण तथा ७० वर्षमाथिका नागरिकको सम्पूर्ण उपचार नि:शुल्क गर्ने तथा आर्थिक सुधारका क्षेत्रमा विभिन्न योजना सहितका प्रतिवद्धता समेत व्यक्त गरेका छन् ।