पर्यटकीय गन्तव्य खोज्दै पदयात्रा- उपत्यका - कान्तिपुर समाचार

पर्यटकीय गन्तव्य खोज्दै पदयात्रा

कान्तिपुर संवाददाता

भक्तपुर — चाँगुनारायण नगरपालिकाले पर्यटकीय गन्तव्य खोज्दै ‘चाँगुनारायण पर्यटन वर्ष २०८२’ को तयारी थालेको छ । नगरप्रमुख जीवन खत्रीले आगामी दुई वर्षभित्र पर्यटकीय गन्तव्यको खोजी गरी भौतिक पूर्वाधार निर्माण गरेर पर्यटन वर्ष मनाउने बताएका छन् । मंगलबार ४३ औं विश्व पर्यटन दिवसको अवसरमा नगरपालिकाले नगर क्षेत्रभित्रको पर्यटकीय गन्तव्य खोजी गर्दै पदयात्रा आयोजना गरेको छ ।

यस अवसरमा संयोजक नगरप्रमुख खत्रीसहित प्रमुख कार्यकारी अधिकृत हिरामान सुवेदी, जनप्रतिनिधि, कर्मचारी, विभिन्न संघसंस्थाका प्रतिनिधिहरूले बाँसबारी, मणिकर्णिका, वाल्मिकेश्वर, सरस्वतीस्थान हुँदै कल्पेश्वरसम्म पदयात्रा गरेका छन् ।

नगरको मुख्य पर्यटकीय गन्तव्य विश्वसम्पदामा सूचीकृत चाँगुनारायण मन्दिर, नगरकोटसँगै धार्मिक पर्यटकीय गन्तव्यको रुपमा प्रर्वद्धन गर्न मणिकर्णिका, वाल्मिकेश्वर, सरस्वतीस्थान हुँदै कल्पेश्वर पदमार्गको रुपमा विकास गर्ने नगरप्रमुख खत्रीले बताए ।

‘आन्तरिक तथा बाह्य पर्यटकको लागि पर्यटकीय क्षेत्रको पहिचान तथा प्रर्वद्धन गर्न भौतिक पूर्वाधारको मर्मत तथा निर्माणमा विशेष योजना ल्याइनेछ,’ उनले भने, ‘पर्यटकीय क्षेत्रको सडक सुधार र विस्तार, शौचालय निर्माण, विश्रामस्थललगायत व्यवस्थापन गर्नेछौं ।’ नगरपालिकाले प्रदेश र संघीय सरकारको समन्वयमा पर्यटन क्षेत्र प्रर्वद्धन गर्ने लक्ष्य लिएको उनले बताए ।


यसैबीच, भक्तपुर नगरपालिकाले भक्तपुर प्रवेश गर्ने पर्यटकलाई लाखे प्याखं (नाच) प्रर्दशन गरेर स्वागत गरेको छ । पर्यटन दिवसको अवसरमा मंगलबार भक्तपुर दरबार क्षेत्रको खौमा ध्वाकामा विदेशी पर्यटकको पहिलो समूहलाई लाखे प्याखं प्रर्दशन, खादा, भादगाउँले टोपी, परम्परागत थैली र पुष्पगुच्छाद्वारा स्वागत गरेको नगरप्रमुख सुनिल प्रजापतिले बताए ।

भक्तपुर नगरपालिका र भक्तपुर पर्यटन विकास समिति, भक्तपुर टुर गाइड व्यवस्थापन समिति र पर्यटक प्रहरीले संयुक्त रुपमा भक्तपुर प्रवेश गर्ने पहिलो समूह जर्मनी, अष्ट्रिया र बुल्गेरियाका ४ जना पर्यटकहरूलाई लाखे प्याखंका साथ स्वागत गरेको छ ।

पर्यटक प्रवेश शुल्कबाटै भक्तपुर नगरपालिकाले सम्पदाहरूको संरक्षण गर्नुका साथै शिक्षा, स्वास्थ्य, सरसफाइ जस्ता जनताका आधारभूत आवश्यकता पूरा गर्दै आएको नगरप्रमुख प्रजापति बताउँछन् । कोभिड १९ का कारण लकडाउन हुँदा नराम्रो असर पुगेको पर्यटन क्षेत्र प्रर्वद्धनका लागि नगरपालिकाले पर्यटकको सेवामा आवश्यक स्थानीय पथप्रदर्शकहरूको तालिम, चिनियाँ, जापानीलगायत विदेशी भाषाहरूको प्रशिक्षण, ठाउँठाउँमा पर्यटक शौचालय र पर्यटक सूचना केन्द्रको व्यवस्था गर्दै आएको उनले बताए ।

विदेशी पर्यटकलाई स्वागत गर्दै नगरप्रमुख प्रजापतिले भक्तपुरलाई संसारकै हेर्न र घुम्नलायक सहरको रुपमा विकास गर्ने उद्देश्य लिएको बताए । ‘पर्यटकीय क्षेत्रहरूमा विशेष सरसफाइ, समय समयमा सांस्कृतिक विधाहरूको प्रतियोगिताको आयोजना गर्नुका साथै सांस्कृतिक गुरुहरूको सम्मान कार्यक्रम पनि गर्दै आएका छौं,’ उनले भने ।

प्रकाशित : आश्विन ११, २०७९ १८:२८
प्रतिक्रिया
पठाउनुहोस्

भिठामोडबाट नेपाल प्रवेश गर्ने भारतीय पर्यटकलाई खादा ओढाएर सम्मान

सुनिता बराल

महोत्तरी — मंगलबार परेको विश्व पर्यटन दिवसको अवसरमा महोत्तरीको प्रमुख नाका भिठामोडबाट नेपाल भित्रिएका भारतीय पर्यटकलाई खादा ओढाएर सम्मान गरिएको छ । जिल्लाका होटल व्यवसायी र पर्यटन प्रर्वद्धनमा काम गर्ने सरोकारवाला व्यक्तिले नेपाल प्रवेश गर्ने आगन्तुकलाई रातो टिका लगाएर खादा ओढाएर जिल्लामा प्रवेश गराएको होटल तथा पर्यटन व्यवसायी महासंघ महोत्तरीका अध्यक्ष सुदीप कार्कीले जानकारी दिए । 

पर्यटकलाई सम्मानसहित स्वागत गर्ने काम प्रदेशको पर्यटन मन्त्रालयको सहकार्य र होटल तथा पर्यटन व्यवसायी महासंघ मधेस प्रदेशको अगुवाइमा भएको महासंघका प्रदेश अध्यक्ष हिरा गौतमले जानकारी दिए । मधेस प्रदेशअन्तर्गत सबै जिल्लाका प्रमुख नाकाबाट नेपाल प्रवेश गर्ने पर्यटक,मठ मन्दिरमा दर्शन गर्न आएका आगन्तुक र एयरपोर्टबाट झरेर मधेसका जिल्ला अवलोकन गर्न आएका पर्यटकलाई ८ वटै जिल्लामा खादा ओढाएर सम्मान गरिएको गौतमले बताए ।

पर्यटन दिवसकै अवसरमा महोत्तरीका होटल व्यवसायीले ३ दिनसम्म पर्यटकलाई खान र बस्नमा १५ देखि २५ प्रतिशतसम्म छुटको समेत व्यवस्था गरी सहुलियतको सेवा उपलब्ध गराइएको अध्यक्ष कार्कीले बताए ।

प्रकाशित : आश्विन ११, २०७९ १८:२१
पूरा पढ्नुहोस्
प्रतिक्रिया
पठाउनुहोस्
×