नीति अनुसन्धान प्रतिष्ठानले मनायो चौथो वार्षिकोत्सव
काठमाडौँ — नीति अनुसन्धान प्रतिष्ठानले आइतबार चौथो वार्षिकोत्सव मनाएको छ । यसै अवसरमा प्रतिष्ठानले आफ्नो दोस्रो जनरल ‘नेपाल पब्लिक पोलिसी रिभ्यु’ पनि ल्याएको छ ।
प्रधानमन्त्री कार्यालयअन्तर्गत रहेको प्रतिष्ठानले हालसम्म ४३ वटा अनुसन्धान गरेको कार्यकारी अध्यक्ष विष्णुराज उप्रेतीले बताए । उनले त्यसमध्ये २२ वटा प्रकाशित भइसकेको र २१ ओटा प्रकाशन हुने क्रममा रहेको जानकारी दिए ।
कार्यक्रममा पूर्वप्रधानमन्त्री बाबुराम भट्टराईले थिंक ट्यांकहरुको भूमिका विषयमा नीति प्रवचन दिएका थिए । उनले आफ्नो अनुभवसमेत सुनाउँदै नेपालमा नीति निर्माणमा थिंक ट्यांकको भूमिका प्रभावकारी नभएको बताए । उनले थिंक ट्यांकको भूमिकालाई बढाउन जोड दिए ।
राष्ट्रिय योजना आयोगका पूर्वउपाध्यक्ष स्वर्णिम वाग्लेले अन्तर्राष्ट्रिय परिवेक्षमा थिंक ट्यांकको महत्व बारे जानकारी दिँदै नेपालमा पनि यसलाई प्रभावकारीरुपमा अघि बढाउनु पर्ने बताए ।
प्रकाशित : आश्विन ९, २०७९ १६:००