कामको प्रशंसासँगै महानगर सुधारको संकेत- उपत्यका - कान्तिपुर समाचार
कान्तिपुर वेबसाईट
AdvertisementAdvertisement
मेयर शाहका सय दिन

कामको प्रशंसासँगै महानगर सुधारको संकेत

गोविन्द पोखरेल

काठमाडौँ — काठमाडौं महानगरपालिकाका मेयर बालेन्द्र शाहले कार्यभार सम्हालेको सय दिन पूरा भएको छ । नगर कार्यपालिकाको पहिलो बैठक लाइभ गर्ने निर्णय गर्दै जेठ १६ गते बालेन्द्रले कार्यभार सम्हालेका थिए ।

कार्यभार सम्हाल्दै बालेन्द्रले काठमाडौंको फोहोरलाई दीर्घकालीन रुपमा व्यवस्थापन नगरेसम्म माला नलगाउने घोषणा गरेका थिए। र उनले हालसम्म कुनै पनि सार्वजनिक कार्यक्रममा माला र खादा लगाएका पनि छैनन् । जेठ १६ गते बोलाइएको पहिलो कार्यपालिका बैठक लाइभ गरियो । पहिलो कार्यपालिका बैठकमा मेयर र वडाध्यक्षहरुबीच सवाल–जवाफ भयो । बैठकले इन्फ्रास्ट्रक्चर एम्बुलेन्स, फोहोर मैला व्यवस्थापन समिति र कल सेन्टर सञ्चालन गर्ने निर्णय भयो ।

बालेन्द्रको ती निर्णयले निकै नै चर्चा भयो । टुटेफेटेका संरचना मर्मत गर्नका लागि इन्फ्रास्ट्रक्चर एम्बुलेन्समार्फत् गर्ने र कल सेन्टर मार्फत् नगरपालिकामा आउने गुनासो र समस्याहरु समाधान गर्ने निर्णय भयो । यस्तै, होटल तथा रेस्टुरेन्टका शौचालयलाई सार्वजनिक शौचालयको रुपमा प्रयोग गर्ने सम्बन्धमा पनि अर्को निर्णय भएको थियो । केही व्यवसायिक संस्थाहरुले सार्वजनिक शौचालयको रुपमा प्रयोग गर्न दिने निर्णय गरे पनि प्रभावकारी भने भएको छैन ।

चुनावी अभियानका क्रममा फोहोर व्यवस्थापनलाई प्राथमिकता राख्ने निर्णय गरेका मेयर बालेन्द्रले सिसडोलमा दशकौंदेखि हुँदै आएको अवैज्ञानिक फोहोर विसर्जन कार्यलाई कार्यभार सम्हालेको केही दिनभित्रै गरे । उपत्यकाको फोहोर विसर्जन हाल बन्चरेडाँडामा हुन थालेको छ ।

सिसडोलको पोस्ट क्लोजरको काम भइरहेको छ । बालेन्द्रले दशकौंदेखि सिसडोलबासीले भोग्दै आएका समस्यालाई सम्बोधन गर्ने प्रतिबद्धता व्यक्त गर्दै कामहरु पनि थालेका छन् ।

मेयरमा निर्वाचित भएको केही दिन पहिलो कार्यपालिका बैठकले गरेका निर्णयबारे चर्चा र स्याबासी पाएका बालेन्द्रले त्यसको केही दिनपछि उनको आलोचना हुन थाल्यो ।

सिसडोलका स्थानीयवासीको आन्दोलनका कारण फोहोर ढुवानी कार्य स्थगित भएपछि काठमाडौंका सडकमा फोहोरको डंगुर थुप्रिएको थियो । त्यही बेला भारी वर्षाका कारण मड्खु–सिसडोल सडकखण्ड बिग्रिएपछि फोहोर ढुवानी कार्य स्थगित भयो । जेठयता मात्रै उपत्यकाको फोहोर ३३ दिनसम्म सडकमा थुप्रियो ।

पटकपटकको छलफल र सहमतिपछि फोहोरको ढुवानी कार्य सुरु भएको छ । सडक निर्माणको ठेक्का पाएको शैलुङ कन्स्ट्रक्सनलाई सरकारले कालो सूचीमा राखेको छ । सडक विभागले मड्खु–सिसडोल सडक खण्ड निर्माणका लागि नयाँ ठेक्का खुलाउँदै फास्ट ट्रयाक मार्फत् काम गर्न आग्रह गरेको छ ।

काठमाडौं महानगरपालिकाले ल्याएको नीति तथा कार्यक्रम पनि चर्चामा रह्यो । बालेन्द्रको अगुवाइमा ल्याइएका नीति तथा कार्यक्रम पनि सकरात्मक छन् । ‘सांस्कृतिक सहर, समृद्ध महानगर’को नारा दिएरले ल्याइएको बजेट तथा कार्यक्रम ल्याइएको छ । उनले ल्याएका नीतिमा महानगर क्षेत्रका हिटी, मठमन्दिर र ऐतिहासिक तथा पुरातात्विक सम्पदाहरुको संरक्षण र सम्वर्द्धन गर्ने उनको योजना छ ।

महानगर उज्यालो कार्यक्रम, डबलीहरुको पुनर्स्थापना र एमपी थिएटर निर्माण, सामुदायिक विद्यालयहरुको भौतिक पूर्वाधारमा गुणात्मक सुधार, फोहोरबाट ऊर्जा उत्पादन गर्ने योजना, सवारी साधनमा जीपीएस जडान, परम्परागत फाल्चा निर्माण, विपद् जोखिम नक्सांकन, घरघरमा गएर स्वास्थ्य परीक्षण गर्ने नीति ल्याइएका छन् ।

यस्तै, महानगरले आविष्कार केन्द्र स्थापना गर्ने, सहरी स्वास्थ्य क्लिनकलाई सहरी स्वास्थ्य प्रवर्द्धन केन्द्रमा स्तारोन्नति गर्ने, बाजा संग्रहालयको स्थापना, अनुसन्धान तथा विकास कार्यक्रमहरु उनले समेटेका छन् ।

बालेन्द्रले महानगर सुधार्नका लागि पछिल्लो प्रयास हो ‘अनधिकृत संरचना हटाउने अभियान’ । अभियान थाल्नुअघि उनले धनपति सापकोटालाई नगर प्रहरी प्रमुखबाट हटाएर उनको ठाउँमा राजुनाथ पाण्डेलाई ल्याए । महानगर क्षेत्रभित्र निर्माण भएका अनधिकृत संरचना हटाउन नगर प्रहरीको भूमिका मुख्य हुने ठानेर नै बालेन्द्रले पाण्डेलाई ल्याए ।

एउटा प्रयोजनका लागि नक्सा पास गर्ने र अर्को प्रयोजनमा प्रयोग भइरहेको भवनबाट अनाधिकृत संरचना हटाउनका लागि उनी आफैं कस्सिए । बानेश्वरबाट सुरु भएको अभियान अहिले पनि जारी छ । बेसमेन्ट पार्किङका लागि नक्सा पास गर्ने र उक्त ठाउँमा रेस्टुरेन्ट, होटल तथा अन्य व्यवसाय सञ्चालन भएपछि बालेन्द्र एक्सनमा उत्रिए । ३५ दिने सूचना दिदा पनि अटेर गरेको भन्दै उनी आफैं फिल्डमा खटिएर त्यस्ता अनाधिकृत संरचना हटाउन निर्देशन दिए ।

त्यस्ता ठाउँमा व्यवसाय सञ्चालन गर्ने व्यवसायीहरुले उनको शैलीललाई विरोध गरेपछि आम सर्वसाधरणको सहयोग बालेन्द्रलाई बन्यो । अनधिकृत रुपमा त्यस्ता ठाउँमा व्यवसाय सञ्चालन गर्न दिने घरबेटी नै मुख्य दोषी भएकाले क्षतिपूर्ति पनि उनीहरुले दिनुपर्ने महानगरले जनाएको छ । बेसेमन्टमा पार्किङ हुन थालेपछि सवारी आगमन पनि सहज हुने अनुमान छ ।

यही बीचमा काठमाडौं महानगरले जिल्ला अदालतलाई नक्सा पासको विवरण पठाउन भन्दै पत्र लेख्यो, राहदानी विभागको बेसमेन्टमा पार्किङ गर्न गरेको निर्देशन, त्रिपुरेश्वरस्थित वर्ल्ड ट्रेड सेन्टर अगाडि राखिएको स्किृन हटाउन निर्देशन दियो । महानगरले बेसमेन्टमा सञ्चालन गरिएका बैंक पनि हटाउन भन्दै एक्सनमा उत्रिएको छ । अहिले यो अभियान जारी रोखेको छ ।

बालेन्द्रको महानगर सुधार योजनामा सर्वसाधरण र स्थानीयले पनि साथ दिएका छन् । अनधिृकत संरचना हटाउनुअघि उनले फुटपाथमा रात्रिकालीन पसल राख्नेहरुलाई हटाउँदै व्यवस्थित गरेका छन् । बानेश्वरमा स्थानीयवासीको सहयोगमा उनले रात्रिकालीन फुटपाथ व्यवसाय हटाएका छन् । यस्तै, कोटेश्वरलगायत अन्य मुख्य सहरी क्षेत्रमा लाग्ने फुटपाथ व्यवसाय हटाइएका छन् । तीनलाई एकीकृत रुपमा फुटपाथ बाहेकका अन्य ठाउँमा राखिएको छ । फराकिलो फुटपाथ बनाउने, फुटपाथ तथा लेन अनुसाशन पनि कायम राख्ने अभियानमा बालेन्द्र छन् ।

अनाधिकृत संरचना हटाउने अभियान चलिरहँदा बालेन्द्र कर नतिर्ने व्यवासयीहरुप्रति आक्रामक भएका छन् । यस्तै, उनले महानगरलाई कर नबुझाउने सार्वजनिक संस्थानलाई पनि कारबाही गर्ने तयारी थालेका छन् । वर्षौंदेखि व्यवसाय, मनारेञ्जन कर नबुझाएको भन्दै उनले काठमाडौं फन पार्कलाई २४ घन्टे अल्टिमेटम दिँदै पत्र पठाउन लगाए । पार्कले पत्र पठाएको भोलिपल्टै महानगरलाई मनोरञ्जन र व्यवसाय कर २० लाख रुपैयाँ बुझायो ।

जग्गा भाडामा लगाएको समाज कल्याण परिषद्लाई पनि पत्र लेखेर बहाल कर बुझाउन महानगरले भनेको छ । यस्तै, सम्पत्ति कर नबुझाउने सार्वजनिक संस्थानहरुलाई पनि पत्र लेखेको छ । कर नबुझाउने सबैलाई कारबाही गर्ने महानगरको तयारी छ ।

नीति तथा कार्यक्रममै टेकेर बालेन्द्रले केही दिनअघि राष्ट्रिय अविष्कार केन्द्रका प्रमुख महावीर पुनलाई भेट्दै महानगरमा पनि अविष्कार केन्द्र खोल्ने कार्यक्रम सुनाए । पुनले पनि महानगरलाई सहयोगगर्ने प्रतिबद्धता व्यक्त गरेका छन् ।

यस्तै, हरेक वडामा विशेषज्ञ चिकित्सक राख्ने, खाद्य अधिकृत खटाउनेजस्ता निर्णय सुधारका प्रयासहरु देखिएका छन् । बालेन्द्रको कार्यकालको सय दिन पूरा गर्दा सकारात्मक परिवर्तनसँगै महानगर सुधार हुने आसा देखिएको छ । सुधारका काम गर्दै केही सकारात्मक छाप छाड्न सफल देखिएका बालेन्द्रले साँघुरो फुटपाथमा ट्रि–गार्डसहित लाखौं खर्च गरेर रोपिएका बिरुवा सम्बन्धमा छुट्टै नीति बनाउनुपर्ने देखिएको छ । ४ फिटको फुटापथमा त्यसरी बिरुवा राख्दा पैदलयात्रीलाई असहज भएको छ । यस्तै, वृक्षारोपण गर्दा पनि रैथाने बिरुवाभन्दा अन्य प्रजातिमा जोड दिइएको भन्दै आलोचना भइरहेको छ । टुकुचा खोला अतिक्रमण कसरी हटाउँछन् भन्ने आम चासोको विषय पनि बनेको छ ।

प्रकाशित : भाद्र १८, २०७९ २०:१३
प्रतिक्रिया
पठाउनुहोस्

समानुपातिकमा मन छैन, गठबन्धनमा भर छैन

कुलचन्द्र न्यौपाने

काठमाडौँ — ०७४ को निर्वाचनमा समानुपातिकतर्फको सूचीमा एक नम्बरमा नाम राख्दा नमानेर चुनावी मैदानमा होमिएका कांग्रेस नेता कृष्णप्रसाद सिटौलालाई यसपटक के गर्नुहुन्छ भनेर प्रश्न गर्दा उनको प्रष्ट जवाफ थियो, ‘म समानुपातिकमा बस्दिनँ ।’ प्रत्यक्षतर्फ नै प्रतिस्पर्धा गर्न चाहनु भएको हो ? भन्ने पुरक प्रश्नमा भने उनले प्रष्ट जवाफ दिएनन् । तर, उनको अभिव्यक्ति र आफ्नो निर्वाचन क्षेत्रमा बढाइरहेको गतिविधिले भने चुनावी मैदानबाट पछि नहट्ने प्रष्ट संकेत गर्छ ।

जिल्लाबाट प्रत्यक्षमा नै उनको नाम पनि सिफारिस भएको छ । औपचारिक रुपमा घोषणा गर्नुअघि सिटौलाले सत्ता गठबन्धनको चुनावी तालमेलको निर्णय, एमाले र राप्रपाबीचको सम्भावित समीकरणलगायत राजनीतिक दृश्यलाई नियालिरहेका छन् ।

‘चुनावी क्षेत्र छाड्दा भागेको भन्ठान्छन् । कि त म सक्रिय राजनीतिबाटै अलग हुन्छु । होइन भने चुनावी क्षेत्र छाड्ने कुरा हुन्न’ गृहजिल्लामा आफू निकट नेताहरूसँग भने उनले यसो भन्दै आएका छन् ।

संविधान मस्यौदा समितिका संयोजकसमेत रहेका सिटौला प्रत्यक्षतर्फ चुनाव लडेका र पार्टीको केन्द्रीय तहको नेतृत्वमा रहेको नेता सिद्धान्ततः समानुपातिकमा बस्न नहुनेमा जोड दिन्छन् ।

‘चुनाव लड्ने क्षमता नभएको, शारीरिक रुपमा अशक्त र संसदमा ल्याउन अन्त्यन्तै जरुरी भएका व्यक्तिलाई समानुपातिकमा राख्ने हो,’ उनले भने, ‘हामी जस्ता नेतृत्व तहमा रहेका व्यक्ति समानुपातिकमा बस्ने होइन, अघिल्लो पटक त्यही भएर चुनावी प्रतिस्पर्धामा गएको हुँ ।’

चतुर राजनीतिज्ञका रुपमा चिनिने सिटौलालाई चुनाव जिते पनि प्रधानमन्त्री बन्छु भन्ने विश्वास त छैन । तर, उनी निकट नेताहरूका अनुसार मौका परे राष्ट्रपति हुन सकिन्छ कि भन्ने आश उनमा जीवित छ । त्यसका लागि पनि सक्रिय राजनीति नत्याग्ने उनको चाहना हो । कुन व्यक्तिलाई अघि सार्दा राष्ट्रिय राजनीति र पार्टीभित्रको आन्तरिक समीकरणमा लाभ पुग्छ भन्ने हिसाब गरेरै नेतृत्वले उम्मेदवार छनोट गर्छन् ।

‘गिरिजाप्रसाद कोइरालाको छत्रछायामा राजनीतिक उचाई बढाएका सिटौलाले नेतृत्वको त्यस्तो चरित्र नबुझ्नै कुरै भएन,’ उनी निकट एक नेताले भने,‘राष्ट्रपति बन्न नसक्दा पनि सरकारमा गएर राष्ट्रिय राजनीतिको मियो बन्ने आकांक्षा अझै मरेको छैन ।’

संसदीय राजनीतिमा सिटौलाको प्रवेश निरन्तर छैन । ०४८ सालदेखि यता एक उपनिर्वाचनसहित उनले ७ वटा चुनावमा प्रतिस्पर्धा गरेका छन् । जसमा तीनवटामा मात्रै सफलता पाएका छन । ०४८, ०५१, ०६४ र ०७४ मा उनी पराजित भए । ०४८ सालमा सिटौलालाई चुनाव हराएर सांसद बनेका एमालेका द्रोणप्रसाद आचार्यको निधनपछि ०५० मा भएको उपनिर्वाचनमा पहिलोपल्ट उनले चुनाव जितेका हुन । त्यसबेलादेखि नै सिटौलाको संसदीय राजनीतिक यात्रा सुरु भएको हो । तर राष्ट्रिय राजनीतिमा उनको उचाइ भने ०६२/०६३ को जनआन्दोलपछि माओवादीलाई शान्ति प्रक्रियामा प्रवेश गराउने भूमिकाबाट सुरु भएको हो ।

तत्कालीन सभापति सुशील कोइरालाको निधनपछि पार्टीभित्र तेस्रो समूहको नेतृत्व गर्दै आएका सिटौला १४ औं महाधिवेशनमा आफू केन्द्रीय सदस्यमा सीमित भएर युवा नेता प्रदीप पौडेललाई महामन्त्रीमा अघि सारेका थिए । सफलता नमिलेपछि राष्ट्रिय राजनीतिको दृश्यमै नदेखिएका सिटौला पछिल्लोपटक सत्ता गठबन्धनको तर्फबाट निर्वाचन क्षेत्र बाँडफाँडको कार्यदल संयोजक बनेका छन् ।

यसपटकको निर्वाचन पनि उनका लागि जोखिममुक्त भने देखिँदैन । सत्ता गठबन्धन हुँदा केही हजार मत जोडिने भए पनि एमाले र राप्रपाबीचको सम्भावित समीकरणले उनलाई तर्साइरहेको छ । ०७४ मा झापा जिल्लामा एमाले र राजेन्द्र लिङ्देनबीच समीकरण बनेको थियो । त्यतिबेला साढे १३ हजार मतान्तरबाट हारेका सिटौलालाई यसपटक राप्रपा अध्यक्ष नै भएपछि झनै चुनौती थपिएको छ । झापाका मुख्य राजनीतिक शक्ति नै एमाले, कांग्रेस र राप्रपा हुन् । माओवादीसहित अन्य दलको प्रभाव निकै कम छ । सत्ता गठबन्धनमा रहेका कांग्रेस बाहेकक दलले ०७९ को स्थानीय तहमा पाएको मत जम्माजम्मी यस क्षेत्रमा ६ हजार जति छ । त्यति जोडिँदा पनि एमाले र राप्रपाले पाएको मत धेरै बढी छ ।

लिङ्देनलाई जिताउन पूर्वराजा ज्ञानेन्द्रसमेत सक्रिय हुनसक्ने भय सिटौलामा देखिन्छ । दमकलाई पूर्वराजा ज्ञानेन्द्रको दोस्रो घरकै रुपमा लिइन्छ, जहाँ उनको ठूलो चियाबगान छ । त्यही बगानमा बस्ने र पूर्वराजा ज्ञानेन्द्रले राप्रपाका स्थानीय नेताहरूसँग भेटघाट गर्ने गर्छन् । हिमानी ट्रष्टको गतिविधि पनि त्यहीँबाट सञ्चालन हुन्छ । गणतन्त्र घोषणापछि नै पूर्वराजा ज्ञानेन्द्रले आफूमाथि ‘इगो’ राख्ने गरेको बुझाइ सिटौलामा छ । उनी राजगद्दीबाट बिदाइ गर्ने क्रममा गृहमन्त्रीको हैसियतमा सिटौला नै त्यसको जानकारी गराउन दरबार पुगेका थिए ।

एमाले र राप्रपाबीच समीकरण बन्न सकेन भने सिटौलाका लागि केही सहज हुने देखिन्छ । एमाले अध्यक्ष केपी शर्मा ओलीले केही समयअघिदेखि नै उक्त क्षेत्रबाट व्यवसायी दुर्गा प्रसाईलाई उम्मेदवार बनाउने बचन दिँदै आएका छन् । उक्त कुरा प्रसाई स्वयंले सिटौलालाई केही महिनाअघि सुनाएको कांग्रेस नेताहरू बताउँछन् । सिटौला र प्रसाईबीच मामा भान्जाको सम्बन्ध समेत छ । ‘मामा मलाई हजुर बा (ओली)ले तपाईँकै क्षेत्रबाट चुनाव लड्न भन्नु भएको छ । मैले यो कुराको जानकारी गराएँ,’ भनेर प्रसाईले टेलिफोनबाटै सिटौलालाई जानकारी गराएका थिए ।

त्यस समयदेखि नै प्रसाई झापा–३ लाई नै आफ्नो निर्वाचन क्षेत्र मानेर तयारी गरिरहेका छन् । बिर्तामोडमा सञ्चालन गर्दै आएको बीएन्डसी अस्पताललाई मेडिकल कलेज बनाउन खोजेका प्रसाईले मतदाता आकर्षित गर्न ठूलो आर्थिक लगानी समेत गरिरहेको कांग्रेस नेताहरू दाबी गर्छन् । एमालेका प्रतिबद्ध मतदाताभन्दा चुनावमा निर्णायक हुने मतप्रति उनले लक्षित गरेर काम गरिरहेका छन् । गत असारमा दुबइका राजकुमार शेख महोम्मद माक्तुम जुमा अल माक्तुमलाई आफ्नै निर्वाचन क्षेत्रमा लैजानुको उद्देश्य पनि त्यहाँका मुस्लिम समुदायलाई आकर्षित गर्ने प्रसाईको मुख्य योजना रहेको चर्चा हुने गरेको छ । यस क्षेत्रमा मात्रै करिब ५ हजार मत मुश्लिम समुदायको छ ।

यस्तो छ वर्तमान अंकगणित

झापा–३ मा तीन गाउँपालिका, दुई नगरपालिकाका ९ वटा वडा पर्छन् । जसमध्ये ०७९ को स्थानीय तहको निर्वाचनमा बाह्रदशी गाउँपालिका एमाले, हल्दीबारी गाउँपालिका राप्रपा र कचनकवल गाउँपालिका कांग्रेसले जितेको छ । यसअघिको स्थानीय तहमा हल्दीबारी, कचनकवल गाउँपालिका राप्रपाले र बाह्रदशी गाउँपालिका कांग्रेसले जितेको थियो । गठबन्धनको बलमा कांग्रेसको स्थितिमा केही सुधार देखिन्छ ।

तर, कचनकवल जित्नुका पछि एमाले समेतको भोट जोडिएको छ । स्थानीय तहको निर्वाचनमा राप्रपाका उम्मेदवारलाई हराउन सत्ता गठबन्धनसँग एमाले समेत मिलेको थियो । कांग्रेस नेता सिटौलमा कचनकवलमा राप्रपाका विरुद्ध सबै दल एकजुट भएका थिए ।

०७९ को स्थानीय तहमा कांग्रेसले पाएको कुल मत २६ हजार ५ सय ९९ छ । अघिल्लो स्थानीय तहमा कांग्रेसले पाएको मत २० हजार २२ थियो । यसपटक कांग्रेसको करिब ६ हजार मत बढेको देखिन्छ । कतिपय वडामा गठबन्धनको मत कांग्रेसको मतमा जोडिएको छ भने केही वडामा कांग्रेसको मत पनि माओवादीतिर गएको छ ।

कांग्रेसले भद्रपुर नगरपालिकाको १,४ र ७ मा उम्मेदवारी दिएको थिएन भने माओवादीले पनि २, ३, ५, ६ र ८ वडामा उम्मेदवारी नदिई कांग्रेसलाई सघाएको थियो ।

यसै निर्वाचन क्षेत्रमा एमालेको मत २१ हजार ४ सय ६ छ । जसमा कचनकवल गाउँपालिकामा अध्यक्षको उम्मेदवार नभएकाले ७ वटामध्ये उसले दिएका ५ वडाको अध्यक्षको मत यसमा समावेश छ । दुई वटा वडामा उम्मेदवार नभएकाले त्यहाँको मत यसमा जोडिएको छैन । यो समेतगर्दा करिब डेढ हजार मत बढ्ने देखिन्छ । राप्रपाले २३ हजार ४ सय १६ मत ल्याएको छ । यसले ल्याएको मत एकल शक्तिमा आधारित छ ।

भद्रपुर नगरपालिकाको १ देखि ८ वटा वडा र विर्तामोड नगरपालिकाको १० नम्बर वडा यसै क्षेत्रमा पर्छ । गठबन्धनमा रहेका माओवादी, एकीकृत समाजवादी र जनता समाजवादीको ठूलो प्रभाव यहाँ देखिँदैन । त्यसैकारण धेरैजसो स्थानमा सत्ता गठबन्धन कांग्रेसतिरै थियो । कांग्रेसबाहेक गठबन्धनमा रहेका अन्य दलको मत जोड्दा करिब ५ हजारको हाराहारीमा रहेको देखिन्छ । एमाले र राप्रपाबीचको समीकरण भएमा सिटौला जोखिमा पर्ने देखिन्छ । एमाले र राप्रपाको मत सत्ता गठबन्धनले पाएको भन्दा करिव १३ हजार बढी देखिन्छ ।

०७४ मा यस क्षेत्रको कुल मतदाता संख्या १ लाख १४ हजार ८६ थियो । यसपटक केही हजार नयाँ मतदाता थपिन्छन् । त्यतिबेला लिङ्देनले ४४ हजार ६ सय १४ मत ल्याएर सिटौलालाई पराजित गरेका थिए । सिटौलाले ३१ हजार १ सय ७१ मत ल्याएका थिए । सिटौंला १३ हजार ४ सय ४३ मतले पछि परेका थिए । एमाले विभाजनको असर समेत झापामा खासै परेको छैन् । सत्ता गठबन्धन एकठाउँमा रहँदा पनि सिटौला जोखिम मुक्त देखिँदैनन् ।

प्रकाशित : भाद्र १८, २०७९ १९:५६
पूरा पढ्नुहोस्
प्रतिक्रिया
पठाउनुहोस्
×