काठमाडौंमा सार्वजनिक शौचालयका लागि ३३ संस्थाले गरे महानगरसँग सम्झौता- उपत्यका - कान्तिपुर समाचार

काठमाडौंमा सार्वजनिक शौचालयका लागि ३३ संस्थाले गरे महानगरसँग सम्झौता

कान्तिपुर संवाददाता

काठमाडौँ — काठमाडौं महानगरपालिकासँग आफूसँग भएका शौचालय उपयोगमा ल्याउनका लागि ३३ वटा व्यवसायिक संस्थाले सम्झौता गरेका छन् । रेस्टुरेन्ट, बैंक, विजनेस कम्प्लेक्ससहित ३3 वटा संस्थाका प्रतिनिधिहरुले सोमबार महानगरसँग सम्झौता गरेको महानगरले जनाएको छ ।

सार्वजनिक शौचालय सर्वसाधारण प्रयोगकर्तालाई चिन्न सजिलो हुनेगरी एउटै संकेत चिन्ह तयार पारिएको छ। गोलो रेखाभित्र नीलो पृष्ठभूमि, त्यसको माथिल्लो भागमा नेपाली भाषामा सेतो अक्षरले ‘सार्वजनिक शौचालय’ लेखिएको छ । उक्त लोगोको बिच भागमा सेतो रङ्मै महिला र पुरुषको चिन्ह रहेको छ । संकेत चिन्हको पुछारमा अंग्रेजी भाषामा ‘पब्लिक ट्वाइलेट’ लेखिएको छ ।

महानगरका मेयर बालेन्द्र शाह, उपप्रमुख सुनिता डंगोलको रोहबरमा उक्त सम्झौतामा महानगरकातर्फबाट निर्देशक नुरनिधि न्यौपानले हस्ताक्षार गरेका थिए । ।

५ वर्षसम्मका लागि ती स‌ंस्थाले सार्वजनिक प्रयोगका लागि शौचालयन उपलब्ध गराउने सम्झौतापत्रमा उल्लेख छ । शौचालयको सम्पूर्ण मर्मत सम्भार र सरसफाइ उनीहरुले नै गर्नेछन् । हरेक ४/४ महिनामा शौचालयको अनुगम र मूल्यांकन हुने सम्झौता पत्रमा उल्लेख छ । दुवै पक्षबाट एक/एक जना प्रतिनिधि मूल्यांकनका लागि खटिनेछन् ।

महानगरपालिकाले इच्छुक संस्थाहरुलाई आफूसँग भएको शौचालयक प्रयोग गर्न दिने सम्बन्धमा महानगरको निजी साझेदारी एकाईमा सम्पर्क गर्न भनेको थियो । त्यो बीचमा ३८ वटा संस्था सम्पर्कमा आएको महानगरले जनाएको छ । तीमध्ये केहीले आफैं शौचालय निर्माण गरिदिने प्रतिबद्धता जनाएका छन् ।

प्रकाशित : असार ७, २०७९ १७:२६
प्रतिक्रिया
पठाउनुहोस्

बिमा कम्पनीमा पहिलो मर्जर, एभरेस्ट र हिमालयन गाभिए

साउन १ देखि एकीकृत कारोबार सुरु हुने
कान्तिपुर संवाददाता

काठमाडौँ — एभरेस्ट इन्स्योरेन्स र हिमालयन जनरल इन्स्योरेन्स कम्पनीबीच मर्जर प्रक्रिया पूरा भएको छ । मंगलबार बिमा समितिले ती कम्पनीलाई मर्जरको अन्तिम स्वीकृति दिने निर्णय गरेपछि प्रक्रिया पूरा भएको हो । कम्पनीको सबै कागजातका आधारमा मंगलबारको निर्णय अनुसार दुई कम्पनीलाई मर्जरपछिको एकीकृत कारोबार सञ्चालनका लागि अन्तिम स्वीकृति प्रदान गरिएको बिमा समितिका अध्यक्ष सूर्यप्रसाद सिलवालले बताए । प्रक्रिया पूरा भएसँगै यो मर्जर बिमा क्षेत्रकै पहिलो हो ।


एभरेस्ट इन्स्योरेन्सको १ सय कित्ता सेयर बजार हिमालयन जनरल इस्योरेन्सको ८५ कित्ता (१:८५) अनुपातमा गाभिएका हुन् । मर्जरपछि बन्ने नयाँ कम्पनी ‘हिमालयन एभरेष्ट इन्स्योरेन्स लिमिटेड’को नाममा सञ्चालनमा आउने छ । कम्पनीले नयाँ आर्थिक वर्षको सुरु (साउन १ गते) देखि एकीकृत कारोबार सुरु गर्ने बताएको छ ।

मर्जरपछि नयाँ कम्पनीको सञ्चालक समिति अध्यक्षमा हिमालयन जनरल इस्योरेन्सको तर्फबाट हुने सहमति भएको छ । तीन जना सञ्चालक हिमालयबाट र तीन जना एभरेष्ट बैंकबाट प्रतिनिधित्व गर्नेछन् । यस्तै, प्रमुख कार्यकारी अधिकृतमा विजयबहादुर शाह र वरिष्ठ डेपुटी प्रमुख कार्यकारी अधिकृतमा कमल गौतम रहनेछन् । शाह अहिले हिमालयन जनरल इन्स्योरेन्स र गौतम एभरेष्ट इन्स्योरेन्सका प्रमुख कार्यकारी अधिकृत हुन् ।

मर्जरपछिको कम्पनीको पुँजी करिब २ अर्ब २३ करोड पुग्नेछ । बिमा समितिले एक वर्षभित्र कम्तीमा साढे २ अर्ब रुपैयाँ चुक्ता पुँजी पुर्‍याउन निर्देशन दिएको छ । बाँकी पुँजी तोकिएको समयभित्र पुर्‍याउने कम्पनीको दाबी छ । हाल एभरेष्ट इन्स्योरेन्सको चुक्ता पुँजी एक अर्ब २५ करोड र हिमालयनको १ अर्ब १७ करोड रुपैयाँ छ । मर्जरपछि ७५ वटा शाखामार्फत कम्पनीले बिमा सेवा प्रदान गर्नेछ ।

प्रकाशित : असार ७, २०७९ १७:२०
पूरा पढ्नुहोस्
प्रतिक्रिया
पठाउनुहोस्
×