पठाओ चालकलाई लुटपाट गरेको आरोपमा दुई पक्राउ- उपत्यका - कान्तिपुर समाचार

पठाओ चालकलाई लुटपाट गरेको आरोपमा दुई पक्राउ

कान्तिपुर संवाददाता

काठमाडौँ — 'पठाओ चालक'लाई लुटपाट गरेको आरोपमा चन्द्रागिरिबाट दुई जना पक्राउ परेका छन् । शनिबार राति कोटेश्वरबाट ललितपुरको धापाखेल जाँदै गरेका चालक प्रविन राईलाई कुटपिट गरी लुटपाट गर्ने यात्रु सिन्धुलीका सुमन तामाङ र उनका साथी खोटाङका मिनराज राईलाई प्रहरीले पक्राउ गरेको हो ।

प्रहरीका अनुसार राति करिब ११ बजे कोटेश्वरबाट धापाखेल लगिदिन भनी २१ वर्षीय तामाङले प्रदेश ०२-०१-००१ प ११६६ नम्बरको एनएस पल्सर मोटरसाइकल चालक २५ वर्षीय राईलाई धापाखेलस्थित आँखीदहमा पुर्‍याएका थिए ।

प्रहरीका अनुसार सोही स्थानमा पर्खिरहेका मिनराज र तामाङले चालक राईलाई कुटपिट गरी उनको मोटरसाइकल, ब्लु बुक, सामसुङ कम्पनीको मोबाइल लुटपाट गरेर फरार थिए ।

उनीहरूलाई महानगरीय प्रहरी वृत्त सातदोबाटो र महानगरीय प्रहरी परिसरको संयुक्त प्रहरी टोलीले काठमाडौं जिल्लाको बलम्बुस्थित चन्द्रागिरि रिकन्डिसन सोरुम नजिकैबाट चोरी भएका सामानसहित पक्राउ गरेको हो । तामाङ र राईमाथि अनुसन्धान भइरहेको महानगरी प्रहरी परिसर ललितपुरका प्रवक्ता सिद्धिविक्रम साहले जानकारी दिए ।

प्रकाशित : माघ ९, २०७८ १७:५२
प्रतिक्रिया
पठाउनुहोस्

आइतरबार रातिदेखि मौन अवधि सुरु, सामाजिक सञ्जालबाट पनि भोट माग्न नपाइने

कान्तिपुर संवाददाता

काठमाडौँ — राष्ट्रिय सभा निर्वाचनको मौन अवधि आइतबार रातिदेखि सुरु हुँदै छ । निर्वाचन आयोगले राष्ट्रिय सभा निर्वाचनको मौन अवधि आइतबार राति १२ बजेबाट सुरु हुने जानकारी दिएको छ ।

आयोगका प्रवक्ता शालिग्राम शर्मा पौडेलले मौन अवधिमा राष्ट्रिय सभा निर्वाचनका उम्मेदवारहरूले सामाजिक सञ्जालबाट समेत प्रचार प्रसार गर्न नहुने बताएका छन् । आइतबार एक विज्ञप्ति जारी गर्दै आयोगले 'यस अवधिमा निर्वाचन प्रचार प्रसार गर्न र मत माग्न नहुने मौन अवधि सुरु हुनुभन्दा अगाडि मतदान केन्द्रको ३०० मिटर वरिपरी राखिएका आआफ्ना निर्वाचन चिह्न तथा प्रचार प्रसार सामग्री हटाइएको हुनुपर्ने' भनेको छ ।

आयोगले सामाजिक सञ्जालबाट पनि भोट माग्नु आचारसंहिता विपरीत हुने उल्लेख गरेको छ । 'एसएमएस, फेसबुक भाइबरजस्ता विद्युतीय माध्यमद्वारा प्रयोग गरिने सामाजिक सञ्जालमार्फत समेत मत माग्न र निर्वाचन प्रचार प्रसार गर्न नहुने, उम्मेदवार वा राजनीतिक दलको प्रचार प्रसार हुने गरी कुनै समाचार वा सूचना प्रकाशन वा प्रसारण गर्न नहुने' आयोगले जनाएको छ ।

आयोगले मतदाता पहिचान गर्न पनि निर्वाचन आधिकृतहरूलाई भनेको छ । राष्ट्रिय सभा निर्वाचनमा स्थानीय तहका अध्यक्ष र उपाध्यक्ष प्रमुख र उपप्रमुख तथा प्रदेशसभा सदस्यहरूले मतदान गर्ने व्यवस्था छ ।

राष्ट्रिय सभाका १९ सिटका लागि माघ १२ गते मतदान हुँदैछ । राष्ट्रिय सभा निर्वाचनमा ४३ जना उम्मेदवार रहेको आयोगले जानकारी दिएको छ ।

प्रकाशित : माघ ९, २०७८ १७:४४
पूरा पढ्नुहोस्
प्रतिक्रिया
पठाउनुहोस्
×