फेकामा नयाँ कार्यसमिति निर्विरोध- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

फेकामा नयाँ कार्यसमिति निर्विरोध

कान्तिपुर संवाददाता

काठमाडौँ — फेयर एजुकेसनल कम्पिटिटर्स एसोसिएसन (फेका) मा नयाँ कार्यसमिति निर्विरोध चयन भएको छ । चितवनको सौराहमा पुस २५ र २६ गते भएको नवौं महाअधिवेशनले श्रीराम दाहालको अध्यक्षतामा ७ सदस्यीय कार्यसमिति चयन गरेको हो । 

अधिवेशनले उपाध्यक्षमा विनोद चुडाल, सचिवमा किरण न्यौपाने, कोषाध्यक्षमा सुशील प्रसाईं, सहसचिवमा दिपेन्द्र श्रेष्ठ चयन गरेको छ । यसैगरी सदस्यद्वयमा धिरजजंग थापा र दीपेन अधिकारी चयन भएका छन् ।

कागेश्वरी-मनोहरा नगरपालिकाका नगर प्रुमख कृष्णहरि थापाले महाधिवेशन उद्घाटन गर्दै अभिभावकहरु जुन स्थानीय तहमा बस्ने हो त्यही स्थानीय तहभित्रको विद्यालयमा आफ्ना बालबालिकालाई पढाउनुपर्ने गरी नीति ल्याउन लागिएको बताए ।

उनले काठमाडौं उपत्यकाका अभिभावकले राम्रो विद्यालयको खोजीमा आफ्ना बालबालिकालाई बसमा राखेर धेरै टाढा पठाएकाले पढाइको गुणस्तर बढ्न नसक्को बताए । उनले भने, 'राम्रो स्कुल खोज्दै बालबालिकालाई एक कुनाबाट अर्को कुनामा पठाइरहेका छौं । यसले बालबालिकालाई थकाई लाग्ने, पढ्न मन नलाग्ने त हुन्छ नै उपत्यकाको ट्राफिक पनि बढाइरहेको छ । यसको लागि हामी होमवर्क गर्दै छौं ।'


उनले कागेश्वरी मनोहरा नगरपालिकाले आफ्नो नगरभित्र बसोबास गर्ने अभिभावकलाई यही नगरभित्र गुणस्तरीय शिक्षा दिने गरी तयारी थालेको बताए । उनले भने, 'हामीले पूर्वाधारको विकाससँगै शिक्षाको विकास कसरी गर्न सकिन्छ भन्नेबारे लागिपरेका छौं ।'

संविधानले प्राथमिकदेखि माध्यामिक तहसम्मको शिक्षा सञ्चालन, नियमन र अनुगमन गर्ने अधिकार स्थानीय तहलाई दिएको भएपनि पूर्णरुपमा लागू हुन नसकेको उनले बताए । नगर प्रमुख थापाले आफ्नो नगरपालिकाका विद्यालयलाई नमुना विद्यालय बनाऔं भनेर लागेको बताए ।

यस्तै फेकाका निवर्तमान अध्यक्ष नवराज भट्टले आफ्नो संस्था शिक्षा प्रदान गर्न मात्रै उद्दत नभएर विद्यार्थीलाई अतिरिक्त क्रियाकलापमा पनि अब्बल बनाउनु रहेको बताए । उनले भने, 'हामी विद्यार्थीलाई पढाउने मात्रै नभएर फुटसल, ब्याटमिन्टन, हाजिरीजवाफ, वक्तृत्वकलालगायतका अतिरिक्त क्रियाकलापमा सहभागी गराएर अझै राम्रो जनशक्ति बनाउँछौं भन्ने हो छ । जसले विद्यार्थीलाई पढाइसँगै वृत्ति विकासमा टेवा पुगेको छ ।'

नवनिर्वाचित अध्यक्ष दाहालले आफू पढाइको गुणस्तरलाई मध्यनजर गरेर अघि बढ्ने बताए । उनले फेका भित्र रहेका विद्यालयलाई उपत्यकाका उत्कृष्ट शैक्षिक गन्तव्य बनाउन लागिपर्ने बताए । उनले भने, 'गुणस्तरीय अध्ययन र अध्यापन नै हाम्रो मुख्य लक्ष्य हो । हामी त्यही अनुसार नयाँ कार्यसमिति अघि बढ्ने छ ।' फेकामा सञ्चालनमा रहेका २५ वटा नीजि विद्यालय आवद्ध छन् ।


प्रकाशित : पुस २७, २०७८ ११:१२
प्रतिक्रिया
पठाउनुहोस्

चक्रबाट चञ्‍चला

लिंग परिवर्तनपछि अब उनको जोड नेपालले पनि समलिंगी विवाहलाई कानुनी मान्यता देओस् भन्ने छ 
पर्वत पोर्तेल

दमक — न्वारानको नाम चक्र साउदेन लिम्बू । आफैंले जुराएको नुमा लिम्बू ‘चञ्चला’ । पुरुषका रूपमा जन्मिएका चक्र लिंग परिवर्तनपछि चञ्चला बनिन् । चक्रबाट चञ्चलामा रूपान्तरण उनलाई आफैं कुनै फिल्मको कथाजस्तै लाग्छ । 

उनी मोरङ बबियाबिर्ताको किसान परिवारमा जन्मिए । दुई छोरीपछि जन्मिएको छोरो । लालनपालनमा ‘लाडप्यार’ थियो । तर, उमेर बढ्दै गएपछि स्वभावमा परिवर्तन हुन थाल्यो । छोरीहरूसँग मात्रै घुलमिल, उनीहरूकै लुगा, गरगहना, लिपस्टिक पाउडरप्रति रुचि । ‘सुरु सुरुमा त आफैं अचम्म पनि लाग्थ्यो,’ चञ्चलाले सुनाइन् ।

स्कुल पढ्दादेखि नै केटाहरूभन्दा फरक स्वभाव । केटी जस्तो हाउभाउका कारण स्कुले साथीले अपशब्द बोलेर खिसिट्युरी गर्थे । ‘छक्का हिँजडा भनेर गिज्याउँदा धेरै दुःख लाग्थ्यो,’ उनी सम्झिन्छिन् । अरूभन्दा फरक भएकामा दुःख त छँदैथ्यो, सँगै आफैंलाई कौतुहलता पनि थियो । कलेज पढ्न विराटनगर पुगेपछि त्यहाँ पनि अपशब्दका दुर्व्यवहार सामना गर्नुपर्‍यो ।

‘आत्महत्या गर्ने सोच पनि आयो तर कसोकसो सम्हालिएँ,’ उनले भनिन् । कलेज पढ्दै गर्दा सन् २००८ तिर लैंगिक र अल्पसंख्यकको अधिकारका क्षेत्रमा काम गर्ने एक संस्थासँग उनी जोडिइन् । त्यसको सम्पर्कपछि उनले बल्ल आफूलाई चिन्ने मौका पाइन् । त्यसयता उनी निरन्तर अल्पसंख्यकहरूको अधिकारका क्षेत्रमा क्रियाशील छिन् ।

सुरुमा तेस्रो लिंगीका रूपमा खुल्न गाह्रो थियो, संस्थासँगको सहकार्यले सघायो । पुरुष भएर वंश चलाउनुपर्छ भन्ने परिवार र समाजको सोचविरुद्ध उनले विद्रोह बोलिन् । ‘अहिले फर्किएर हेर्दा मैले कसरी त्यो आँट गरेछु भन्ने लाग्छ,’ चञ्चलाले विगत कोट्याइन्, ‘आँट नगरेको भए म चक्रकै रूपमा बाँच्नुको विकल्प थिएन ।’

हुँदाहुँदा उनमा पूर्ण रूपमै महिला हुने मोह भयो । अन्ततः सन् २०१४ मा थाइल्यान्ड पुगेर लिंग परिवर्तन गराइन् । त्यसपछि लगत्तै मोरङ जिल्ला प्रशासन कार्यालयबाट नुमा लिम्बू चञ्चलाको नामबाट नागरिकता पनि लिइन् । ‘पहिला नागरिकतामा नाम चक्र थियो,’ उनले भनिन्, ‘पछि नुमाका रूपमा नागरिकता लिएँ ।’ महिलाको नामबाट नागरिकता लिन सास्ती भोग्नुपरेको उनले सुनाइन् ।

२०६४ पुस ६ मा सर्वोच्च अदालतले ‘पहिचानका आधारमा तेस्रो लिंगीलाई नागरिकता दिनू’ भने पनि नागरिकता पाउन सजिलो नभएको उनको अनुभव छ । ‘छोराका रूपमा जन्मिएको मान्छे पछि छोरी पनि हुन सक्छ । उसले छोरीकै नामको नागरिकता पाउनुपर्छ भन्ने हाम्रो माग हो,’ उनी थप्छिन्, ‘नागरिकताको नाम सच्याउन पनि प्रशासनमा झन्झट छ ।’

झापाको दमकस्थित लिड नेपाल संस्थाकी हर्ताकर्ता २८ वर्षीया चञ्चलाले कानुनी अड्चनका कारण आफूखुसी बिहे गर्न पाएकी छैनन् । समलिंगी बिहेलाई अझै कानुनी मान्यता छैन । ‘समलिंगी बिहेका मुद्दा नेपालभन्दा पछि उठाउने देशहरूले कानुनी मान्यता पाइसक्दा पनि हामीले चाहिँ किन नपाउने ?,’ चञ्चलाको प्रश्न छ, ‘यत्रो वर्षदेखि लड्दा पनि हामीले न्याय नपाउने ?’

प्रकाशित : पुस २७, २०७८ ११:०६
पूरा पढ्नुहोस्
प्रतिक्रिया
पठाउनुहोस्
×