फाइनलमा अम्पायर धर्मसेना

एएफपी

लन्डन — श्रीलंकाका अम्पायर कुमार धर्मसेनाले इंग्ल्यान्ड र न्युजिल्यान्डबीच आइतबार लर्डसमा हुने विश्वकप क्रिकेटको फाइनल खेलाउने भएका छन्  । सेमिफाइनलमा इंग्ल्यान्डका ब्याट्सम्यान जेसन रोयलाई विवादास्पद आउट दिएर विवादमा तानिए पनि धर्मसेनालाई फाइनल खेलाउने अवसर पाएका हुन्  ।

सरेका ओपनर रोयको ८५ रन मदतमा इंग्ल्यान्डले बिहीबार सेमिफाइनलमा अस्ट्रेलियामाथि ८ विकेटको जित हात पारेको थियो । उनलाई लेगसाइडमा गएको बलमा धर्मसेनाले विकेट पछाडि क्याचआउट दिएका थिए ।

रोयले रिभ्यूका लागि अपिल गरेका थिए । इंग्ल्यान्डले एकमात्र रिभ्यू यसअघि नै गुमाइसकेको थियो । जबकि धर्मसेनाले रिभ्यूका लागि संकेत गरिरहँदा अस्ट्रेलियाली खेलाडीले श्रीलंकाली अम्पायरले गल्ती गरेको इशारा गरिरहेका थिए ।


रोयले भने आफूलाई आउट नभई वाइड दिनुपर्ने भनेर दुवै हात उठाइरहेका थिए । टिभी रिप्लेमा पनि बलले ब्याटमा नछोएको देखाइएको थियो । अम्पायरको निर्णयमा असन्तुष्टि जनाएकाले २८ वर्षे रोयलाई म्याच रेफ्री रन्जन मदुगलेले म्याच फीको ३० प्रतिशत जरिवाना लगाउनुका साथै २ अंक पनि काटेका छन् ।

खराब आचरणका लागि उनको विश्वकपमा ३ अंक काटिसकिएको छ । ४ अंक काटिँदा मात्र निलम्बनमा पर्ने हुनाले रोयले फाइनल खेल्न पाउने छन् ।


धर्मसेनासँगै फाइनलमा दक्षिण अफ्रिकाका मरैस इराम्मस अर्का अनफिल्ड अम्पायर हुनेछन् । उनी धर्मसेनासँगै इंग्ल्यान्ड र अस्ट्रेलियाबीचको सेमिफाइनलमा उभिएका थिए । अनुभवी श्रीलंकाली मदुगले म्याच रेफ्री हुनेछन् । अस्ट्रेलियाका रोड टकर थर्ड अम्पायरमा छन् ।

प्रकाशित : असार २८, २०७६ १७:१९
प्रतिक्रिया
पठाउनुहोस्

बेलिसले इंग्ल्यान्ड छाड्दै

एएफपी

लन्डन — इंग्ल्यान्डका मुख्य प्रशिक्षक ट्रेभर बेलिसले विश्वकप र एसेज शृंखलापछि टिम छाड्ने बताएका छन्  । सेप्टेम्बरको अन्त्ययता ५६ वर्षीय अस्ट्रेलियालीको अनुबन्ध सकिँदै छ  ।

‘एउटै पदमा ४–५ वर्ष बस्नु धेरै हो । टिमका लागि राम्रो या नराम्रो गरे पनि यो समय धेरै हो,’ उनले भने, ‘अब टिमले नयाँ प्रशिक्षक पाउनुपर्छ र उसले टिमलाई थप उचाइमा पुर्‍याउने छ ।’


इंग्ल्यान्डले आइतबार लर्ड्समा हुने फाइनलमा न्युजिल्यान्डको सामना गर्दै छ । त्यसमा टिमले कडा चुनौती सामना गर्नुपर्नेमा पनि बेलिस विश्वस्त छन् । उनले भने, ‘चार वर्षअगाडि विश्वकप इंग्ल्यान्डका लागि राम्रो रहेन । हामीले त्यसको समाप्तिमा सन् २०१९ को विश्वकपका लागि योजना बनाएका थियौं । यसले काम गरेकोमा खुसी र गर्व दुवै छ ।’


उनले इंग्ल्यान्ड टिम र खेलाडीको सपना पूरा हुने दिन आएको पनि बताए । ‘एजबास्टनमा खेलेपछि भएको टिम बैठकमा सबैले के अनुभव गरे भने हामीले खासमा केही पनि जितेका छैनौं । धेरैले उपाधिका लागि हामी नै बलियो छौं भनेका छन् । हामी यो दाबी पनि सुन्न चाहन्नौं । हामीलाई हाम्रै खेलमा केन्द्रित हुनुपर्छ,’ उनले भने ।


अस्ट्रेलियालाई सुरुमा ४९ ओभरमा २ सय २३ रनमा सीमित पारेपछि इंग्ल्यान्डका लागि प्रारम्भिक ब्याट्सम्यान जेसन रोयले ६५ बलमा ८५ रन बनाए । त्यसमा उनले ९ चौका र ५ छक्का प्रहार गरे । यस क्रममा उनले जोनी बेरिस्टोसँग पहिलो विकेटमा फेरि शतकीय साझेदारी गरे । बेलिसले फाइनलमा पनि जेसनको खेल उत्कृष्ट हुने अपेक्षा पोखे ।

प्रकाशित : असार २८, २०७६ १७:१७
पूरा पढ्नुहोस्
प्रतिक्रिया
पठाउनुहोस्