अस्ट्रेलिया सेमिफाइनलमा

एपी

लन्डन — इंग्ल्यान्डमाथि ६४ रनको सहज जित हात पारेपछि अस्ट्रेलिया मंगलबार विश्वकप क्रिकेटको सेमिफाइनल पुगेको छ । सात खेलमा छैटौं जित हात पार्दै अस्ट्रेलिया १० राष्ट्र सहभागी प्रतियोगिताको शीर्षस्थानमा उक्लिँदै नकआउट चरणमा प्रवेश गरेको हो । 

दाबेदार टोलीको रूपमा प्रतियोगिता सुरु गरेको इंग्ल्यान्डको यो लगातार दोस्रो हार हो । पछिल्लो खेलमा टोलीलाई श्रीलंकाले २० रनले स्तब्ध पारेको थियो । इंग्ल्यान्ड ८ अंकसहित चौथो स्थानमा छ र टोलीलाई बंगलादेशले एक अंकले पछ्याइरहेको छ । शीर्ष चार टोली सेमिफाइनल पुग्ने छन् ।

आरोन फिन्चको टोलीले टस गुमाए पनि पहिलो ब्याटिङ गर्दै निर्धारित ५० ओभरमा ७ विकेट गुमाई २ सय ८५ रन बनायो । फिन्च आफैंले १ सय रन बनाए । बेन स्टोक्सले ८९ रन बनाए पनि इंग्ल्यान्डले नियमित विकेट गुमाइरह्यो । टोली ४५ औं ओभरमा २ सय २१ रनमा अलआउट भयो ।

देब्रे हाते तीव्र बलरद्वय जेसन बेहरेन्ड्रोर्फ र मिचेल स्टार्कले घरेलु टोली इंग्ल्यान्डलाई ध्वस्त पारे । टोलीमा पुनः फिर्ता बोलाइएका जेसनले १० ओभरमा ४४ रन खर्चेर ५ विकेट लिए । स्टार्कले अर्को एक पटक उत्कृष्ट प्रर्दशन गर्नेक्रममा ८.४ ओभरमा १ मेडन राख्दै ४३ रन खर्चेर ४ विकेट लिए । चोटबाट अझै तंग्रिन नसकेका जेसन रोयको स्थानमा खेलिरहेका जेम्स भिन्सलाई इनिङ्सको दोस्रो बलमा बोल्ड गरी जेसनले उत्कृष्ट सुरुआत दिलाएका थिए ।

स्टार्क १९ विकेटसाथ जारी विश्वकपको सर्वाधिक विकेट लिने बलर सूचीमा अगाडि छन् । उनले नै स्टोक्सलाई सानदार योर्कर बलमा बोल्ड गरेपछि इंग्ल्यान्डको आशा सकिएको थियो । स्टोक्सले १ सय १५ बल खेल्दै ८ चौका र २ छक्का प्रहार गरे । इंग्ल्यान्डको २६–३ को स्थितिलाई स्टोक्सले जोनी बेरिस्टो (२७), जोस बटलर (२५) र क्रिस वोक्स (२६) सँग मिलेर तानेका थिए । स्टार्कले यसअघि जो रुटलाई एलबीडब्लू आउट गरेका थिए भने कप्तान इयान मोर्गनलाई क्याच गराए ।

इंग्ल्यान्डसँगको पछिल्ला ११ एकदिवसीय खेलमा इंग्ल्यान्ड १० मा पराजित भएको थियो । तर १९९२ को विश्वकपदेखि अस्ट्रेलियाले इंग्ल्यान्डमाथि निरन्तर जित हात पार्दै आएको छ ।

फिन्चले १५ रनमा जीवनदान पाएको पूरा फाइदा उठाए । उनले डेविड वार्नरसँग पहिलो विकेटमा २३ ओभरभित्र १ सय २३ रन जोडे । वार्नर ५३ रनमा आउट भए । ३६ औं ओभरमा आउट भएका फिन्चले १ सय १६ बल खेल्दै ११ चौका र २ छक्का प्रहार गरे । स्टिभ स्मिथले ३४ बलमा ३८ र एलेक्स केरीले २७ बलमा अविजित ३८ रन बनाए । इंग्ल्यान्डका बलरहरू पछि उत्कृष्ट पुनरागमन गर्दै उत्कृष्ट सुरुआत गरेको अस्ट्रेलियालाई ३ सय रनमुनि रोक्न सफल भए ।

स्कोर कार्ड
अस्ट्रेलिया
६४ रनले विजयी

अस्ट्रेलिया
५० ओभर २८५/७
आरोन फिन्च–१००
डेविड वार्नर–५३
स्टिभ स्मिथ ३८
एलेक्स केरी–३८८

क्रिस वोक्स २/४६

इंग्ल्यान्ड
४४.४ ओभर २२१/१०
बेन स्टोक्स–८९
जोनी बरिस्टो–२७
क्रिस वोक्स–२६

जेसन बेहरेन्डोर्फ ५/४४
मिचेल स्टार्क ४/४३

प्रकाशित : असार ११, २०७६ ०८:११
ADVERTISEMENT
प्रतिक्रिया
पठाउनुहोस्
ADVERTISEMENT

राबाडाले सिकेको पाठ

एएफपी

लन्डन — विश्वकपमा आफ्नो चुनौती समाप्त भएको पीडाबाट गुज्रिरहेको दक्षिण अफ्रिकी बलर कागिसो राबाडाले टिमको खराब प्रदर्शनबाट पाठ सिक्नुपर्ने बताएका छन् ।

फाफ डु प्लेसिसको टिम दुई खेल खेल्नु अगाडि नै लर्ड्समा पाकिस्तानको हातबाट पराजित भएपछि प्रतियोगिताबाट बाहिरिएको थियो । विश्वकप इतिहासमा दक्षिण अफ्रिका नकआउट चरण पुग्न असफल यो दोस्रोपल्ट मात्र हो ।

तीव्र गतिका बलर राबाडा टिमले बेहोरेको खराब प्रदर्शनबाट पनि सिक्ने धेरै अवसर हुने मान्छन् । उनले भने, ‘खेलमा केही यस्ता मोड पनि आए, जसमा हामी निकै भाग्यमानी रह्यौं । तर केहीमा हाम्रो प्रदर्शन निकै फितलो रह्यो । यी सबैमा पनि हामीले सिक्ने धेरै अवसर पाएका छौं । त्यसैले पनि हामी क्रिकेट खेल्छौं । क्रिकेटमा केही पनि सजिलो छैन । मैदानमा प्रवेश गरेर खेल्नु निकै कठिन छ । खेलमा खुसी पनि हुन्छ, दुःख पनि ।’

घर फर्कनु अगाडि दक्षिण अफ्रिकाले श्रीलंका र अस्ट्रेलियाको सामना गर्नेछ । दक्षिण अफ्रिकाको खराब प्रदर्शनलाई लिएर टिमका पुराना स्टार खेलाडी ज्याक कालिसले इंग्ल्यान्डबाट सिक्नुपर्ने बताएका छन् । कालिसका अनुसार चार वर्षअगाडि इंग्ल्यान्डको प्रदर्शन पनि खराब रहेपछि टिमले सही दिशा तय गर्न कठिन मिहिनेत गरेको थियो । त्यसैलाई इंगित गर्दै राबाडाले भने, ‘अबको लक्ष्य भनेको सकारात्मक रहने र राम्रो प्रदर्शन गरेर पुनरागमन गर्ने नै हो ।’

राबाडा आफैं पनि यसपल्टको विश्वकपमा सबैभन्दा निराशाजनक प्रदर्शन गर्ने खेलाडीमा रहेका छन् । उनले ५०.८३ को औसतमा ६ विकेटमात्र लिएका छन् । इन्डियन प्रिमियर लिगमा प्रभावशाली प्रदर्शन गरेयता उनले आफ्नो टिमका लागि विश्वकपमा त्यस्तै खेल दोहोर्‍याउन सकेनन् । यसलाई लिएर उनले भने, ‘आईपीएलमा मैले अपेक्षाअनुसार प्रदर्शन गर्न सकें तर विश्वकपमा मेरो प्रदर्शन त्यस्तो रहेन । मैले योभन्दा राम्रो प्रदर्शन गर्नुपर्ने थियो ।’

प्रकाशित : असार ११, २०७६ ०८:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×