सकिबको अलराउन्ड जादु

एपी

साउथह्याम्पटन — सकिब अल हसनले सानदार अलराउन्ड प्रदर्शन गर्दै सोमबार अफगानिस्तानमाथि ६२ रनको विजय दिलाएपछि बंगलादेशको विश्वकप क्रिकेटको सेमिफाइनल पुग्ने आशामा ठूलो बल मिलेको छ । 

सकिबले ५१ रन बनाउँदै बसालेको जगमा बंगलादेशले २६२–७ को स्कोर बनायो । यही प्रयासमा उनी विश्वकपको उच्च स्कोररमा अगाडि आए । त्यसपछि ३२ वर्षे सकिबले एकदिवसीयमा आफ्नो खेलजीवनको उत्कृष्ट बलिङ गर्नेक्रममा १० ओभरमा २९ रन खर्चेर ५ विकेट लिए ।

विश्वकपको एकै खेलमा अर्धशतक बनाउने र ५ विकेट लिने सकिब केवल दोस्रो खेलाडी हुन् । सन् २०११ को विश्वकपमा भारतका युवराज सिंहले आयरल्यान्डसँग यसअघि यो कीर्तिमान बनाएका थिए । एकै विश्वकपमा शतक बनाउने र ५ विकेट लिने तीन खेलाडीमा सकिब, युवराज र भारतकै कपिल देव छन् । सकिबले यस विश्वकपमा दुई शतक बनाइसकेका छन् ।

दक्षिण अफ्रिका र वेस्ट इन्डिजलाई पनि पराजित गरेको बंगलादेश १० राष्ट्रसम्मिलित प्रतियोगिताको अंकतालिकामा पाँचौं स्थानमा छ । शीर्ष चार टोलीले सेमिफाइनलमा स्थान पाउने छ । मासरफी मोर्टजाको टोलीले भारत र पाकिस्तानसँग खेल्ने बाँकी छ । अफगानिस्तानसँगै दक्षिण अफ्रिका यसअघि नै प्रतियोगिताबाट बाहिरिसकेको छ । अफगानिस्तानले सबै ७ खेलमा पराजय बेहोरेको छ ।

रहमत शाह र गुलबदिन नैबले पहिलो विकेटमा ४९ रन जोडे पनि अफगानिस्तान ४७ ओभरमा २ सय रनमै अलआउट भयो । कप्तान नैबले ४७ रन बनाए । समिउल्लाह सेनबारी ४९ रनमा अविजित रहे । बंगलादेशबाट सकिबबाहेक मुस्फिकर रहिमले ८३ रन बनाएका थिए ।

प्रकाशित : असार १०, २०७६ ०९:०९
ADVERTISEMENT
प्रतिक्रिया
पठाउनुहोस्

आर्चरले स्मिथलाई साथी नसोच्ने

एएफपी

लन्डन — इंग्ल्यान्डका तीव्र गतिका बलर जोफ्रा आर्चरले मंगलबार विश्वकपमा अस्ट्रेलियाको सामना गर्दा इन्डियन प्रिमियर लिग (आईपीएल) मा सँगै खेलेका अस्ट्रेलियाका स्टिभ स्मिथलाई साथीका रूपमा नसोच्ने बताएका छन् ।

आर्चरसँगै इंग्लिस टिमका जोस बटलर र बेन स्टोक्सले स्मिथसँग पछिल्लो संस्करणको आईपीएलमा राजस्थान रोयल्सबाट खेलेका थिए ।

एसेज शृंखलाको मुखमै विश्वकपमा हुन लागेको दुई पारम्परिक क्रिकेट प्रतिद्वन्द्वीबीचको खेलमा तीन इंग्लिस खेलाडी र स्मिथ परम्पर विरोधी हुनेछन् । श्रीलंकाविरुद्ध लिग चरणको खेल गुमाएयता इंग्ल्यान्ड दबाबमा आएको छ । यसले पनि इग्ल्यान्ड तथा अस्ट्रेलियाबीचको खेल थप महत्त्वपूर्ण बन्नेछ ।

स्मिथलाई लिएर सोधिएको प्रश्नमा आर्चरले भने, ‘हामी पक्कै साथी हौं । मैले उनीबारे जस्तो सोच राख्छु, उनले पनि मेरो बारे त्यस्तै सोच राखेको हुनुपर्छ । उनी निकै भलाद्मी खेलाडी हुन् । तर क्रिकेटमा यो सबैको अर्थ हुन्न, जति बेला हामी फरक टिमबाट एकआपसविरुद्ध खेल्छौं । जतिबेलासम्म खेल सकिन्न, मेरो मनमा साथीको भावना हुने छैन ।’

बल टेम्परिङ काण्डमा फसेपछि डेविड वार्नरसँगै स्मिथ इंग्लिस क्रिकेट समर्थकको नजरमा छन् । ती समर्थकले लगातार उनीहरूलाई खिल्ली उडाइरहेका छन् । स्मिथबारे आर्चरले थपे, ‘इमान्दारितापूर्वक भन्नुपर्दा राजस्थानबाट खेल्दा पनि मैले उनीविरुद्ध नेटमा खासै बलिङ गरेको छैन । साधारणतया कोही पनि बलर स्मिथको सामना गर्नु नपरोस् भन्छन् तर म त्यस्तो होइन ।’

‘भोलिको खेलको क्रममा कुनै मोडमा आएर मैले र स्टोक्सले स्मिथविरुद्ध बलिङ गर्ने छौं । स्मिथविरुद्ध बलिङ गर्दा के गर्नुपर्छ, त्यो हामीलाई थाहा छ,’ आर्चरले थपे । बार्बाडोसमा जन्मेका उनले मार्चमा मात्र इंग्ल्यान्डबाट खेल्ने अनुमति पाएका छन् । उनी अन्तर्राष्ट्रिय क्रिकेटमा पहिलोपल्ट अस्ट्रेलियाको सामना गर्दैछन् ।

प्रकाशित : असार १०, २०७६ ०९:०५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT