रोयले २ खेल गुमाउने

एएफपी

म्यान्चेस्टर — इंग्ल्यान्ड एन्ड वेल्स क्रिकेट बोर्डले आफ्ना ओपनिङ ब्याट्सम्यान जेसन रोय बायाँ ह्याम्स्ट्रिङको चोटका कारण विश्वकपका आगामी २ खेल खेल्न नसक्ने जानकारी दिएको छ । शुक्रबार वेस्ट इन्डिजविरुद्धको खेलमा फिल्डिङका क्रममा घाइते भएका रोयले मंगलबार ओल्ट ट्राफोटमा हुने अफगानिस्तानविरुद्धको खेल र शुक्रबार हिडिङलेमा हुने श्रीलंकाविरुद्धको खेल गुमाउनेछन् ।

वेस्ट इन्डिजविरुद्धकै खेलका क्रममा ढाडको दुखाइका कारण ब्याटिङ गर्न असमर्थ भएका थिए । प्रतियोगिताकै कमजोर अफगानिस्तानविरुद्धको खेलमा उनले खेल्ने सम्भावना छ । तर निर्णय खेलअघि गरिने टिमले जनाएको छ । ‘रोयको चोटबारे शनिबार एमआरआई गरिएको थियो र त्यसअनुसार उनले विश्वकपमा आगामी २ खेल गुमाउनेछन्,’ टिमका प्रवक्ताले भने ।

सोमबार ओल्ड ट्राफोटमा इन्डोर नेट सेसनपछि प्रिम्याच कन्फेरेन्समा उपस्थित भएका मोर्गनले अफगानिस्तानविरुद्धको खेल खेल्ने आशय व्यक्त गरे । ‘ढाडको दुखाइ क्रमशः कम हुँदै गइरहेको छ,’ मध्यक्रमका ब्याट्सम्यानले भने, ‘मैले नेटमा शटहरू खेलिरहेको छु र भोलि (मंगलबार) अफगानिस्तानसँग खेल्ने योजनामा छु । यदि आज (सोमबार) खेल थियो भने म निश्चित रूपमा खेल्न सक्थेँ, भोलिका लागि मेरो दुखाइमा भर पर्छ ।’

यसै वर्षको सुरुआतमा वेस्ट इन्डिजविरुद्धको शृंखलाका क्रममा पनि रोयले ह्याम्स्ट्रिङको चोट ब्यहोरेका थिए । जारी विश्वकपको पहिलो खेलमा दक्षिण अफ्रिकाविरुद्ध अर्धशतक प्रहार गरेका रोयले बंगलादेशविरुद्धको जितमा १ सय ५३ रनको सानदर इनिङ्स खेलेका थिए । पाकिस्तानसँगको अप्रत्यारिलो हारका क्रममा भने उनले ८ रनमात्र जोड्न सके ।

रोयको अनुपस्थितिमा टेस्ट कप्तान जोय रुटलाई जोनी बेरिस्टोसँगै वेस्ट इन्डिजबिरुद्ध ओपनिङको जिम्मा दिइएको थियो । उनले अविजित शतकका साथ आफ्नो जिम्मेवारी पूरा गरेका थिए । तर मोर्गनका अनुसार रोयको स्थानमा १५ सदस्यीय टिमका वैकल्पिक खेलाडी जेम्स भिन्सले इंग्ल्यान्डको ओपनिङ गर्नेछन् ।

पहिलोपल्ट विश्वकप उपाधि जित्ने लक्ष्यमा रहेको इंग्ल्यान्डका लागि उच्च लयमा रहेको रोयको अनुपस्थिति नोक्सानीको कारक बन्न सक्छ । मोर्गनले भनेका छन्, ‘मलाई विश्वास छ कि जेसनले फेरि यस प्रतियोगिता खेल्नेछन्, उनी २ खेल बाहिर छन्, त्यसैले अब हेर्नुछ कि उनको पुनरागमन कस्तो हुनेछ । निश्चित रूपमा उनी हाम्रो अहिलेसम्मको सफलतामा मुख्य हकदार हुन् । उनी करिअरकै उच्च लयमा छन् र हाम्रा लागि महत्त्वपूर्ण कुरा पनि यही हो ।’

प्रकाशित : असार ३, २०७६ ०८:०७
प्रतिक्रिया
पठाउनुहोस्

कुलदीपको त्यो बल

एएफपी

म्यान्चेस्टर — भारतीय बलर कुलदीप यादवले विश्वकपमा पाकिस्तानका ब्याट्सम्यान बाबर आजमको विकेट लिँदा उनले बल अविश्वसनीय रूपमा घुमाउन सफल रहे । यो हरेक स्पिनरको ‘सपना’ हो र आफ्नो प्रयास सफल भएकोमा उनी दंग छन् ।

बायाँ हाते लेग स्पिनर (चाइनाम्यान बलर) यादवको ३२ रन खर्चेर २ विकेटको उत्कृष्ट प्रदर्शनकै सहयोगमा भारतले पाकिस्तानविरुद्ध आइतबार डकवर्थ लुइस नियमका आधारमा पाकिस्तानलाई ८९ रनले हराउन सफल रह्यो । ४८ रनको स्कोरमा खेलिरहेका अजामलाई यादवले ब्याट र प्याडको बीचबाट बल छिराएर बोल्ड गरेका थिए । उनले अजाम र फकर जमानको १ सय ४ रनको दोस्रो विकेट साझेदारी पनि तोडेका थिए । फकरले पाकिस्तानका लागि सर्वाधिक ६२ रन प्रहार गरे ।

‘बाबरलाई आउट गर्दाको बल यस प्रतियोगितामै मेरो सबैभन्दा उत्कृष्ट थियो । यसअघि एसिया कपमा पनि मैले नै उनलाई आउट गरेको थिएँ,’ कुलदीपले भने, ‘पानी परेर खेल रोकिएपछि मैले आफ्नै त्यस बललाई हेरेँ । त्यो बल वास्तवमै उल्लेख्य टर्न भइरहेको थियो र सबै स्पिनरले यस्तै बल फाल्न मन पराउँछन् ।’ ‘यो एउटा सपनामा सोच्ने खालको बल डेलिभरि, उत्कृष्ट टेस्ट बलिङ हो । ब्याट्सम्यानलाई गल्ती गर्न बाध्य बनाउने, उत्कृष्ट बल,’ उनले हाँस्दै भने । आफ्नो अर्को ओभरमा कुलदीपले बायाँ हाते फकर जमानलाई पनि फाइन लेग क्षेत्रमा क्याच आउट गराए ।

विजय शंकर र हार्दिक पाण्ड्याले पनि २–२ विकेट लिए । वर्षाका कारण ४० ओभरमा झारिएको खेलमा ३ सय २ रनको लक्ष्य पछ्याएको पाकिस्तानले ६ विकेट गुमाएर २ सय १२ रनमात्र जोड्न सक्यो ।

‘बाबर र फकर दुवैले स्पिनरविरुद्ध उत्कृष्ट खेलिरहेका थिए । उनीहरूले आक्रामक ब्याटिङका साथ स्ट्राइक पनि परिवर्तन गरिरहेका थिए । त्यसैले उनीहरूको साझेदारी तोड्नु नै सबैभन्दा महत्त्वपूर्ण थियो,’ कुलदीपले भने, ‘बाबरको विकेट झरेपछि अर्को ओभरमा अर्को विकेट गुम्यो । डकवर्थ लुइस नियमअनुसारको स्कोरमा उनीहरू धेरै पछि परिसकेका थिए र हरेक नयाँ ब्याट्सम्यानलाई दबाब थपिँदो थियो, हाम्रा लागि चाहिँ त्यसले फाइदा भइरहेको थियो ।’

टवान्टी–२० फर्म्याटको इन्डियन प्रिमियर लिग (आईपीएल) मा कममजोर प्रदर्शनका कारण क्रिकेट पण्डितहरूले विश्वकपमा कुलदीपको उपस्थितिमा सन्देह गरिरहेका थिए । तर, २४ वर्षीय यी स्पिनरले दक्षिण अफ्रिकाविरुद्ध १–४६ र पाकिस्तानविरुद्ध निर्णायक प्रदर्शन गरे । ‘हरेकले मेरो लयको बारेमा कुरा गरिरहेका छन् ।

मलाई लाग्दैन कि मैले आफ्नो लय गुमाइरहेको छु । मैले विकेट लिन सकिन भने लयको कुरा गर्नु ठीकै होला तर पछिल्लो २ खेलमा मैले उत्कृष्ट बलिङ गरिरहेको छु,’ कुलदीपले भने, ‘अस्ट्रेलियाविरुद्धको खेलमा उनीहरू मेरो बलमा संघर्ष गरिरहेका थिए र जुनसुकै स्पिनरका लागि पनि यस्तो हुनु ठूलो सफलता हो ।’

भारतका उपकप्तान रोहित शर्माले १ सय १३ बलमा १ सय ४० रनको इनिङ्स खेलेपछि भारतले ५० ओभरमा ३ सय ३६ रनको स्कोर खडा गरेको थियो । शर्माले पाकिस्तानको इनिङ्समा कुलदीपकै निर्णायक प्रदर्शन भन्दै उनको तारिफ गरे ।

‘उनी हाम्रो टिमको खेल जिताउने बलर हुन् र आजै पनि तपाईंले हेर्नुभयो भने उनले कठिन समयमा महत्त्वपूर्ण विकेट लिएका छन्,’ शर्माले भने, ‘दुवै ब्याट्सम्यान सेट भइसकेका थिए । निश्चित रूपमा प्रतियोगितामा कुलदीपको सुरुआत त्यस्तो भएन जस्तो उनले सोचेका थिए । समूह चरणका बाँकी खेलहरूका लागि उनको आत्मविश्वास माथि आएको छ ।’

सन् २०१७ मा डेब्यु गरेयता कुलदीपले भारतका लागि ४७ एकदिवसीय खेलमा ९० विकेट लिइसकेका छन् ।

प्रकाशित : असार ३, २०७६ ०८:०६
पूरा पढ्नुहोस्
प्रतिक्रिया
पठाउनुहोस्