सिनालाई ५० हजारसहित सम्मान- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

सिनालाई ५० हजारसहित सम्मान

कान्तिपुर संवाददाता

सुनसरी — धरान समाज युकेले तेक्वान्दो खेलाडी सिना मादेन लिम्बुलाई शनिबार प्रोत्साहनस्वरुप ५० हजार ५ रुपैयाँसहित सम्मान गरेको छ  । सिनाले हालै इन्डोनेसियामा सम्पन्न १८ औं एसियाली खेलकुदअन्तर्गत तेक्वान्दोमा उज्वेकिस्तानकी खेलाडीलाई जितेकी थिइन्  ।

उनलाई प्रदेश १ का तेक्वान्दो अध्यक्ष शैलेश विष्ट र धरान समाज युकेका खेलकुद विभागका सचिव निर्मलदास गुरुङ र युकेमा बस्दै आएका पूर्व खेलाडी गोर्खा सैनिक राष्ट्र राईले संयुक्त रूपमा सम्मान प्रदान गरे ।

तेक्वान्दोमा उनको सम्भावना देखेर प्रोत्साहन गर्न सम्मान गरिएको हो । धरान उपमहानगरपालिका–५ प्रगतिचोककी १८ वर्षीया सिना धरान डोजाङसँग आबद्ध छिन् । कक्षा १२ को परीक्षा दिएर बसेकी सिनाले इटहरीमा एक वर्षअघि आयोजित १२ औं इन्टरनेसनल फ्रेन्डसिप तेक्वान्दो च्याम्पियनसिपको फाइट र पुम्से दुवैमा स्वर्ण पदक जितेकी थिइन् । उनी पुम्सेमा उत्कृष्ट हुँदै २५ हजार जित्न सफल भएकी थिइन् ।


त्यसअघि उनले काठमाडौंमा सम्पन्न अन्तर्राष्ट्रिय महिला च्याम्पियनसिपमा रजत पदक जितेकी थिइन् । उनका बाबु नवीन लिम्बु तेक्वान्दोका प्रशिक्षक हुन् । उनले भनिन्, ‘घरमा बाबा पनि खेलाडी, दिदीहरू सबै खेलाडी । उहाँहरूले खेलेको देखेर तेक्वान्दो ११ वर्षको उमेरदेखि नै सिकेको हुँ ।’ उनी ब्ल्याकबेल्ट दोस्रो डान हुन् । उनको परिवारमा बाबु नवीन चौथो डान, ठूली दिदी रितु पाँचौं डान, रिचा ब्ल्याकबेल्टधारी हुन् ।

आठौं राष्ट्रिय खेलकुदको तयारीमा जुटेकी सिना दैनिक ६ घण्टा अभ्यासमा हुन्छिन् । एसियाडअघि उनी दक्षिण कोरियामा एक महिने प्रशिक्षणमा गरेर इन्डोनेसिया पुगेकी थिइन् ।

प्रकाशित : कार्तिक १८, २०७५ ०८:१८
प्रतिक्रिया
पठाउनुहोस्

वाईआरसीसी च्याम्पियन

कान्तिपुर संवाददाता

इलाम — विराटनगरको वाईआरसीसी टिम इलाममा आयोजित प्रदेशस्तरीय क्रिकेट प्रतियोगिताको च्याम्पियन बनेको छ  । आयोजक इलामलाई २८ रनले हराउँदै विराटनगर उपाधि दाबेदार बनेको हो  ।

विजेता विराटनगरले १ लाखसहित ट्रफी हात पार्‍यो । उपविजेता इलामले ५० हजार रुपैयाँमा चित्त बुझायो । सदरमुकामस्थित टुँडिखेलमा शनिबार भएको फाइनलमा टस जितेर पहिलो ब्याटिङ गरेको विराटनगरले ७ विकेट क्षतिमा १ सय ५६ रन जोड्यो । इलामले १६.२ ओभरमा सबै विकेट गुमाएर १ सय २८ रनमात्र बटुल्यो ।

विराटनगरका अजय राजवंशीले सर्वाधिक ३९ रन बनाए । यू–१६ का राष्ट्रिय खेलाडी राजन मगरले ३८ र सुरज पटेलले ३४ रन जोडे । विराटनगरलाई उपाधि जिताउन सैदुल अन्सारीले ३ विकेट लिए । दिपेश कँडेलले २ र श्रवण यादव, मेबुब आलम र अजय राजवंशीले १–१ विकेट लिए ।

१ सय ५७ रनको लक्ष्य लिएको इलामले गतिलो सुरुआत गरे पनि लक्ष्यभन्दा टाढा रह्यो । ओपनर सन्दीप ढुंगानाले २६ रन जोड्दै सम्भावना बलियो बनाए । तर अन्य ब्याट्सम्यान क्रिजमा टिक्न नसक्दा उपविजेतामा नै चित्त बुझाउनुपर्‍यो । इलामका विमल भुजेलले १५, अंकित सुवेदीले १६, मनदीप विमलीले १७ र राज थापाले १९ रन बनाए । इलामका विनोद कोइरालाले ३ विकेट लिए । हेमन राईले २, सन्दीप ढुंगाना र अभ्यास तिम्सिनाले १–१ विकेट लिए ।

प्रतियोगितामा ७३ रन बनाउँदै ७ विकेट लिएका विराटनगरका अजय राजवंशी म्यान अफ द सिरिज घोषित भए । फाइनलमा ३ विकेट लिएका विराटनगरका सैदुल अन्सारी म्यान अफ द म्याच घोषित भए । प्रतियोगिताभर ९३ रन जोडेका विराटनगरका सुरज पटेल उत्कृष्ट ब्याट्सम्यान घोषित भए । ९ विकेट लिएका इलामका बलर हेमन राई उत्कृष्ट बलर भए । स्थानीय खेलाडीलाई प्रोत्साहन गर्दै आन्तरिक पर्यटन प्रवद्र्धन गर्ने उद्देश्यले जिल्ला क्रिकेट संघ इलामले सर्वाधिक पुरस्कार राशिको प्रदेश १ स्तरीय क्रिकेट आयोजना गरेको हो । प्रतियोगितामा १४ टोलीको सहभागिता थियो ।

प्रकाशित : कार्तिक १८, २०७५ ०८:१७
पूरा पढ्नुहोस्
प्रतिक्रिया
पठाउनुहोस्
×