डा. केसीसँग संवाद सुरु गर्न प्रा. सुवेदीको आग्रह

लन्डन — ग्लोबल पोलिसी फोरम फर नेपालका संस्थापक अध्यक्ष प्रा. सूर्यप्रसाद सुवेदीले चिकित्सा शिक्षा र सेवा सुधारका लागि आमरण अनशनरत डा. गोविन्द केसीसँग तत्काल संवाद सुरु गर्न सरकारलाई आग्रह गरेका छन् ।

उनले बुधबार विज्ञप्ति जारी गरी केसीका माग चिकित्सा क्षेत्रको बेथितिसँग सम्बन्धित भए पनि सम्पूर्ण उच्च शिक्षाक्षेत्र नै बेथितिको सिकार भएको जनाएका छन् ।

‘तसर्थ हालै प्रतिनिधिसभाबाट पारित चिकित्सा शिक्षा विधेयकलगायत उच्च शिक्षा क्षेत्रसम्बन्धी सबै ऐन कानुनको पुनरावलोकन गरी दीर्घकालीन नीति निर्माणका लागि आवश्यक कदम चाल्न नेपाल सरकारसँग आग्रह गर्दछु,’ विज्ञप्तिमा भनिएको छ ।

सुवेदीले विश्वविद्यालयका पदाधिकारी नियुक्तिमा राजनीतिक भागबन्डा अन्त्य गर्ने अठोट र उच्च शिक्षा सुधारका लाागि उच्चस्तरीय आयोग गठन गर्ने प्रस्तावसहित केसीसँग संवाद सुरु गर्न आग्रह गरेका छन् ।