नेपाल आईसीसी विश्व ट्वान्टी–२० एसिया छनोट ‘बी’ प्रतियोगिताको च्याम्पियन

विनोद पाण्डे

काठमाडौँ — नेपाल आईसीसी विश्व ट्वान्टी–२० एसिया छनोट ‘बी’ प्रतियोगिताको च्याम्पियन बनेको छ । शुक्रबार सिंगापुरसँगको खेल वर्षाले रद्द गरेपछि नेपाल च्याम्पियन भएको हो । राउन्ड रोबिन लिगको अन्तिम खेल अगाडि नेपाल र सिंगापुरको दुवैको १० अंक थियो । तर सिंगापुर भन्दा नेपाल रनरेटमा अगाडि थियो ।

शुक्रबारको खेल रद्द भएपछि नेपालले सिंगापुरलाई रनरेटमै उछिन्दै च्याम्पियन भएको हो ।

मलेसियाको क्वलालम्पुरस्थित बायुमास ओभल खेल मैदलानमा नेपालले टसजितेपछि व्याटिङमा आएको सिंगापुर १३.३ ओभरमा ८१ रन बनाउँदै अलआउट भयो । नेपालबाट सन्दीप लामिछानेले ४, सोमपाल कामी र करण केसीले २/२, ललित राजवंशी र बसन्त रेग्मीले १/१ विकेट लिए ।

नेपालले ३ बल खेली १ रन बनाउँदै १ विकेट गुमाएको अवस्थामा वर्षाले खेल प्रभावित पारेको थियो । ओपनर अनिल साह शुन्यमै आउट भए ।

सात राष्ट्र सम्मिलित यस प्रतियोगिताबाट शीर्ष तीनमा रहेका नेपाल, सिंगापुर र मलेसिया दोस्रोचरणको एसिया छनोटमा पुगेका छन् ।

कीर्तिमानी सन्दीप

सन्दीप लामिछमाने एकै प्रतियोगितामा नेपालको लागि सर्वाधिक विकेट लिने खेलाडी बनेका छन् । उनले प्रतियोगिता भरी कुल २४ विकेट लिए । शुक्रबार सिंगापुरसँगको खेल अगाडि सन्दिपले ५ खेलमा २० विकेट लिइसकेका थिए । शुक्राबार चार विकेट थप्दै सन्दीप नेपालका किर्तीमानी बलर बनेका हुन् ।

यसअघि बसन्त रेग्मीले २०१२ को विश्व क्रिकेट लिग डिभिजन-४ मा २१ विकेट लिएका थिए । सो प्रतियोगिता पनि मलेसियामा नै भएको थियो ।

प्रकाशित : आश्विन २६, २०७५ १६:३२
प्रतिक्रिया
पठाउनुहोस्
ADVERTISEMENT

देउवा र शशांकको आरोप, ‘सरकार प्रेसविरोधी'

रमेशकुमार पौडेल

चितवन — नेपाली कांग्रेसका सभापति शेरबहादुर देउवा र महामन्त्री शशांक कोइरालाले सरकार प्रेसविरोधी भएको अरोप लगाएका छन् ।

नेपाल प्रेस युनियन चितवन शाखाको आठौं जिल्ला अधिवेशनको शुक्रबार भरतपुरमा सम्पन्न उद्घाटन कार्यक्रममा दुवै नेताले समसामायिक राजनीति र पार्टीको आन्तरिक विषयमा केही नबोली सरकारविरुद्ध एक स्वरमा खनिएर छोटा मन्तव्य टुङ्ग्याएका थिए । ‘सञ्चार जगतमाथि सरकारले हस्तक्षेप गर्ने सम्भावना देखिएको छ । प्रेस फ्रिडममा अंकुश लगाउने कोसिस गरिएको छ’ पूर्वप्रधानमन्त्रीसमेत रहेका नेता देउवाले भने । यस्ता षड्यन्त्रविरुद्ध आफ्नो पार्टीले प्रतिकार गर्ने उनले बताए ।

कांग्रेस सधैं प्रेस स्वतन्त्रता र आधारभूत मानव अधिकारको रक्षाका लागि कटिबद्ध रहँदै आएको देउवाको भनाइ थियो । ‘प्रेस स्वतन्त्रताका लागि हामी पञ्चायतमा पनि लडेका हौं । लड्दालड्दै पञ्चायत नै गयो' देउवाले चेतावनी दिँदै भने, 'अहिलेको सरकारले पनि प्रेसविरोधी भावना बनाए हामी चुप लागेर बस्दैनौं ।’

त्यसैगरी महामन्त्री शशांक कोइरालाले पनि सकारले प्रेसविरुद्ध बाधा व्यवधान खडा गरेको बताए । यस्तो कामका विरुद्ध पत्रकारहरु लाग्नु पर्ने र त्यसमा कांग्रेस पार्टीको सहयोग रहने कोइरालाको भनाइ थियो ।

पत्रकारहरु पुरस्कृत
प्रेस युनियनको अधिवेशनको अवसरमा अग्रज र जिल्लाका क्रियाशील युवा पत्रकारहरु पुरस्कृत भएका छन् । युनियनले स्थापना गरेको चीजकुमार–विष्णुकुमारी श्रेष्ठ स्मृति पत्रकारिता पुरस्कारबाट वरिष्ठ पत्रकारहरु किशोर नेपाल, कुलचन्द्र वाग्ले र तेजप्रकाश पण्डित पुरस्कृत भए । तीन वर्षयताको पुरस्कार एकैपटक वितरण भएको हो । यो पुरस्कारको राशि ५१ हजार एक सय ५१ रुपैयाँ छ ।

त्यसैगरी नेपाल प्रेस युनियन क्रियाशिल पत्रकारिता पुरस्कार चितवनका राजु चौधरीले पाए । यो पुरस्कारको राशि नगद ११ हजार एक सय ११ रुपैयाँ रहेको छ ।

जिल्ला अधिवेशनको अवसरमा युनियनको शाखा कार्यालय भवनको पनि नेता देउवाले उद्घाटन गरे । मैयादेवी श्रेष्ठले दान दिएको जग्गामा युनियनले करिब ५५ लाख रुपैयाँ खर्च गरेर नयाँ भवन बनाएको हो ।

प्रकाशित : आश्विन २६, २०७५ १५:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT