मेसीको दुई गोल नेयमरको ह्याट्रिक

वेम्बलीमा भएको खेलमा बार्सिलोनाका लागि फिलिपे कोउटिन्होले दोस्रो मिनेटमा गोल गर्दै अग्रता अग्रता दिलाए । पहिलो हाफमै इभान राकेटिचले पेनाल्टी क्षेत्रबाहिरबाट उत्कृष्ट भलीमा गोल गर्दै अग्रता दोब्बर पारे । पहिलो हाफमा दुईपल्ट पोस्टमा प्रहार गरेका मेसीले पनि दोस्रो हाफमा गोल गरे । टोटेनहमका ह्यारी केनले गोल फर्काएपछि मेसीले गोल गर्दै पुन: दुई गोलको अग्रता बनाए । अर्जेन्टिनाकै एरिक लामेलाले खेललाई ३–१ को स्थितिमा ल्याए पनि मेसीले अन्तिम मिनेटमा गोल गर्दै बार्सिलोनाको जित पक्का गरे ।

‘केही खराब नतिजापछि आजको खेलमा यस्तो प्रदर्शन अत्यावश्यक थियो । हामीले निकै राम्रो खेल्न सक्यौं,’ बार्सिलोनाका प्रशिक्षक एर्नेस्टो भालभेर्डेले भने । अंकतालिकामा बार्सिलोना र इन्टर मिलानको समान ६ अंक छ । अंकविहीन टोटेनहमले भने अब बाँकी खेलमा उत्कृष्ट प्रदर्शन गर्नु जरुरी छ । स्पर्सका प्रशिक्षक मोउरिसियो पोचेटिनोले मेसीलाई रोक्न नसक्दा हार बेहोरेको बताए । ‘मेसी उत्कृष्ट खेलाडी हुन् । उनले औसत प्रदर्शन गर्दा पनि राम्रो नै देखिन्छ । उनी सर्वश्रेष्ठ खेलाडी हुन्,’ पोचेटिनोले भने ।

पछिल्लोपल्ट सन् २०१० मा च्याम्पियन्स लिग जितेको इन्टरले एक गोलले पछाडि परेको स्थिति उल्टाउँदै पीएसजीलाई २–१ ले हरायो । घरेलु टोलीका लागि पाब्लो रोजारियोले सुरुआती अग्रता दिलाए । इन्टरका लागि राड्जा नाइनगोलन र माउरो इकार्डीले गोल गर्दै जित पक्का गरेका थिए ।

पीएसजीले पहिलो खेलमा लिभरपुलसँग भोगेको हार बिर्साउँदै घरेलु मैदानमा रेडस्टार बेलग्रेडलाई फराकिलो अन्तरले हरायो । नेयमरले २० औं मिनेटमा फ्रिकिकमार्फत गोलको खाता खोलेका थिए । लगत्तै अर्को गोल थपेर उनले अग्रता दोब्बर पारे । त्यसपछि एडिन्सन काभानी, एन्जल डी मारिया र केलियन एमबाप्पेले पनि गोल गरे । दोस्रो हाफमा मार्काे मारिनले एक गोल फर्काए पनि नेयमरले अन्तिम समयमा अर्को फ्रिकिक गोल गर्दै आफ्नो ह्याट्रिक पूरा गरे ।

‘मेरो टोलीले देखेको प्रदर्शनबाट एकदम सन्तुष्ट छु । विशेषत: नेयमरसँग । उनले एकदमै राम्रो खेले । उनी युरोपका उत्कृष्ट खेलाडीमध्ये एक हुन् । यो जितले हाम्रा लागि निकै महत्त्व राख्छ,’ पीएसजी प्रशिक्षक थोमस टुचेलले भने ।

लिभरपुल पराजित
कार्लो एन्सेलोट्टीको प्रशिक्षणमा रहेको इटालियन क्लब नेपोलीले बुधबार लिभरपुललाई १–० ले पराजित गर्‍यो । नेपोलीको जितमा लोरेन्जो इन्सिनेले ९० औं मिनेटमा विजयी गोल गरे । ड्रिज मर्टेन्सले अन्तिमतिर गरेको प्रहार पोस्टमा लागेर फर्के पनि इन्सिनेले अन्तिम मिनेटमा गोल गरेर महत्त्वपूर्ण ३ अंक दिलाए । ‘आज टोलीले निकै राम्रो प्रदर्शन गर्‍यो । अघिल्लो सिजनको च्याम्पियन्स लिग फाइनल पुगेको टोलीलाई जित्न सक्नु निकै महत्त्व बोकेको छ,’ एन्सेलोट्टीले भने ।

एन्टोइन ग्रिज्मनले दुई गोल गर्दा गत सिजन युरोपा लिगको उपाधि जितेको एट्लेटिको म्याड्रिडले क्लब ब्रुजलाई ३–१ ले हरायो । समूहमा मोनाकोलाई ३–० ले हराउँदै बोरुसिया डर्टमन्ड अंकतालिकाको शीर्षस्थानमा पुग्यो । समूह ‘डी’ मा वेस्टन मकेनीको ८८ औं मिनेटको गोलसँगै साल्केले लोकोमोटिभ मस्कोलाई १–० ले हरायो । पोर्टोले पनि गालाटासरेलाई सोही अन्तरमा हरायो ।