सधैं पानीको दु:ख

१८ परिवार आधा घण्टा टाढाको हल्दी खोलाबाट पानीको जोहो गर्न बाध्य
कान्तिपुर संवाददाता

प्यूठान — प्यूठान नगरपालिकाको केन्द्र रहेको बिजुवार बजार क्षेत्रको नजिकैको गाउँका स्थानीयले वर्षौंदेखि खानेपानीको समस्या भोगिरहेका छन् ।

ZenTravel

प्यूठान नगरपालिका ४ स्थित खमल्दी गाउँका १८ घरपरिवारलाई खानेपानीको धेरै दु:ख छ । उनीहरूले आधा घण्टा टाढाको हल्दीखोला पँधेराबाट पानीको जोहो गर्ने गरेका छन् ।

नगरपालिका क्षेत्रको अन्यत्र ‘एक घर एक धारा’ निर्माण अभियान चलेको छ । यो अभियानले यहाँ अहिलेसम्म छोएको छैन । दलित परिवारको बसोबास रहेको खमल्दी गाउँमा अहिलेसम्म सरोकारवाला निकायको आँखा नपरेको स्थानीयको गुनासो छ । चुनावका बेला सबैले खानेपानी ल्याइदिन्छौं भन्दै भोट माग्ने तर पछि नहेर्ने स्थानीय परी सुनारले दुखेसो गरिन् ।

Meroghar

‘हल्दीखोलाको पँधेरामा ५० घरले पानी भर्ने गर्छौं,’ सुनारले भनिन्, ‘मध्य बर्खामा समेत पानीका लागि पालो कुर्नुपर्छ ।’ पालो मिचिएको विषयमा झगडा भइरहने सुनारले बताइन् । स्थानीयका अनुसार हल्दीखोलाको पँधेरामा पानी निकै सानो छ ।

यसको पनि राम्रोसँग मर्मत भएको छैन । पानी भर्ने पालो मिचिएको विषयमा झगडा हुँदा गत असारमा स्थानीय महिमा सुनार घाइते भएको स्थानीय गोमा सुनारले बताइन् । उनका अनुसार महिमा बुटवलमा उपचारपछि भर्खर घर फर्केकी छन् ।

वडा हुँदै नगरपालिका कार्यलयमा खानेपानीको माग गरे पनि सुनुवाइ नभएको पशुपति सुनारले बताइन् । ‘खमल्दीमा विवाह गरेर आएको २५ वर्ष भयो,’ सुनारले भनिन्, ‘वर्षौंदेखि पानीको माग गरेका छौं । अहिलेसम्म कतैबाट योजना परेन ।’ खमल्दीमा पानीको मूलको स्रोत नभएकाले लिफ्ट गरेर ल्याउनुपर्ने वडाध्यक्ष लक्ष्मीप्रकाश राजभण्डारीले बताए ।

लिफ्ट गर्ने ठूलो बजेट वडाको पहुँचमा नभएकाले यस आर्थिक वर्षमा सम्बोधन गर्न नसकेको राजभण्डारीले बताए । ‘वडाको बजेटले ठूला योजना निर्माण गर्न सकिँदैन,’ राजभण्डारीले
भने, ‘नगरसभामा खमल्दीगाउँको खानेपानीको कुरा उठाइरहेको छु । अर्को वर्ष सम्बोधन होला ।’

प्रकाशित : भाद्र १९, २०७५ १०:२३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

जनप्रतिनिधिको सुरक्षामा चासो

कान्तिपुर संवाददाता

रोल्पा — नेत्रविक्रम चन्द नेतृत्वको नेपाल कम्युनिस्ट पार्टी (नेकपा) का कार्यकर्ताले अघिल्लो साता माडी गाउँपालिका २ का वडा सदस्य हरिप्रसाद घर्तीमगरको घर कब्जा गरे ।

आर्थिक अपारदर्शिताको आरोप लगाउँदै कार्यकर्ताले घरमा झन्डा झुन्ड्याउँदै ताला लगाए । पार्टीको निर्देशन नमानेको आरोपमा गत वर्ष भदौमा थबाङ गाउँपालिका अध्यक्ष वीरबहादुर घर्तीलाई उक्त पार्टीका कार्यकर्ताले ‘अपहरण’ गरेर चार दिनपछि मुक्त गरेका थिए ।

उनीमाथि आफ्नो ‘सत्ता’ प्रति बेवास्ता गरेको आरोप लगाए । उक्त घटनालगत्तै जिल्लाका सबै स्थानीय तहका जनप्रतिनिधिलाई राजीनामा दिन पत्रसमेत बाँडे । त्यसयता सुरक्षा सतर्कता वृद्धि गरिएको छ । स्थानीय प्रशासनले जनप्रतिनिधिको सुरक्षामा चासो दिन थालेको छ ।

दुर्गममा बसेर काम गर्दै आएका जनप्रतिनिधिको सुरक्षाका लागि सुरक्षाकर्मी थप्ने निर्णयसमेत गर्‍यो । समितिको निर्णय अनुसार करिब १ सय ६० जना रहेको सशस्त्र प्रहरी बलको स्थायी बेस क्याम्प सदरमुकाममै स्थापना हुने भएको छ ।

छुट्टाछुट्टै स्थानमा भएका ती घटनाबाट सबै जनप्रतिनिधि त्रस्त छन् । जनप्रतिनिधिमाथि भ्रष्टाचार, अनियमितता तथा अभद्र व्यवहार गरेको आरोप लगाउँदै नेकपाका कार्यकर्ताले यसअघि पनि चेतावनी दिँदै आएका थिए । घटना वृद्धि हुन थालेपछि सुरक्षा सतर्कता बढाइएको हो ।

शान्ति सुरक्षामा खलल पुर्‍याएको आरोपमा माडीको घर्तीगाउँबाट एक साताअघि उक्त पार्टीका जिल्ला सदस्य देवबहादुर वली ‘दिनेश’ लाई प्रहरीले पक्राउ गरेको छ । उनलाई सदरमुकामस्थित हिरासतमा राखिएको छ । उनी घर्तीगाउँ बजारका होटल सञ्चालक समेत हुन् । त्यसको विरोधमा रिहाइ गर्न माग गर्दै सुनुवाइ नभए क्षति पुर्‍याउने धम्की दिइएको छ ।

प्रमुख जिल्ला अधिकारी गन्जबहादुर
एमसीले जनप्रतिनिधि लक्षितलगायत विध्वंसका घटनाप्रति स्थानीय प्रशासन चुप बस्न नसक्ने बताए । ‘समाजमा विध्वंसलगायत गैरकाननुी कार्य गर्ने जोकसैलाई छुट दिने सरकारको नीति छैन । हरेक गलत हर्कतविरुद्ध प्रशासनले चासोपूर्वक कारबाही अघि बढाउँछ,’ प्रजिअ एमसीले भने ।

सुरक्षा संवेदनशीलताबारे चासो वृद्धि गर्दै सरकारले स्थानीय प्रशासनमार्फत गैरकानुनी हर्कत रोक्न कडा निर्देशनसमेत दिँदै आएको छ । नेकपाको गतिविधि वृद्धि भएको समीक्षा गर्दै आएको सुरक्षा संयन्त्रको नियमित बैठकसमेत बढाइएको छ ।

प्रकाशित : भाद्र १९, २०७५ १०:२३
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×