८ वर्षमा सकिएन पुल

मोटर चढेर खोला तर्ने सपनामै सीमित
कान्तिपुर संवाददाता

परासी — सरावल गाउँपालिका ६ स्थित खोलामा पुल निर्माण सुरु गरेको आठ वर्ष पूरा भयो । वर्षायाममा डुंगा चढेर वारपार गर्नुपर्ने बाध्यता अहिले पनि उस्तै छ । स्थानीयले दुई/तीन वर्षभित्र पुल बन्ला र मोटर चढौंला भन्ने ठानेका थिए ।

लामो समय पुल निर्माण पूरा नभएकाले उनीहरूको सपना अधुरै भयो । ‘पुल बन्ला र गाडी चढौंला भन्ने सपना देखेका थियौं, कहिल्यै पूरा भएन,’ स्थानीय महेन्द्र ठाकुरले भने, ‘काम नगर्नेलाई कारबाही पनि हुँदैन ।’


जिल्लाको साबिक बडहरा दुवौलिया गाविसमा निर्माणाधीन झरही खोलाको पुल समयमा निर्माण नहुँदा स्थानीयले सास्ती खेप्नु परेको हो । २०६६ सालमा तत्कालीन भौतिक योजना तथा निर्माणमन्त्री विजयकुमार गच्छदारले पुलको शिलान्यास गरेका थिए । भुताहादेखि सीमावर्ती महेशपुर जोड्ने मुख्य सडक खण्डमा पर्ने पुल तीन वर्षमा निर्माण सम्पन्न हुनुपर्नेमा अहिलेसम्म २५ प्रतिशत मात्र काम सम्पन्न भएको छ ।


पुल २५ मिटर लम्बाइ र ७ मिटर चौडा छ । यसको निर्माणका लागि बिल्डर्स कन्स्ट्रक्सन कम्पनीलाई ७ करोड ८० लाख रुपैयाँमा तीन वर्षभित्र निर्माण सम्पन्न गर्ने गरी ठेक्का भए पनि पूरा हुन नसकेको सडक डिभिजन कार्यालय बुटवलले जनाएको छ ।


सुरुमा बिल्डर्स कम्पनीलाई ठेक्का दिइएको तर उक्त कम्पनीले काममा ढिलाइ गरेको भन्दै शीतलचन्द्र कन्स्ट्रक्सन कम्पनी काठमाडौंलाई ठेक्का दिइएको थियो । डिभिजन कार्यालयका इन्जिनियर युवराज पाण्डेका अनुसार पहिलेको ठेकेदार भागेका कारण ढिलाइ भएको बताए । ‘अहिले वर्षाका कारण काम हुन नसकेको हो,’ उनले भने, ‘वर्षा सकिएलगत्तै काम सुरु हुनेछ ।’

हिउँदको समयमा जसोतसो स्थानीयले खोला तर्ने गरेको भए पनि वर्षातमा ज्यानकै जोखिम मोल्नु परेको स्थानीय मोहम्मद इजहार शेखले बताए । पुल समयमा नबन्दा यातायात सञ्चालनमा समेत समस्या भएको छ । ‘ठूला नेताले शिलान्यास गरेको पुल छिट्टै बन्ला भन्ने आशा थियो,’ शेखले भने, ‘तीन वर्षमा हुनुपर्ने काम नौ वर्ष बित्न लाग्दा पनि नहुँदा दु:ख लागेको छ ।’


सरावल गाउँपालिका अध्यक्ष राधेश्याम चौधरीले भने पुल निर्माणमा भएको ढिलाइबारे अनभिज्ञता प्रकट गरे । ‘गाउँपालिकालाई कुनै पनि निकायले ठेक्का कसलाई परेको, कति समयमा बनाइसक्नुपर्ने केही जानकारी गराएका छैनन्,’ अध्यक्ष चौधरीले भने, ‘तसर्थ, आधिकारिक रूपमा पुल निर्माण ढिलाइबारे हामीलाई थाहा छैन ।’

प्रकाशित : श्रावण २३, २०७५ १०:५२
प्रतिक्रिया
पठाउनुहोस्

केन्द्र बनेपछि बाहानेमा भीडभाड

गिरुप्रसाद भण्डारी

नौबहिनी (प्यूठान) — पहिले बाहाने बजारमा चहलपहल नै हुँदैनथ्यो । लुङखोला क्षेत्रवासीलाई सरकारी कामकाजका लागि बिजुवार वा खलंगा जानुपथ्र्यो । नुन–तेल, लत्ताकपडा मात्र बाहानेमा किनेर घर फर्किन्थे । अहिले नौबहिनी ६ बाहानेमा गाउँपालिका केन्द्र भएपछि बजार फेरिएको छ ।

किनमेलका लागि मात्र नभएर अन्य सरकारी कामकाजका लागि समेत उनीहरू बाहाने झर्छन् । यसले पनि चहलपहल बढाएको हो ।


नयाँ–नयाँ बैंकका शाखा खुलेका छन् । होटलहरू बढे । स्टेसनरी, फोटोकपीका नयाँ पसल थपिँदै छन् । हालै मात्र इन्भेस्टमेन्ट र साइन रेसुंगा बैंकको शाखा खुलेपछि चहलपहल अरू बढेको स्थानीय बलेन्द्र केसीले बताए । वडास्तरमा काम सकेर गाउँपालिकामा भुक्तानी लिन आउने उपभोक्ता, बजार गर्न आउने ग्राहक, कृषि भेटेरिनरी, स्वास्थ्य र बैंकमा आउने सेवाग्राहीले बाहाने बजार क्षेत्रमा अहिले भीडभाड देखिने स्थानीय महेश थापाले बताए । ‘गाउँपालिकाको केन्द्र भएपछि चहलपहल बढेको छ,’ उनले भने, ‘यसले गर्दा बाहानेमा व्यापार पनि बढ्यो ।’ आफ्नो एग्रोभेटमा पहिलेभन्दा व्यापार बढेको थापाले सुनाए ।


गाउँपालिका आयोजनामा हुने तालिम, गोष्ठीलगायत कुनै न कुनै कामले गाउँका अगुवा दिनहुँ बाहाने झर्ने गरेको थापा सुनाउँछन् । साबिकका ६ गाविस फोप्ली, लुङ, डाम्री, स्याउँलीबाङ, खबाङ र लिघा समावेश गरेर नौबहिनी गाउँपालिका बनेको हो । सबै स्थानबाट स्थानीय सेवा लिन बाहाने झर्दा चहलपहल बढेको थापाले बताए । गाउँपालिकामा काम गर्ने कर्मचारी र निर्वाचित जनप्रतिनिधिले डेरा लिएर बस्न थालेपछि बाहानेवासीका घरका कोठा भाडामा लाग्न थालेको स्थानीय कृष्ण केसीले बताए । उनले उद्योग वाणिज्य संघको बाहाने बजार इलाका, बजारवासी र गाउँपालिकाको सहकार्यमा बजार सरसफाइ र भौतिक पूर्वाधार निर्माण हुन थालेपछि बजारको स्वरूप नै बदलिन थालेको सुनाए ।


गाउँपालिकाले समेत मुख्य केन्द्र भन्दै बाहाने बजार क्षेत्रलाई भौतिक संरचना निर्माण गरेर नमुना बनाउने गरी योजना अगाडि बढाएको गाउँपालिका अध्यक्ष शिव रिजालले बताए । ‘बाहानेमा ३५ लाख रुपैयाँ लगानी गरेर व्यवस्थित नाली निर्माण गरेका छौं,’ उनले भने, ‘हिजोआज सडकमा पानी जम्ने समस्या हटेको छ ।’ उनले लुङखोलासम्म पुग्ने सडक, नाली निर्माणको काम सकिएकाले बजारको सुन्दरता बढेको दाबी गरे । बाहाने बजारको भित्री सडकलाई गाउँपालिको ६० र स्थानीयको ४० प्रतिशत लागतमा कालोपत्रे गर्ने योजना अगाडि बढाइएको छ ।


स्थानीयको सहकार्यमा आठ मिटर चौडा सडक निर्माण गरेर बाहानेको लाखाचौरसम्म जोड्ने योजना अगाडि बढेको रिजालले सुनाए । ‘स्थानीयको साथले बजार पेटीमा रहेका टहरा, झुप्रा हटाएका छांै,’ उनले भने, ‘बजारबाट निस्केको फोहोरलाई व्यवस्थित गरिएको छ ।’


बाहानेले समग्र नौबहिनी गाउँपालिका कस्तो छ भन्ने झल्को दिने भएकाले यस बजार क्षेत्रको विकासमा ध्यान दिएको प्रमुख प्रशासकीय अधिकृत थानेश्वर भण्डारीले बताए । ‘बाहानेलाई नमुना बजारका रूपमा विकास गर्ने योजनासहित काम अगाडि बढेको छ,’ उनले भने, ‘आगामी वर्ष पनि बाहाने बजार क्षेत्रको विकासका लागि १५ लाख रुपैयाँ विनियोजन गरिएको छ ।’ गाउँपालिकाकै लागतमा बजार क्षेत्रका पाँच स्थानमा भर्खरै सीसी क्यामरा जडान गरिएको छ ।

प्रकाशित : श्रावण २३, २०७५ १०:५१
पूरा पढ्नुहोस्
प्रतिक्रिया
पठाउनुहोस्