१० वर्षे कैद सजाय तोकिएका फरार गैंडा सिकारी २५ वर्षपछि पक्राउ

टोलीले हिजो बिहीबार साँझ चितवन कालिका नगरपालिका–२ का मिने साइँला भनिने ५६ वर्षका भीमबहादुर थापा क्षेत्रीलाई समाएको हो । चितवन राष्ट्रिय निकुञ्जका सूचना अधिकारी रहेका सहायक संरक्षण अधिकृत गणेशप्रसाद तिवारीका अनुसार २०५५ सालको कात्तिक २८ गते निकुञ्जको अमृते पोष्ट नजिक पन्ना खोला आडमा खाग काटेको मृत गैंडा भेटिएको थियो । सो गैंडा मार्न भीमबहादुरसहित १७ जना संलग्न भएको अनुसन्धानमा खुलेको थियो । तर घटनापछि उनी फरार रहँदै आएका थिए ।

उनी विरूद्धको मुद्दा २०५७ साल माघ २५ मा फैसला भएको थियो । निकुञ्जले उनलाई १० वर्ष कैद र एक लाख रूपैयाँ जरिवना हुने सजाय सुनाएको थियो । तर भाग्दै विभिन्न ठाउँ लुक्दै बस्दै आएको भीमबहादुरलाई बिहीबार निकुञ्ज प्रशासन र निकुञ्जमा तैनाथ नेपाली सेनाको खड्गदल गणको संयुक्त टोलीले समाएको हो ।

उनलाई शुक्रबार भरतपुर कारागार चलान गरिसकेको सूचना अधिकारी तिवारीले बताए । गैंडा दुर्लभ वन्यजन्तु भएका कारण यसलाई मारेमा वा यसको अंगको कारोबार र ओसारपसार गरेमा १५ वर्षसम्म कैद र १० लाख रूपैयाँसम्म सजाय हुने कानुनी व्यवस्था छ ।