रास्वपा सांसद वाग्ले भन्छन् : कांग्रेसको विरोध कर्मकाण्डी

प्रतिनिधिसभाको आइतबारको बैठकमा आगामी आर्थिक वर्षको नीति तथा कार्यक्रममाथिको छलफलमा भाग लिँदै सांसद वाग्लेले संसद्मा कांग्रेसले गरिरहेको प्रस्तुति कर्मकाण्डी रहेको भन्दै आलोचना गरेका थिए ।

कांग्रेसले बीपी कोइरालाले स्थापित गरेको मानकलाई यो अवस्थामा पुर्‍याएर लज्जास्पद कार्य गरेको वाग्लेको भनाइ थियो । 'बीपी कोइरालाले स्थापित गर्नुभएको मानकलाई यो अवस्थामा पुर्‍याउने यो लज्जास्पद, यो औचित्यहीन विरोधप्रति मेरो घोर खेद छ । संसद्को ओज, गरिमा र उपादेयतालाई असान्दर्भिक बनाउने कदमप्रति खेद छ,' वाग्लेले भने । सहकारीको समस्या समाधानउन्मुख हुनुपर्ने सांसद वाग्लेको भनाइ थियो ।

नीति तथा कार्यक्रममा छलफल गर्नुको सट्टा कांग्रेसको विरोध र सहकारीबारे वाग्ले बोलिरहेपछि सभामुख देवराज घिमिरेले 'विषयमा केन्द्रित भएर अभिव्यक्ति दिन' सचेत गराएका थिए ।

तर, रास्वपाका उपसभापति तथा सांसद वाग्लेले सभामुखको भनाइलाई पछ्याएनन् । वाग्लेले सहकारी प्रकरणको समाधानउन्मुख हुनुपर्ने बताए । कांग्रेसले व्यक्ति केन्द्रित भएर खराब नजिर स्थापना गर्न लागेको बताए । 'छानबिन समिति बनाउन सहमति भइसकेको छ । यो औचित्यहीन, कर्मकाण्डी विरोधको कुनै सान्दर्भिकता छैन । यो टीओआरमा नेगोसिएसन चलिरहेको छ । टीओआरमा नेगोसिएसन चल्दाचल्दै एउटा, दुईवटा शब्दमा गएर अड्किएको छ । यो औचित्यहीन कर्मकाण्डको लागि खेद व्यक्त गर्दछु,' वाग्लेले भने ।

वाग्लेले संसद्मा लोकतान्त्रिक संस्कार हराएको र थिति बिग्रिएको बताए ।