प्रहरी हत्याका मुख्य योजनाकार भनिएका राना पक्राउ- समाचार - कान्तिपुर समाचार

प्रहरी हत्याका मुख्य योजनाकार भनिएका राना पक्राउ

अर्जुन शाह

धनगढी — धनगढीमा अढाई महिनाअघि दुई प्रहरीको हत्या भएको घटनामा मुख्य योजनाकार भनिएका धनगढी उपमहानगरपालिका–१० का ३४ वर्षीय अमर रानालाई प्रहरीले पक्राउ गरेको छ । 

धनगढीनजिकैको सीमाक्षेत्रमा पर्ने अस्थायी प्रहरीचौकी जुगेडामा इन्चार्जसमेत रहेका प्रहरी सहायक निरीक्षक गोविन्द विक र प्रहरी जवान रामबहादुर साउदलाई गस्तीमा रहेका बेला तस्करहरूको समूहले हत्या गरेको थियो ।

सुकबहादुरसमेत भनिने रानालाई प्रहरीले कैलालीको सीमा क्षेत्रबाट आइतबार पक्राउ गरी सार्वजनिक गरिएको जिल्ला प्रहरी कार्यालय कैलालीका डीएसपी प्रतीक विष्टले जानकारी दिए । हत्याको आरोपमा एक जना व्यापारीसहित यसअघि ९ जना पक्राउ परिसकेका छन् । तस्करहरूको समूहले नेपालबाट मोहना नदी हुँदै भारततर्फ केराउ तस्करी गर्दै गर्दा गस्तीमा रहेका सुरक्षाकर्मीले रोक्न खोज्दा दुवै जनाको हत्या भएको थियो । घटनाको दुई दिनपछि मोहना नदीभित्र गाडिएको अवस्थामा शव फेला परेको थियो ।


प्रकाशित : पुस १३, २०७७ १३:१०
प्रतिक्रिया
पठाउनुहोस्

प्रहरी हत्याका अभियुक्त कारागार चलान

अर्जुन शाह

धनगढी — धनगढीको जुगेडास्थित अस्थायी प्रहरी पोस्टका इन्चार्ज असई गोविन्द विक र जवान रामबहादुर साउदको हत्यामा संलग्न रहेको अभियोग लागेका ९ मध्ये ८ जना कारागार चलान भएका छन् । एक व्यापारी भने धरौटीमा छुटेका छन् ।

जिल्ला प्रहरी कार्यालयका डीएसपी प्रतीक विष्टका अनुसार पक्राउ गरी मुद्दा चलाइएका धनगढी–१० का ३१ वर्षीय रोहित राना, सोही नामका अर्का व्यक्ति, २० वर्षीय राजेन्द्र राना, ३० वर्षीय सुरेश राना, २५ वर्षीय राजकुमार राना, २२ वर्षीय रामनिवास राना, २९ वर्षीय दलराम राना र २५ वर्षीय रामगोपाल राना कारागार चलान भएका हुन् ।

सरकारी वकिल कार्यालयका अनुसार जिल्ला अदालत कैलालीका न्यायाधीश दयानन्द पनेरूको इजलासले मंगलबार गरेको थुनछेक आदेशअनुसार आठ जनालाई पुर्पक्षका लागि कारागार चलान गर्ने आदेश भएको हो । अर्का अभियुक्त धनगढीका राजीव गुप्ता भने डेढ लाख धरौटीमा रिहा भएका छन् । गुप्ता धनगढीका मटर (केराउ) कारोबारी हुन् । उनको पनि हत्यामा संलग्नता रहेको प्रहरीको दाबी छ ।

गत असोज मसान्त राति नेपाल–भारत सीमाक्षेत्रको मोहना किनारमा रहेको उक्त चौकीबाट गस्तीमा खटिएका प्रहरीलाई तस्करहरूको समूहले आक्रमण गरी हत्या गरेको थियो । केराउ तस्करी गरी भारततर्फ निकासी गर्दै गरेको समूहलाई गस्तीमा रहेका असई विक र जवान साउदले रोक्न खोज्दा धारिलो हतियार प्रहार गरी हत्या गरेको थियो । उनीहरूको शव मोहना नदीमा गाडेको अवस्थामा फेला परेको थियो ।

सरकारी वकिल कार्यालय, कैलालीले अभियुक्तमाथि कात्तिक २८ मै अभियोग दायर गरेको भए पनि अभियुक्तहरूलाई कोरोना देखिएको र नेगेटिभ रिपोर्टआएपछि मात्रै थुनछेक बहस भएकाले ढिलाइ भएको जिल्ला प्रहरी कार्यालयले जनाएको छ ।

प्रकाशित : मंसिर १७, २०७७ १३:०४
पूरा पढ्नुहोस्
प्रतिक्रिया
पठाउनुहोस्
×