सडक निर्माणमा रारा निकुञ्‍जको अवरोध- समाचार - कान्तिपुर समाचार

सडक निर्माणमा रारा निकुञ्‍जको अवरोध

राजबहादुर शाही

मुगु — सदरमुकाम गमगढीदेखि खत्याड गाउँपालिकाको केन्द्र जोड्ने सडक निर्माणमा रारा राष्ट्रिय निकुञ्ज बाधक बनेको छ । गाउँपालिकाको सेरी हुँदै राराताल नजिकको माझघट्ट जोड्ने सडक निर्माण नहुँदा खत्याडवासी एक दिन पैदल हिँडेर सदरमुकाम आउजाउ गर्न बाध्य छन् ।

खत्याड गाउँपालिकाले निकुञ्ज क्षेत्रभित्र पर्ने १३ किलोमिटर सडक निर्माणका लागि गत आर्थिक वर्षमा सर्भे गरी निकुञ्ज कार्यालयसँग अनुमति मागेको थियो । गाउँपालिका अध्यक्ष उब्जन शाहीका अनुसार प्रारम्भिक रूपमा वातावरणीय प्रभाव मूल्यांकनसमेत गरिएको थियो । ‘तर अहिलेसम्म अनुमति दिइएको छैन, निकुञ्जले आफ्नो क्षेत्रबाट सडक बनाउन मिल्दैन भनिरहेको छ,’ उनले भने, ‘यो सडक बनिदिएको भए गाउँवासीलाई निकै सुविधा हुने थियो ।’

अहिले खत्याडवासीलाई एक दिन लगाएर जुम्लाको गोठीज्युला भएर गमगढी पुग्नुपर्ने बाध्यता छ । त्यसैले स्थानीय पैदलै आउजाउ गर्ने गरेको खत्याड–८ का जन्मजय भण्डारीले बताए । उनका अनुसार निकुञ्जबाट सडक खनिएमा करिब ५ घण्टामै सदरमुकाम पुग्न स किन्छ । गाउँपालिकादेखि निकुञ्जसम्म जोड्ने ग्राभेल सडक निर्माण भइसकेकाले पनि निकुञ्जले प्रक्रिया पुर्‍याएर अनुमति दिनुपर्ने उनले बताए । ‘निकुञ्जबाट हामीले सेवासुविधा केही पाएनौं, खालि दुःख मात्रै पाइरहेका छौं,’ उनले भने, ‘निकुञ्जले सडक छेकेर हामीलाई धेरै दुःख दियो ।’

छायानाथरारा नगरपालिकाले गमगढीदेखि लामाचौरसम्म सडक खनिसकेको छ । उताबाट खत्याड गाउँपालिकाले गम्थादेखि निगालबोटको समानेसम्म २१ किलोमिटर लामो सडक निर्माण भइसकेको जनाएको छ । निकुञ्ज क्षेत्रमा वातावरणीय प्रभाव मूल्यांकन गरेर निर्माणको अनुमति दिएमा दूरी निकै कम हुने गाउँपालिका अध्यक्ष शाहीले बताए ।

प्रकाशित : पुस १, २०७७ १४:०५
प्रतिक्रिया
पठाउनुहोस्

पुलु डिपो ८ महिनादेखि रित्तै 

राजबहादुर शाही

मुगु — मुगुमकार्मारोङका जनताका लागि स्थापना गरिएको मुगुको पुलु डिपो ८ महिनादेखि रित्तै छ । मुगुमकार्मारोङ गाउँपालिकाको पुलु खाद्य डिपोमा भने गत वैशाखदेखि खाद्यान्न ढुवानी भएको छैन । खाद्यान्न नपुग्दा स्थानीयवासी महँगोमा बजारको चामल किनेर खाँदैछन् ।


गाउँपालिकाका करिब १ हजार ३ सय परिवारका लागि आवश्यक खाद्यान्न उपलब्ध गराउन खाद्य व्यवस्था तथा व्यापार कम्पनीले पुलुमा डिपो स्थापना गरेको थियो । ढुवानीको जिम्मा लिएको शर्मा ढुवानी सेवाले डिपोमा चामल नपुर्‍याउँदा माथिल्लो बस्तीका मुगु, डोल्फू, कार्तिक, किम्री र तल्लोबस्तीका ताख, खारी, मह, रिउस गाउँका बासिन्दा महँगोमा चामल किन्न बाध्य छन् । शर्मा ढुवानी सेवामाथि मुगुको कालै पुर्‍याउनुपर्ने चामल भक्तपुर पठाएको आरोपमा जिल्ला प्रशासन कार्यालय सुर्खेतमा कालोबजारी ऐनअन्तर्गत मुद्दा चलिरहेको छ ।

हिमपातको बेला व्यापारीको चामल पनि पाउन मुस्किल हुँदा कसरी भोक टार्ने भन्ने चिन्ताले स्थानीयलाई सताएको छ । चितैगाउँका उर्गिन लामाले पैसा बोकेर चामल किन्न बजार जाँदासमेत रित्तै फर्किनुपरेको बताए । उनका अनुसार बजारमा चामल पाइहालेमा पनि प्रतिकेजी ८० देखि ८५ रुपैयाँसम्म पर्ने गर्छ । त्यही चामल डिपोमा ५० रुपैयाँसम्म पर्छ । ‘बरु पैसा कमाउन सजिलो, एक किलो चामल पाउन साह्रै गाह्रो,’ उनले भने ।

चालु आर्थिक वर्षमा पुलु डिपोका लागि १ हजार ७ सय ५० क्विन्टल चामलको कोटा स्वीकृत भए पनि ठेकेदारले ढुवानी गरेका छैनन् । गाउँपालिका अध्यक्ष छिरिङ क्याप्ने लामाले खाद्य कम्पनीसँग बारम्बार अनुरोध गर्दासमेत चामल नआएको बताए ।

प्रकाशित : मंसिर २८, २०७७ १३:५५
पूरा पढ्नुहोस्
प्रतिक्रिया
पठाउनुहोस्
×