अध्यक्ष दाहालले प्रधानमन्त्रीको राजीनामा मागेर लोकतन्त्रको खिल्ली उडाउनु भएको छ : नेता बाँस्कोटा- समाचार - कान्तिपुर समाचार
कान्तिपुर वेबसाईट
AdvertisementAdvertisement

अध्यक्ष दाहालले प्रधानमन्त्रीको राजीनामा मागेर लोकतन्त्रको खिल्ली उडाउनु भएको छ : नेता बाँस्कोटा

'कमानसिंह लामासँगको आर्थिक विवादको आरोप लागिसकेकाले पार्टी प्रवक्ताले नैतिकताका आधारमा राजीनामा दिनुपर्छ'
देवनाराण साह

मोरङ — पूर्वमन्त्री एवं नेकपाका केन्द्रीय सदस्य गोकुल बाँस्कोटाले पार्टीका कार्यकारी अध्यक्ष पुष्पकमल दाहालले प्रधानमन्त्री केपी शर्मा ओलीको राजीनामा मागेर लोकतन्त्रको खिल्ली उडाएको आरोप लगाएका छन् । 

विराटनगरमा आइतबार आयोजित पत्रकार सम्मेलनमा बाँस्कोटाले चुनावी अभियानमै प्रधानमन्त्री बन्ने नाराका साथ निर्वाचित भएर प्रधानमन्त्री बनेका व्यक्ति र पार्टी महाधिवेशनबाट निर्वाचित अध्यक्षलाई दुवै पदबाट राजीनामा माग गरेकोबाट मुलुकमा भइरहेको राजनीतिक षड्यन्त्र उजागर भएको बताएका हुन् ।

‘केपी ओलीलाई प्रधानमन्त्रीबाट राजीनामा गराउन संसदीय प्रक्रिया र अध्यक्षबाट हटाउन पार्टीको महाधिवेशनमा जानुको विकल्प छैन,’ उनले भने, ‘पार्टीको स्थायी कमिटी बहुमतको निर्णयले केपी ओलीलाई प्रधानमन्त्री र अध्यक्ष पदबाट हटाउन सक्दैन ।’ स्थायी कमिटी बहुमतको निर्णयले आफ्नो विचार र दृष्टिकोणमात्रै राख्न सक्ने बाँस्कोटाको तर्क थियो ।

‘पार्टीका कार्यकारी अध्यक्ष दाहालले पार्टीमा ल्याएको प्रतिवेदनमा प्रधानमन्त्री ओलीलाई लगाएको आरोप सबै पार्टीबाट समाधान हुँदैन,’ उनले भने, ‘कतिपय फौजदारी प्रकृतिका जघन्य आरोपहरु रहेकाले सम्पत्ति शुद्धीकरण, अख्तियार र अदालतबाट सिद्ध भए कानुनबमोजिम कारबाही हुनुपर्छ ।’

मुलुक र पार्टीको नेतृत्व परिर्वतनको वैधानिक विधि नअपनाई पार्टी कमिटीमा राजीनामा माग्नु छक्कापञ्जा भएकाले यसले पार्टी तथा मुलुक दुवैलाई भलो नगर्ने नेता बाँस्कोटाको भनाइ छ । पार्टीको अन्तरविरोध समाधान नेतृत्व परिवर्तनको माग गर्नुलाई उनले पार्टीभित्र विग्रहको संज्ञा दिए । जसले पार्टी अन्तहीन चक्रमा फस्ने भएकाले अहिलेको विवाद छलफल र संवादद्वारा अन्त्य गर्नुपर्ने उनले बताए ।

पार्टीमा दाहालको र प्रधानमन्त्री आलेलीले छुट्टाछुट्टै प्रतिवेदन ल्याएपछि जिल्ला जिल्लामा भइरहेको गुटगत भेलालाई बाँस्कोटाले पार्टी एकता प्रक्रियामा रहेकाले वैचारिक बहस हुनु स्वभाविक भएको तर्क गरे ।

नेकपाका प्रवक्ता तथा राष्ट्रियसभा सदस्य नारायणकाजी श्रेष्ठलाई कमानसिंह लामासँगको आर्थिक विवादको आरोप लागिसकेकाले नैतिकताका आधारमा राजीनामा दिनुपर्ने उनले बताए । उनले आफूलाई आरोप लागिसकेको २४ घण्टा नबित्दै राजीनामा दिएको स्पष्टिकरण दिए । प्रधानमन्त्रीलाई चारित्रिक प्रमाण पत्र दिने अग्रज नेताहरुको बारेमा आफूले धेरै भन्न नमिल्ने बाँस्कोटाको भनाइ थियो ।

प्रकाशित : मंसिर २८, २०७७ १४:५९
प्रतिक्रिया
पठाउनुहोस्

विराटनगरको नोबेल अस्पतालमा थप एक संक्रमितको मृत्यु

देवनाराण साह

विराटनगर — विराटनगरस्थित नोबेल अस्पतालमा सोमबार थप एक कोरोना संक्रमितको उपचारको क्रममा मृत्यु भएको छ । सुनसरीको इटहरी उपमहानगरपालिका–५ का ९० वर्षीय पुरुषको मृत्यु भएको हो ।

स्वाब परीक्षण रिपोर्ट पोजिटिभ आएपछि असोज २३ गते वृद्धलाई अस्पताल भर्ना गरिएको अस्पतालका प्रबन्धक नारायण दाहालले बताए । युरिक एसिड, दम र मधुमेह रोगले पीडित ती वृद्धलाई आईसीयूमा राखेर उपचार गर्दासमेत बचाउन नसकिएको उनले बताए ।

सोमबार बिहान सुनसरीको वराह क्षेत्र नगरपालिका–५ का कोरोना संक्रमित ३७ वर्षीय पुरुषको यसै अस्पतालमा उपचारको क्रममा मृत्यु भएको थियो । प्रदेश १ मा कोरोना संक्रमणले मृत्यु हुनेको संख्या १ सय ६ पुगेको छ ।

प्रकाशित : आश्विन २६, २०७७ १२:२३
पूरा पढ्नुहोस्
प्रतिक्रिया
पठाउनुहोस्
×