ब्रिटिस र सिंगापुर भर्तीका निम्ति अन्तिम प्रतिस्पर्धामा ७ सय ७० युवा बोलाइए- समाचार - कान्तिपुर समाचार

ब्रिटिस र सिंगापुर भर्तीका निम्ति अन्तिम प्रतिस्पर्धामा ७ सय ७० युवा बोलाइए

तीमध्ये ब्रिटिसमा ३४० र सिंगापुरमा १४० जनामात्र लैजाने
गणेश राई

काठमाडौँ — बेलायत सरकारले ब्रिटिस आर्मी र सिंगापुर पुलिस फोर्सका निम्ति ७ सय ७० नेपाली युवालाई अन्तिम प्रतिस्पर्धामा बोलाएको छ ।

ब्रिटिस आर्मी मुख्यालयले वेबसाइट आर्मी डट एमओडी डट युकेमा रेक्रुट इन्टक/आरआई–२०२१ का निम्ति बिहीबार (१० डिसेम्बर) नामावलीसहित बोलाएको हो । त्यसरी बोलाइएका युवाहरूमा मनाङ, मुस्ताङ, डोल्पा, सिरहा, धनुषालगायत ५६ जिल्लाका छन् ।

उसले कोरोना भाइरस महामारीका कारण गत वर्ष क्षेत्रीय र अन्तिम चरणको छनोटबाट बाहिरिएकामध्ये सीमित युवालाई मात्र मौका दिएको छ । यो वर्षको छनोट प्रक्रिया नियमित तालिकाभन्दा एक महिना पछाडि धकेलिएको छ । आगामी जनवरी २३ बाट सिंगापुर र फेब्रुअरी २ बाट ब्रिटिस गोर्खाको छनोट हुनेछ । यसअघि जनवरीमै छनोट प्रक्रिया पूरा गरिन्थ्यो ।

अन्तिम छनोटका पोखरामा हुनेछ । त्यस निम्ति नेपालको पूर्वी भेगबाट र पश्चिम भेगबाट आधा–आधा संख्यामा प्रतिस्पर्धी छानिएका छन् । अन्तिम प्रतिस्पर्धामा सिंगापुर पुलिस फोर्सका निम्ति २ सय १० जना बोलाइएका छन् । कोरोना भाइरसको स्वास्थ्य प्रोटोकल अपानाएर ३०–३० जनाको समूहमा स्पर्धा गराइने छ । तीमध्ये १ सय ४० जना छनोट हुनेछन् ।

ब्रिगेड अफ गोर्खाजका निम्ति देशभरिबाट ५ सय ६० जनालाई प्रतिस्पर्धामा बोलाइएका छन् । जसमा पूर्व क्षेत्रका २ सय ८० र पश्चिम क्षेत्रका २ सय ८० जना छन् । उनीहरूलाई ३२ जनाको समूहमा प्रतिस्पर्धा गराइने छ । अन्तिममा ३ सय ४० जना छनोट हुनेछन् । यो संख्या गत वर्षभन्दा कम हो । गत वर्ष ब्रिटिसमा ४ सय ३२ जना र सिंगापुरमा २ सय २० भर्ती लिइएको थियो ।

ब्रिटिस आर्मी मुख्यालयले छनोट प्रक्रियाको माध्यम मेडिकल, एजुकेसनल र इन्टरभ्यु आरआई–२० को जस्तै हुने जनाएको छ । कोरोना भाइरस संक्रमण अवस्थाको आधारमा शारीरिक परीक्षाहरू निर्धारण हुने भनिएको छ । त्यस निम्ति छनोट प्रक्रियामा उच्च प्रदर्शन दिन शारीरिक तथा मानसिक तवरले तन्दुरुस्त रहन सुझाइएको छ । ‘सेलेक्सन आउनु अगाडि तपाईंहरूलाई कोरोना भाइरस संक्रमणबाट जोगिनुहोस्,’ वेबसाइटमा भनिएको छ, ‘हामी तपाईंहरूको आगमनमा पीसीआर टेस्ट लिनेछौं । यदि तपाईंको टेस्ट पोजिटिभ आएमा अथवा तपाईंमा कोरोना भाइरसको लक्षण देखिएमा तपाईं गोर्खा भर्ती छनोट प्रक्रियाबाट स्वत बाहिरिनु हुनेछ ।’

काठमाडौंस्थित क्लास रूम एकेडेमीका प्रबन्ध निर्देशक विनोद राईले यो वर्षको छनोट प्रक्रिया छोटो र सहज तुल्याएको बताए । ‘यो पटक डोको क्यारी, जर्किन क्यारी, लिफ्ट एण्ड क्यारी कटौती गरिएका छन्,’ राईले भने, ‘छनोट प्रक्रियामा २ किलोमिटर दौड ८ मिनेट १० सेकेन्डमा पार गर्नु पर्नेछ । हेभिङ (ओभर आर्म) १२ पटक, मिट थाइपुल कम्तिमा ७६ किलो, ४ किलोको मेडिसिन बल थ्रो ३ दशमलव १० मिटर फाल्नु पर्नेछ ।’ त्यसैगरी एजुकेसनमा फ्री–राइटिङ ३० मिनेट, सुनाइ र बोलाइ १५ मिनेट हुनेछ । अन्तिममा अन्तरवार्ता लिइने छ । मेडिकल टेस्ट गत वर्षकै कायम गरिएको जनाइएको छ ।

मुख्यालयले भर्ती छनोटका निम्ति कसैको झुटो आश्वासनको विश्वास नगर्न सचेत तुल्याएको छ । भर्ती हुन सफल युवाले विगतका वर्षझैं पारिवारिक भेटघाट गर्न पाउने छैनन् । टेलिफोन र भिडियो कलमार्फत् कुराकानी गर्न पाउने छन् ।

प्रकाशित : मंसिर २६, २०७७ १०:४९
प्रतिक्रिया
पठाउनुहोस्

प्याराग्लाइडिङमा हेलचेक्य्राइँ गरेको भन्दै पाइलटलाई स्पष्टीकरण

भिडियोमा प्याराग्लाइडिङकै क्रममा फूल टिप्ने, फेवा तालको पानी छुनेजस्ता गतिविधि देखिएपछि प्राधिकरणले आठ पाइलटलाई अनिश्चित कालका लागि उडानमा रोक लगाएको छ ।
पाइलट भन्छन्– ‘यस्ता गतिविधि खेल–कौशलभित्रै पर्ने भएकाले उडानमा रोक लगाउने होइन, स्पष्ट नियम बनाउनुपर्छ ।’
दीपक परियार

पोखरा — साबिकको मूल्यभन्दा आधा छुटमा प्याराग्लाइडिङ गर्न पाइने भएपछि पोखराको सराङकोटमा दसैंछेका ग्राहकको घुइँचो लाग्यो । प्याराग्लाइडिङ गर्दै गरेका भिडियो ग्राहकले धमाधम सामाजिक सञ्जालमा राखे । 

तिनैमध्येका केही भिडियोमा पाइलटले ग्राहकलाई प्याराग्लाइडिङका क्रममा रूखबाट फूल टिपेर दिने गरेको, फेवातालको पानी छुवाउने गरेको देखियो । त्यसै क्रममा मंसिर ८ गते प्याराग्लाइडिङ दुर्घटनामा पाइलट राजु नेपालीको मृत्यु भयो । यात्रु युवती गम्भीर घाइते भइन् ।

प्याराग्लाइडिङको नियामक निकाय नेपाल हवाई खेलकुद संस्था (ना) र प्रहरीको प्रारम्भिक अनुसन्धानमा पाइलटले फूल टिप्ने क्रममा दुर्घटना भएको देखियो । प्याराग्लाइडिङका क्रममा सुरक्षा–व्यवस्थामा हेलचेक्य्राइँ गरेको भन्दै संस्थाले अनुसन्धान थाल्यो ।

यसै क्रममा नागरिक उड्डयन प्राधिकरणले आठ पाइलटलाई अनिश्चित कालका लागि उडानमा रोक लगाएको छ । गत मंगलबार प्राधिकरणले नालाई पत्र लेख्दै एसियाली खेलकुदका पदक विजेता युकेश गुरुङसहित ८ जनालाई उडानमा रोक लगाएको हो । गुरुङसहित संग्राम थापा, विशाल थापा, रिखी पोडे, सुवास थापा, एलिस थापा, अञ्जन कुँवर र सहिल खानको नाम सूचीमा थियो । तर प्राधिकरणले प्रतिबन्ध लगाएका मध्ये सहिल खान पाइलट नभई यात्रु भएको पत्ता लागेको छ । अञ्जन कुँवर सोलो पाइलट हुन् । उनले टेन्डम (यात्रुसहित) फ्लाइट कोर्स गरिरहेका छन् ।

प्राधिकरणले नासँग उडानका क्रममा अवाञ्छित क्रियाकलाप गर्ने पाइलटको नाम मागेको थियो । तर नाले पठाएन । सामाजिक सञ्जालमा भेटिएका भिडियोका आधारमा प्राधिकरणले ती पाइलटलाई उडानमा प्रतिबन्ध लगाएको हो । तिनमा केही अन्तर्राष्ट्रिय स्तरमा ख्याति कमाएका पाइलट पनि छन् । क्यानले तीन दिनभित्र स्पष्टीकरण दिन भनेपछि यतिखेर उनीहरू काठमाडौंमा छन् । प्राधिकरणले शुक्रबार ६ पाइलटसँग स्पष्टीकरण सोध्दै छ ।

नाका अध्यक्ष कृष्ण भण्डारीले पाइलटलाई के–कस्तो कारबाही हुन्छ भन्नेबारे प्राधिकरणले नै निर्णय गर्ने बताए । उनले भने, ‘प्राधिकरणको फ्लाइट सेफ्टी विभागको निर्देशन अनुसार ती पाइलटलाई उडानमा रोक लगाइएको छ ।’ प्राधिकरण पोखराका प्रमुख भोलाप्रसाद गुरागाईंले उडानका क्रममा यात्रु र आफ्नो समेत सुरक्षामा पाइलटले ध्यान दिनुपर्नेमा लापरबाही गरेको देखिएको बताए । ‘यो ठूलो गल्ती हो,’ उनले भने, ‘के–कस्तो कारबाही हुन्छ भन्ने छानबिनपछि निर्णय हुन्छ ।’

पाइलटहरूले भने वास्तविकता नबुझी टिकटकको भिडियोलाई प्रमाण मानेर उडानमा रोक लगाइएको भन्दै दुखेसो पोखेका छन् । केही पाइलटले गरेका त्यस्ता कार्यलाई छानबिनको दायरामा ल्याइए पनि सबैलाई एउटै डालोमा मुछ्न नहुने उनीहरूको भनाइ छ । कुशल प्याराग्लाइडिङ पाइलटले सावधानीपूर्वक ‘एक्रोब्याटिक्स’ गर्नु खेल–कौशल रहेको एक पाइलटले बताए । ‘विदेशमा पनि फूल टिप्ने, पानी छुने, बिजुलीका पोलको नजिकबाट उड्ने चलनलाई वागा फ्लाई भनिन्छ, जुन हाम्रो देशमा अभ्यासमा छैन, नियम पनि छैन,’ उनले भने, ‘प्राधिकरणले यसबारे नियम बनाओस्, हामी सहयोग गर्न तयार छौं ।’

क्यानले खेलाडीको इतिहास अध्ययन नै नगरी उडानमा रोक लगाएको प्रतिबन्धमा परेका पाइलट एलिस थापाले बताए । उनी अन्तर्राष्ट्रियस्तरका प्यारा ट्रेनर हुन् । ‘नेपालमा उडानका बेला के गर्ने र के नगर्ने भन्ने मापदण्ड छैन,’ उनले भने, ‘पानी छुने, फूल टिप्नेजस्ता गतिविधि दक्ष पाइलटका बीच मात्रै हुन्छ । यो फन फ्लाइटको अब नियम बन्नुपर्छ ।’

प्रकाशित : मंसिर २६, २०७७ १०:४८
पूरा पढ्नुहोस्
प्रतिक्रिया
पठाउनुहोस्
×