सरकार कमजोर अवस्थामा छैन : मुख्यमन्त्री पौडेल

‘संघ र प्रदेशमा करिब दुई तिहाईको हाराहारी जनमतसहितको नेकपाको सरकार गठन भएको छ । यस्तो अवस्थामा सरकार कमजोर छ । छिट्टै ढल्छ भनेर देशमा अस्थिरता सिर्जना गर्न खोजिएको छ । तर, त्यो गलत हो’, मुख्यमन्त्री पौडेलले भने ।

उनले तीन तहको सरकारबीच समन्वयको अभावका कारण सोचे अनुसारको कामले गति नलिएको बताए । ‘तीन तहको सरकार तीनतिर फर्किएको छ । जसले गर्दा काम गर्न समस्या भइरहेको छ ।’, पौडेलले तीनै तहको सरकारबीच समन्वय नभएसम्म जनअपेक्षा अनुसार विकासे काममा फड्को मार्न नसक्ने बताए ।

कार्यक्रममा कांग्रेस वाग्मती प्रदेश संसदीय दलका नेता इन्द्रबहादुर बानियाँले राज्यको तीनै तहले अहिले जनताको अपेक्षाअनुसार काम गर्न नसकेका कारण संघीयताबारे जनतामा वितृष्णा पैदा हुन थालेको दाबी गरे । ‘राज्यको तीनै तहले जनताको पक्षमा काम गर्नु अहिलेको आवश्यकता हो । त्यसैले समयमै सुध्रिन जरुरी रहेको छ’, उनले भने ।

बानियाँले जनताको छोराछोरी राष्ट्रपति, प्रधानमन्त्री बन्ने व्यवस्था राजनैतिक दल र जनताले नै लडेर ल्याएको बताउँदै यसको संरक्षण गर्नु पनि दल र जनताको दायित्व रहेको बताए ।