सीमा खोल्न जसपाको अपिल

ठाकुर र यादवद्वय जारी गरेको संयुक्त विज्ञप्तिमा लामो समयदेखि सीमा नाका बन्द हुँदा तराई–मधेसका जनताको जीवन कष्टकर बनेको उल्लेख गरिएको छ । ‘लम्बिएको सिमानाका बन्दले मुलुकको अर्थतन्त्रलाई धराशायी त बनाएकै छ । सीमा क्षेत्रको बासिन्दा जनजिवन समेत कष्टकर बनेको छ,’ विज्ञप्तिमा भनिएको छ ।

सीमा बन्दले तराई–मधेसका जनताको कृषि, शिक्षा, स्वास्थ्य उपचार, रोजगार, आर्थिक, समाजिक क्षेत्रमा गम्भीर समस्या देखिएको ठाकुर र यादवले विज्ञप्तिमा उल्लेख गरेका छन् । ‘जनताको जीवन थप कष्टकर हुन नदिन सरकारले भारतसँग जोडिएको सीमा नाकालाई तत्काल खुल्ला गर्नुपर्छ,’ विज्ञप्तिमा भनिएको छ ।

जसपाका अध्यक्षद्वयले सिमानाका बन्द गरिएपनि कोरोना भाइरस संक्रमण रोक्न सरकारको पूर्व तयारी निकै कमजोर रहेको आरोप समेत लगाएका छन् । उनीहरुलें कोरोना संक्रमणलाई अझ फैलिन नदिन योजनावद्ध रुपमा प्रभाकारी ढंगले चिकित्सक तथा स्वास्थ्यकर्मीको जोखिम भत्ताको उपलब्धता, अस्पताल, स्वास्थ्य उपकरण, जनशक्ति र औषधिको उचित र आवश्यक व्यवस्थापन मिलाउन पनि सरकारसंग माग गरेको छ ।