चितवन घटनाले नेकपामा नयाँ विवाद- समाचार - कान्तिपुर समाचार
कान्तिपुर वेबसाईट
AdvertisementAdvertisement

चितवन घटनाले नेकपामा नयाँ विवाद

कान्तिपुर संवाददाता

काठमाडौँ — स्थायी कमिटी सदस्य सुरेन्द्र पाण्डेमाथि चितवनमा आफ्नै पार्टीका कार्यकर्ताले दुर्व्यवहार गरेपछि त्यसले नेकपाको केन्द्रीय राजनीति तरंगित भएको छ । घटनाको भर्त्सना गर्दै पार्टीका वरिष्ठ नेताहरुले छानबिन र दोषीमाथि कारबाहीको माग गरेका छन् । 

पार्टीभित्र विवाद उत्कर्षमा पुगेका बेला शनिबार चितवनमा भएको घटनाले नेकपाभित्र थप चर्को ध्रुविकरणको खतरा बढाएको छ । मंसिर १३ मा सचिवालय बैठक बस्ने र त्यहाँ दुवै अध्यक्षका एक अर्कामाथि आरोपपूर्ण प्रस्तावमाथि छलफल हुने तयारी भइरहेका बेला चितवनमा वरिष्ठ नेता माधवकुमार नेपाल निकट मानिने नेतामाथि प्रधानमन्त्री एवं पार्टी अध्यक्ष केपी शर्मा ओलीपक्षका कार्यकर्ताले दुर्व्यवहार गरेपछि विवाद र ध्रुविकरणको खतरा बढाएको हो । नेकपाको पछिल्लो विवादमा ओली र दाहाल-नेपाल समूह विभाजित छ ।

ओलीपक्षका कार्यकर्ताले पाण्डे सहभागी कार्यक्रममा हुलदंगा र नाराबाजी गरेपछि शनिबार साँझ भिन्दाभिन्दै विज्ञप्ति प्रकाशित गर्दै वरिष्ठ नेता माधवकुमार नेपाल, झलनाथ खनाल र पार्टी प्रवक्ता नारायणकाजी श्रेष्ठले घटनाको निन्दा गरेका छन् ।

वरिष्ठ नेता खनालले चितवनमा नेता पाण्डेमाथि सुनियोजित रुपमा दुर्व्यवहार गरिएको भन्दै सम्लग्न व्यक्तिलाई कडाभन्दा कडा कारबाहीको माग गरेका छन् । नेता खनालले पार्टीको आन्तरिक विवाद उत्कर्षमा पुगेको र त्यसको समधानका लागि उपाय खोजी भइरहेका बेला यस्ता घटनाले स्थितिलाई झनै उत्तेजक बनाउने भन्दै सचेत रहन नेता-कार्यकर्तालाई आग्रह पनि गरेका छन् ।

‘कार्यक्रममा आफ्ना भनाइहरु राखिरहेको अवस्थामा अनाधिकृत रूपमा प्रवेश गरेका केही अराजक व्यक्तिहरूले गरेको अभद्र व्यवहार तथा नाराबाजी अत्यन्तै निन्दनीय छ। यस्तो गैरजिम्मेवारपूर्ण घटनाको घोर निन्दा तथा भर्त्सना गर्दछु’, खनालको विज्ञप्तिमा छ, ‘कम्युनिस्ट पार्टीको नैतिक मूल्य, आचरण तथा आदर्शविपरीत यस्तो आपत्तिजनक कार्यमा संलग्न व्यक्तिलाई तत्काल कडाभन्दा कडा कारबाही गर्न सम्बन्धित पार्टी कमिटीको ध्यानाकर्षण समेत गराउँछु।’

खनालले भन्दा अगाडि वरिष्ठ नेता नेपालले भर्त्सना गरेका थिए । नेता नेपालले विज्ञप्तिमा भनेका छन्, ‘सुरेन्द्र पाण्डे राप्ती नगर पार्टीको बैठकमा सहभागी भई मन्तव्य राखिरहेको बेला अनाधिकृत रूपमा प्रवेश गरेका केही ब्यक्तिहरूले सुनियोजित रूपमा गरेको अभद्र व्यवहार तथा नाराबाजीको निन्दा एवम् भर्त्सना गर्दछु । सभ्य, सुसंस्कृत एवम् समुन्नत समाज निर्माण गर्ने उद्देश्य बोकेको कम्युनिष्ट आदर्श अवलम्बन गर्ने लोकतान्त्रिक कम्युनिष्ट पार्टीका लागि पटक्कै नसुहाउने उक्त कार्य गर्ने र गराउने जोसुकै भए पनि छानबिन गरी कडाभन्दा कडा कारबाही गर्न स्थानीय पार्टी एवम् सम्बन्धित सबैको गंभीर ध्यानाकर्षण गराउँछु ।’

पार्टी प्रवक्ता श्रेष्ठको भनाइ छ, ‘आज चितवन जिल्लाको राप्ति नगरपालिकाको पार्टी कार्यक्रममा स्थायी कमिटीका सदस्य एवं सांसद सुरेन्द्र पाण्डेमाथि भएको सुनियोजित दुर्ब्यबहारको घटना अति निन्दनीय एवं भर्त्सनायोग्य छ । यसप्रकारको ब्यवहारलाई प्रोत्साहित गरेर कम्युनिष्ट आन्दोलनको मात्र होइन, कसैको पनि हित गर्दैन । चेत होस् ।’

त्यसैबीच पर्यटनमन्त्री समेत रहेका स्थायी कमिटी सदस्य योगेश भट्टराईले भनेका छन्, ‘हुलहुज्जत बहुदलीय जनबादको कोर्श होइन । बिमर्श, छलफल र फरकमतको सम्मान जबजको विशेषता हो ।’

स्थायी कमिटीका अर्का सदस्य मात्रिका यादवको भनाइ छ, ‘सहयोद्धा कमरेड सुरेन्द्र पाण्डे आज राप्ती नगर पार्टीको बैठकमा सहभागी भई मन्तव्य राखिरहेको बेला अनाधिकृत रूपमा प्रवेश गरेका केही ब्यक्तिहरूले सुनियोजित रूपमा गरेको अभद्र ब्यवहार तथा नाराबाजीको निन्दा एवम् भर्त्सना र सस्ता सुनियोजित ग़ैर राजनीतिक क्रियाकलापविरुद्ध एकजुट हुन सबैमा अनुरोध गर्दछु ।’

केन्द्रीय सदस्य ठाकुर गैरेको प्रतिक्रिया छ, ‘नेकपा नेता माननीय सुरेन्द्र पाण्डेप्रति चितवनमा दुर्ब्यवहार भएको छ । यस्तो कार्यलाई प्रोत्साहन नगरौं। कतै दोहोरिन नदिउँ । पार्टी एकता कायम राख्न आ-आफ्नो ठाउँबाट सक्दो योगदान गरौ‌ । बहसलाई मर्यादित बनाउँ ।’

केन्द्रीय सदस्य रामकुमारी झाँक्री लेख्छिन्, ‘चितवनमा सांसद कमरेड सुरेन्द्र पाण्डे सहभागी कार्यक्रममा जे भयो यो धेरै दुखद् घटना हो । केही दिन पहिले पर्सामा भएको घटना फौज्दारी केसमात्र थिएन पार्टी अनुशासनको गम्भीर उल्लंघन थियो, वैचारिक विचलन थियो। त्यसलाई पार्टीभित्र एजेन्डा बनाउन नसक्नु नेतृत्वको गम्भीर भूल थियो । अब हामी कुन बाटो जाँदैछौं ? यो बास्तवमै गम्भीर संकट हो । अब यस्तो निन्दनीय कार्यको श्रृंखला यही अन्तिम हुनुपर्छ। पार्टी नेतृत्वले तुरून्त रोकोस् । नेतृत्व सचेत होस् ।’

शनिबार बिहान चितवनको राप्ती नगरपालिकाको नगर कमिटीको बैठक तथा प्रशिक्षण कार्यक्रममा सहभागी नेता पाण्डे बोल्ने क्रममा ओली निकट युवा तथा विद्यार्थी नेताहरुले नाराबाजी गरेका थिए । घटनालाई लिएर ओलीपक्षका नेताहरुको भने प्रतिक्रिया आएको छैन ।

प्रकाशित : मंसिर ६, २०७७ २१:०८
प्रतिक्रिया
पठाउनुहोस्

‘जबज’ को ब्यानरमा एकेडेमीको कार्यक्रम

कलेन्द्र सेजुवाल

सुर्खेत — नेकपाभित्र राजनीतिक कार्यदिशाको समेत विवाद चर्कंदै गएका बेला शनिबार सुर्खेतमा ‘जनताको बहुदलीय जनवाद’ (जबज) लेखिएको ब्यानरमा कार्यक्रम सम्पन्न भएको छ । मदन भण्डारी स्पोर्टस् एकेडेमीले राष्ट्रिय खेलकुद परिषद्का सदस्य सचिव रमेश सिलवालको प्रमुख आतिथ्यमा प्रदेशस्तरीय भेला आयोजना गरेको हो ।

नेकपाभित्रको पछिल्लो कलहमा राजनीतिक कार्यदिशाको विवाद पनि सतहमा आएको छ । कार्यकारी अध्यक्ष पुष्पकमल दाहालले सचिवालय बैठकमा पेस गरेको राजनीतिक प्रतिवेदनमै पार्टी एकताका बेला तत्कालीन एमालेको ‘जनताको बहुदलीय जनवाद’ र तत्कालीन माओवादीको ‘२१ औं शताब्दीको जनवाद’ लाई थाती राख्दै ‘जनताको जनवाद’ लाई राजनीतिक कार्यदिशा तय गरिएको भए पनि अर्का अध्यक्ष केपी शर्मा ओलीले ‘जबज’ लाई प्रश्रय हुने गरी गुटगत भेला गरेको आरोप लगाएका थिए ।

यस्तोमा पूर्वएमाले समर्थकहरू आबद्ध एकेडेमीले भने ब्यानरमै ‘जनताको बहुदलीय जनवाद’ लेखेर भेला आयोजना गरेको हो । एकेडेमीका कर्णाली प्रदेश अध्यक्ष तेजविक्रम बस्नेतले एकेडेमी पार्टीको भ्रातृ संगठन नभएकाले जनताको बहुदलीय जनवादलाई प्रवद्र्धन गर्न कुनै समस्या नरहेको बताए । ‘पार्टीले जुनसुकै राजनीतिक कार्यदिशा अवलम्बन गरे पनि हाम्रो (एकेडेमीको) मूल नारा जनताको बहुदलीय जनवाद हो,’ उनले भने, ‘त्यसैले ब्यानरमै यसलाई उल्लेख गरेर कार्यक्रम आयोजना गरिएको हो ।’

आयोजकले ‘जनताको बहुदलीय जनवाद कार्यक्रम भव्य रूपमा सफल पारौं’, ‘मदन भण्डारीको विचार र सिद्धान्तलाई माया गर्ने सम्पूर्ण कम्युनिस्ट एकजुट होऔं’, ‘जनताको बुहदलीय जनवाद जिन्दावाद’ जस्ता नारासहित कार्यक्रमको प्रचार गरेका थिए । अध्यक्ष बस्नेतले राष्ट्रिय खेलकुद परिषद्ले १० औं राष्ट्रिय खेलकुद प्रतियोगिता कर्णाली प्रदेशमा आयोजना गर्न लागेको सन्दर्भमा उक्त प्रतियोगितामा एकेडेमीका तर्फबाट हुने योगदानबारे छलफल गर्न कार्यक्रम राखिएको बताए । उनका अनुसार सदस्य सचिव सिलवालको टोलीले आइतबार प्रदेशका मुख्यमन्त्रीसहित मन्त्रीलाई भेट्दै छन् ।


प्रकाशित : मंसिर ६, २०७७ २०:५३
पूरा पढ्नुहोस्
प्रतिक्रिया
पठाउनुहोस्
×