राष्ट्रपतिले प्रधानमन्त्रीलाई लगाइदिइन् दसैंको टीका - समाचार - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रपतिले प्रधानमन्त्रीलाई लगाइदिइन् दसैंको टीका 

कान्तिपुर संवाददाता

काठमाडौँ — राष्ट्रपति विद्यादेवी भण्डारीले प्रधानमन्त्री केपी शर्मा ओलीलाई दसैंको टीका लगाइदिएकी छन् । श्रीमती राधिका शाक्यसहित प्रधानमन्त्री ओली राष्ट्रपतिबाट दसैंको टीका ग्रहण गर्न शितल निवास पुगेका थिए । 

दसैंको अवसरमा सोमबार राष्ट्रपति भण्डारीले प्रधानमन्त्रीलाई दसैंको टीका लगाइदिएकी हुन् । प्रधानमन्त्री ओलीले श्रीमती शाक्यलाई पनि टीका लगाइदिएका थिए ।

प्रधानमन्त्रीका प्रेस सल्लाहकार सूर्य थापाले पारिवारिक रूपमा मात्रै दसैं मनाउन दसैंको विशेष सम्बोधनमा आग्रह गरेअनुसार नै प्रधानमन्त्रीले दसैं मनाएको बताए ।

कोरोना भाइरसको संक्रमण बढिरहेको र यसको रोकथामको लागि भीडभाड नगर्नुपर्ने भएकाले प्रधानमन्त्रीले यसपटक सर्वसाधारणलाई टीका लगाउने कार्यक्रम यसअघि नै नराखिएको थापाको भनाइ छ ।

राष्ट्रपति भण्डारीले भने आमा मिथिला पाण्डेका हातबाट टीका ग्रहण गरेकी थिइन् । राष्ट्रपति कार्यालयमा नै १० बजेर १९ मिनेटको साइतमा भण्डारीले आमा पाण्डेको हातबाट टीका र जमरा ग्रहण गरेकी राष्ट्रपतिका स्वकीय सहसचिव शिव भट्टराईले जानकारी दिए ।

राष्ट्रपति भण्डारीले छोरीज्वाइँहरू उषाकिरण, निशाकुसुम, उमेश थापा र अभिषेक यादव तथा दुई नातिनीलगायतलाई टीका लगाइदिएकी थिइन् ।


प्रकाशित : कार्तिक १०, २०७७ १७:२५
प्रतिक्रिया
पठाउनुहोस्

चितवन मेडिकल कलेजमा दुई कोरोना संक्रमितको मृत्यु

रमेशकुमार पौडेल

चितवन — चितवन मेडिकल कलेजको भरतपुरमा रहेको शिक्षण अस्पतालमा उपचार गराइरहेका दुई जना कोरोना संक्रमितको सोमबार मृत्यु भएको छ । योसँगै कोरोना भाइरसको संक्रमण पुष्टि भएका चितवनका ५१ जनाको मृत्यु भएको छ ।

चितवन मेडिकल कलेजका निर्देशक प्रा.डा. दयाराम लम्सालले जारी गरेको विज्ञप्ती अनुसार भरतपुर महानगरपालिका–१० की ६७ वर्षीया महिलाको सोमबार दिउँसो पौने दुई बजे मृत्यु भएको छ । उनी कात्तिक ५ गते उक्त अस्पताल आएकी थिइन् । मृगौलाको दिर्घ रोगीसमेत रहेकी उनी श्वासप्रश्वास र उच्च ज्वरोको समस्या लिएर अस्पताल आएकी थिइन् । कात्तिक ६ गते उनमा संक्रमण पुष्टि भएको थियो ।

अवस्था जटिल हुँदै गएपछि उनलाई अस्पतालले आईसीयूमा भेन्टिलेटरमा राखेर उपचार गरेको थियो । यसअघि भरतपुर महानगरपालिकाका–१ का ७७ वर्षका पुरुषको आइतबार मध्यरातपछि मृत्यु भएको अस्प्तालले जनाएको छ । कात्तिक २ गते संक्रमण पुष्टि भए पनि उनी होम आइसोलेसनमा बस्दै आएका थिए । समस्या बढ्दै गएपछि कात्तिक ८ गते अस्पताल आएका थिए । उनको आईसीयूमा भेन्टिलेटरमा राखेर उपचार भएको थियो ।

चितवन स्वास्थ्य कार्यालयले दिएको विवरण अनुसार चितवनमा सोमबार दिउँसोसम्म कुल संक्रमितको संख्या ३ हजार ९ सय ४७ पुगेको छ । तीमध्ये २ हजार १ सय ४४ मात्र निको भएका छन् । निको हुन बाँकी एक हजार ७ सय ५२ छन् । निको हुन बाँकीमध्ये १ हजार ३ सय ४५ जना होम आइसोलेसनमा छन् ।

प्रकाशित : कार्तिक १०, २०७७ १७:०८
पूरा पढ्नुहोस्
प्रतिक्रिया
पठाउनुहोस्
×