डा. केसीको उपचार गर्ने वातावरण बनाउन चिकित्सकको सुझाव- समाचार - कान्तिपुर समाचार
कान्तिपुर वेबसाईट
AdvertisementAdvertisement

डा. केसीको उपचार गर्ने वातावरण बनाउन चिकित्सकको सुझाव

एलपी देवकोटा

जुम्ला — कर्णाली स्वास्थ्य विज्ञान प्रतिष्ठान शिक्षण अस्पतालको आईसीयू कक्षमा अनशनरत डा. गोविन्द केसीको स्वास्थ्य अवस्था बिग्रँदै गएको चिकित्सकले बताएका छन् । उनलाई तत्काल सहज उपचारको वातावरण बनाउनुपर्ने उनीहरूको सुझाव छ । 

प्रतिष्ठानको चिकित्सक टोलीले बुलेटिन जारी गरी केसीको स्वास्थ्य गम्भीर बन्दै गएको र उनले कुनै पनि जाँच गराउन अस्वीकार गरिरहेकाले उपचारका लागि सहज हुने स्थानमा लैजान राम्रो हुने सुझाव दिएको हो ।

चिकित्साशिक्षा सुधार र कर्णाली स्वास्थ्य विज्ञान प्रतिष्ठानमा एमबीबीएसलगायत कार्यक्रम तत्काल सञ्चालन गरिनुपर्ने माग राखी चन्दननाथ–६ रानीचौरस्थित बाबिरामष्टको मन्दिरमा अनशन बसेका केसीलाई शनिबार राति प्रहरीले जबर्जस्ती अस्पताल पुर्‍याएको थियो । माग सम्बोधन गर्नुको साटो अपहरण शैलीमा अस्पताल ल्याइएको भन्दै उनले अनशनको आठौं दिन पनि कुनै उपचार लिन मानेका छैनन् ।

शनिबारसम्म दिनको तीनपटक स्वास्थ्य जाँच गरिरहेकोमा अस्पताल ल्याएपछि उनले कुनै पनि जाँच गराउन नमानेको प्रतिष्ठानका डा. प्रवीण गिरीले बताए । ‘प्रेसर, मुटुको गति, शरीरको तापक्रम, अक्सिजनको मात्रा, पिसाबको मात्रालगायत कुनै पनि जाँच गर्न सकिएको छैन,’ उनले भने, ‘रगतमा चिनीको मात्रा अति न्यून भई प्रमुख अंगहरूमा जटिल समस्या देखिन सक्ने अवस्था छ । रोग प्रतिरोधात्मक क्षमता कम हुँदा संक्रमणको खतरा पनि बढेर गएको छ ।’ त्यसैले यथाशीघ्र उपचारका लागि सहज हुने स्थानमा लैजानुपर्ने उनले बताए ।

प्रतिष्ठानले डा. केसीको उपचारमा गिरीसहित डा. धीरज गुरुङ, डा. अनुपमंगल समाल र सविना थापालाई खटाएको छ ।

प्रकाशित : आश्विन ५, २०७७ १३:४४
प्रतिक्रिया
पठाउनुहोस्

कीर्तिमानी आरोही शेर्पाको निधनमा प्रधानमन्त्री ओलीद्वारा दु:ख व्यक्त

कान्तिपुर संवाददाता

काठमाडौँ — कीर्तिमानी आरोही आङरिता शेर्पाको निधनमा प्रधानमन्त्री केपी शर्मा ओलीले दु:ख व्यक्त गरेका छन् । प्रधानमन्त्री ओलीले बिनाअक्सिजन १० पटक सगरमाथा आरोहण गरी विश्व कीर्तिमान राखेका शेर्पाको निधनले आफूलाई अत्यन्त दु:खित तुल्याएको बताएका छन् ।

प्रधानमन्त्रीले ट्विटरमार्फत दिवंगत आरोही शेर्पालाई श्रद्धाञ्जली व्यक्त गर्दै लेखेका छन्, ' बिनाअक्सिजन १० पटक सगरमाथा आरोहण गरी विश्व कीर्तिमान कायम गर्नु भएका आङरिता शेर्पाको निधनले अत्यन्त दु:खित तुल्याएको छ। यस दुःखद् घडीमा उहाँप्रति हार्दिक श्रद्धासुमन अर्पण गर्दै शोकसन्तप्त परिवार र शुभेच्छुकहरुप्रति गहिरो समवेदना व्यक्त गर्दछु । उहाँको कीर्तिमानी सदास्मरणीय रहने छ।'

हिउँचितुवाका नामले परिचित आरोही आङरिता शेर्पाको सोमबार बिहान काठमाडौंको जोरपाटीस्थित आफ्नै निवासमा निधन भएको हो ।

सम्बन्धित समाचार

प्रकाशित : आश्विन ५, २०७७ १३:३९
पूरा पढ्नुहोस्
प्रतिक्रिया
पठाउनुहोस्
×