प्रहरी हिरासतमा भएका मृत्युबारे अध्ययन गर्न संसदीय उपसमिति गठन- समाचार - कान्तिपुर समाचार

प्रहरी हिरासतमा भएका मृत्युबारे अध्ययन गर्न संसदीय उपसमिति गठन

जयसिंह महरा

काठमाडौँ — पछिल्लो समय मुलुकका विभिन्‍न जिल्लामा प्रहरी हिरासत भएकामा व्यक्तिहरूको मृत्युबारे अध्ययन तथा छानबिन गर्न प्रतिनिधिसभाको कानुन न्याय तथा मानवअधिकार समितिले उपसमिति गठन गरेको छ । 

समितिको बिहीबार सिंहदरबारमा बसेको बैठकले देशका विभिन्न प्रहरी कस्टडीमा भएको मृत्युको विषयमा हत्या वा कसरी गैरन्यायिक हत्या भयो भन्‍ने सम्बन्धमा अध्ययनका लागि समिति बनाउने निर्णय गरेको हो ।

समिति सभापति कृष्णभक्त पोखरेलले बिहीबार ५ सदस्यीय उपसमिति गठन गरिएको जानकारी दिए । उनका अनुसार समितिमा रहने सांसदहरूको नाम दलका प्रमुख सचेतकहरूसँग सल्लाह गरेर तोकिने छ ।

सभापति पोखरेलले भने, 'प्रहरी हिरासतमा कसरी गैरन्यायिक हत्या भयो भन्ने सम्बन्धमा यथार्थ छानबिन गर्न ५ सदस्यीय समिति बनाउने र कार्यक्षेत्र अनुसार रौतहट लगायत जिल्लामा समिति पठाउने निर्णय भएको छ ।' समितिमा अध्ययन रिपोर्ट छिटोभन्दा छिटो बुझाउने गरी उपसमितिलाई कार्यादेश तोकिएको उनले बताए ।

यस्तै बैठकले मानव अधिकार संरक्षण र संवर्द्धनका लागि संविधानले नै परिकल्पना गरेका महिला आयोग, समावेशी आयोग, दलित आयोग लगायतलाई यथाशीघ्र पूर्णता दिन सरकारको ध्यानाकर्षण गराउने निर्णय गरेको छ ।

प्रकाशित : आश्विन १, २०७७ १६:१५
प्रतिक्रिया
पठाउनुहोस्

टोलटोलमा ‘मिस्डकल’ अभियान

ज्योति कटुवाल

दैलेख — कोरोना महामारी र लकडाउनका कारण विद्यालयको पठनपाठन अवरुद्ध भएपछि दुल्लु नगरपालिकाले टोलटोलमा ‘मिस्डकल’ अभियान सुरु गरेको छ । विद्यार्थीको शैक्षिक गुणस्तर बढाउन ५८ विद्यालयमा ३ महिनादेखि ‘मिस्डकल’ अभियान सञ्चालन भइरहेको हो ।

‘विद्यार्थीले आफूले पढ्न चाहेको बेला शिक्षकलाई मिस्डकल गरे पुग्छ,’ दुल्लु नगरप्रमुख घनश्याम भण्डारीले भने, ‘मिस्डकल आएपछि शिक्षकले कल ब्याक गरी विद्यार्थीको जिज्ञासा समाधान गरिदिन्छन् ।’ मिस्डकलसँगै केही विद्यालयले टोल शिक्षा पनि सञ्चालन गरिरहेको उनले बताए । उनका अनुसार अभियान सञ्चालन गरेपछि अभिभावकलेसमेत बालबालिकाको पढाइबारे चासो राख्न थालेका छन् ।

केही ठाउँमा टोल शिक्षा सञ्चालन गरी विद्यार्थीमा पढ्ने बानीको विकास गराएको नगरपालिकाले जनाएको छ । कतिपय ठाउँमा फोन नलाग्ने समस्या देखिएपछि विद्यार्थीको मागअनुसार टोल शिक्षा सञ्चालन गरिएको प्रमुख प्रशासकीय अधिकृत ज्ञानमणि नेपालले बताए । उनका अनुसार असोज १ गतेबाट एक दिनमा एउटा कक्षा सञ्चालन गर्ने गरी विद्यालय खोल्ने तयारी थालिएको छ । ‘संक्रमणको क्रम रोकिए असोज १ देखि आधारभूत विद्यालयमा सामाजिक दूरी कायम गरी पठनपाठन सुरु गर्छौं,’ उनले भने, ‘कोरोनाको त्रास नहट्दासम्म माथिल्ला कक्षाका विद्यार्थीका लागि खेतबारी, छहारी, जंगललगायतमा प्रयोगात्मक कक्षा सञ्चालन गर्ने हाम्रो तयारी छ ।’

गुराँस गाउँपालिकाले पनि विद्यार्थीमा पठनपाठनको रुचि जगाइराख्न स्वअध्यन सामग्री वितरण गरेको छ । विद्यार्थीका घरघरमा पुगी शिक्षण सामग्री हस्तान्तरण गरिएको गाउँपालिका अध्यक्ष खेमराज ओलीले बताए । ‘विद्यार्थीले घरमा अध्ययन गरेका छन् या छैनन् भन्नेबारे बुझ्न शिक्षकहरुलाई घरघरमा खटाइएको छ,’ उनले भने, ‘अनुगमनमा गएका शिक्षकले विद्यार्थीका जिज्ञासाको समाधानसमेत गर्ने व्यवस्था मिलाइएको छ ।’ उनका अनुसार गाउँपालिकाले १४ स्थानमा टोल शिक्षा पनि सञ्चालन गरिरहेको छ ।

चामुण्डाबिन्द्रसैनी नगरपालिकाले पनि टोल शिक्षा सञ्चालन गर्न ६ वटा टोलमा २/२ जना शिक्षक खटाएको छ । जंगले, पल्लो जंगले, हाडाकोट, देउराली र चामुण्डा माविका शिक्षकलाई टोलटोलमा पठाइएको प्रम्ुख प्रशासकीय अधिकृत तिलक विकले बताए । उनका अनुसार कक्षा १ देखि ५ र ६ देखि १० कक्षासम्मका विद्यार्थीलाई २ समूहमा विभाजन गरी पठनपाठन भइरहेको हो । रेडियो, टेलिभिजन र अनलाइन माध्यम प्रयोग गरी वैकल्पिक शिक्षा सञ्चालन गरिरहेको नारायण नगरपालिकाका शिक्षा शाखा प्रमुख हिमालयजंग शाहले बताए ।

प्रकाशित : आश्विन १, २०७७ १६:११
पूरा पढ्नुहोस्
प्रतिक्रिया
पठाउनुहोस्
×