असोज ४ गतेदेखि उपत्यकाका तीनवटै प्रशासनले नियमित सेवा सुरु गर्ने- समाचार - कान्तिपुर समाचार

असोज ४ गतेदेखि उपत्यकाका तीनवटै प्रशासनले नियमित सेवा सुरु गर्ने

कान्तिपुर संवाददाता

काठमाडौँ — उपत्यकाका तीन वटै जिल्ला प्रशासन कार्यालयले असोज ४ गतेदेखि नियमित सेवा सुरु गर्ने भएका छन् । कोरोना महामारीको रोकथाम र नियन्त्रणका लागि भन्दै साउन २५ गतेदेखि स्थगित गरिएका नियमित सेवाहरु असोज ४ गतेदेखि सुरु गरिने भएको हो ।

स्वास्थ्य तथा जनसंख्या मन्त्रालयले निर्धारण गरेका मापदण्ड अपनाई अर्को व्यवस्था नभएसम्मका लागि प्रत्येक सेवामा दैनिक २० जनाभन्दा बढी सेवाग्राही नबढ्ने गरी व्यवस्था मिलाइएको प्रशासन कार्यालयहरुले सार्वजनिक गरेको सूचनामा उल्लेख छ ।

काठमाडौं, भक्तपुर र ललितपुरका प्रमुख जिल्ला अधिकारीहरुबीच भएको छलफलअनुसार तीनवटै प्रशासन कार्यालयले एउटै ढाँचामा सेवा दिने ललितपुरका प्रमुख जिल्ला अधिकारी नारायणप्रसाद भट्टले जानकारी दिए ।

प्रशासनले तोकेको बार मिलाएर मात्र कार्यालय आउन पनि सूचनामा सेवाग्राहीलाई आग्रह गरिएको छ । नागरिकता र नाबालक परिचय पत्र बनाउने हकमा सेवाग्राही र सनाखत गर्ने थप एक जना मात्र कार्यालय आउन पनि आग्रह गरिएको छ । सेवाग्राहीलाई अनिवार्य रुपमा स्वास्थ्यसम्बन्धी मापदण्ड पालना गर्न पनि प्रशासनले आग्रह गरेको छ ।

सेवाग्राहीले सेवा लिन आउँदा मास्क अनिवार्य रुपमा लगाउनुपर्ने र कार्यालय परिसरमा स्यानिटाइजर प्रयोग गर्न वा अनिवार्य रुपमा हात धोएर मात्र सेवा लिनुपर्ने पनि सूचनामा उल्लेख छ । मास्क नलागाई कार्यालय परिसरभित्र प्रवेश गरे संक्रामक रोग ऐन २०२० बमोजिम कारबाही गरिने पनि प्रशासनले निकालेको सूचनामा उल्लेख छ ।

जिल्ला प्रशासन कार्यालय काठमाडौंको सूचना हेर्नुहोस्

प्रकाशित : आश्विन १, २०७७ १४:१७
प्रतिक्रिया
पठाउनुहोस्

क्वारेन्टाइनमा पासो लगाएर झुन्डिएको अवस्थामा युवकको शव फेला

सन्जु पौडेल

तिलोत्तमा — रूपन्देहीको देवदह नगरपालिका–३ सेमरानास्थित आदिवासी जनजाति भवनको क्वारेन्टाइनमा बसेका एक युवकको पासो लगाएर झुन्डिएको अवस्थामा शव फेला परेको छ । देवदह–४ का ती युवक भदौ १७ गते भारतबाट आई क्वारेन्टाइनमा बस्दै आएका थिए ।

उनले बिहीबार बिहान साढे २ बजेतिर क्वारेन्टाइनको छतमा जाने सिँढीमा रहेको बिममा झुन्डिएर आत्महत्या गरेको नगरपालिकाको सीआईसीडी संयोजक मेघनाथ न्यौपानेले बताए । ती युवककी आमा बिरामी रहेको र आर्थिक स्थिति कमजोर भएकाले मानसिक तनाब भई आत्महत्या गरेको हुन सक्ने न्यौपानेको भनाइ छ । उनका अनुसार ती युवकले बुधबार राति छतमा जाने, पानीमा रुझ्ने, तल झर्न नमान्नेजस्ता क्रियाकलाप देखाएका थिए ।

इलाका प्रहरी कार्यालय बुटवलका डीएसपी प्रतीतसिंह राठौरले युवकको मृत्यु के–कति कारणले भएको हो भन्नेबारे अनुसन्धान भइरहेको बताए ।


प्रकाशित : आश्विन १, २०७७ १४:०१
पूरा पढ्नुहोस्
प्रतिक्रिया
पठाउनुहोस्
×