राष्ट्रिय सभामा गौतम कि खतिवडा ?, जुटेन ओली र दाहालबीच सहमति- समाचार - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रिय सभामा गौतम कि खतिवडा ?, जुटेन ओली र दाहालबीच सहमति

राष्ट्रिय सभाको मनोनीत सदस्य बन्ने इच्छा देखाएका गौतमलाई फकाउन बालुवाटारबाट बोलावट
बबिता शर्मा

काठमाडौँ — सरकारको सिफारिसमा राष्ट्रपतिले मनोनीत गर्ने राष्ट्रिय सभाको रिक्त एक सिटमा पार्टी उपाध्यक्ष वामदेव गौतमलाई सिफारिस गर्ने कि अर्थमन्त्री युवराज खतिवडालाई निरन्तरता दिने भन्ने टुंगो लगाउन बुधबार सत्तारुढ दलभित्र भएका कोसिस असफल भएका छन् । 

राष्ट्रिय सभामा पठाउने सदस्यको नामलाई लिएर नेकपाका शीर्ष नेताबीच बुधबार गृहकार्य भए पनि सहमति भने जुटेको छैन । बुधबार नेकपा अध्यक्षद्वय केपी शर्मा ओली र पुष्पकमल दाहालबीच सचिवालय बैठक र राष्ट्रिय सभा सदस्यमा कसलाई पठाउने भन्नेमा केन्द्रित रहेर छलफल भएको थियो । एक नेताका अनुसार छलफलमा ओलीले खतिवडालाई नै निरन्तरता दिनुपर्ने अडान दोहोर्‍याएका थिए । तर, अर्का अध्यक्ष दाहालले गौतमलाई राष्ट्रिय सभामा पठाउने पार्टी सचिवालय बैठकको पूर्ववत निर्णय लागू हुनुपर्ने बताएका थिए ।

यसअघि भदौ १२ मा भएको भेटमा प्रधानमन्त्री ओलीले खतिवडालाई निरन्तरता दिने विषयमा अध्यक्ष दाहालसँग कुराकानी गरेका थिए ।

नेकपा सचिवालयको बैठक बिहीबार बिहान ११ बजे प्रधानमन्त्रीको सरकारी निवास बालुवाटारमा बस्दै छ । त्यसअगाडि उपाध्यक्ष गौतम वा अर्थमन्त्री खतिवडा कसलाई राष्ट्रिय सभा सदस्यमा पठाउने भन्नेमा नेकपाभित्र मतभेद सुरु भएको छ ।

सांसद नभए पनि ६ महिना मन्त्री बन्न पाउने संवैधानिक व्यवस्थाअनुसार राष्ट्रिय सभा सदस्यको पदावधि सकिइसकेका खतिवडाले गत फागुनमा शपथ लिएका थिए ।

संघीय संसद् सदस्य नरहेका अर्थमन्त्री खतिवडाको म्याद भदौ २१ गते सकिँदै छ । उनलाई नै मन्त्रीमा निरन्तरता दिने हो भने सरकारले २० गतेअघि नै राष्ट्रिय सभा सदस्यमा सिफारिस गरेर राष्ट्रपतिले मनोनित गरिसक्नुपर्ने हुन्छ । त्यसैले यस विषयमा सरकारले तत्काल निर्णय लिनुपर्ने बाध्यता छ ।

प्रधानमन्त्री ओलीले एक टेलिभिजन अन्तवार्तामा गौतमलाई राष्ट्रिय सभामा लैजाने विषयको 'च्याप्टर क्लोज' भएको बताएको दुई दिनपछि गौतम आफैंले पार्टी निर्णय कार्यान्वय गर्न माग गरेर ओलीमाथि दबाब बनाएका छन् ।

गौतमले फागुन १४ को निर्णय कार्यान्वयन हुनुपर्ने अडान राखेका हुन् । गौतमलाई अध्यक्ष दाहाल, वरिष्ठ नेताद्वय झलनाथ खनाल र माधवकुमार नेपाल, प्रवक्ता नारायणकाजी श्रेष्ठ, महासचिव विष्णु पौडेलको साथ छ ।

गौतमलाई राष्ट्रिय सभा सदस्यमा मनोनित गर्ने पक्षमा उभिने सहमति यी नेताहरूबीच भइसकेको बताइएको छ । अध्यक्ष ओलीसहित सचिवालय सदस्य ईश्वर पोखरेल र रामबहादुर थापा भने खतिवडालाई निरन्तरता दिने पक्षमा छन् ।

बिहीबारको बैठक कार्यदल प्रतिवेदनबाट सुरु हुने

दुई अध्यक्षबीच बिहीबारको सचिवालय बैठकमा पार्टीभित्रको समस्या समाधान कार्यदलको प्रतिवेदनबाट छलफल थाल्ने सहमति भएको छ । त्यसबाहेक अन्य विषय बैठकको माहौल हेरेर अगाडि बढाउने समझदारी पनि भएको छ । पार्टीभित्रको विवाद समाधानका लागि महासचिव विष्णु पौडेल नेतृत्वको कार्यदलले बुझाएको प्रतिवेदनमा छलफल गर्ने एजेन्डा तय भएको हो ।

गौतमलाई फकाउन बालुवाटारबाट बोलावट

उपाध्यक्ष गौतमले अचानक राष्ट्रिय सभा सदस्य बन्ने चाहना व्यक्त गरेपछि ओली दबाबमा परेका छन् । गौतमले सार्वजनिक रूपमा नै आफू राष्ट्रिय सभामा जान तयार रहेको बताएपछि ओलीले फकाउने प्रयास थालेका छन् । उनले गौतमलाई बुधबार साँझ बालुवाटार बोलाएर छलफल गरेका छन् ।

गत शुक्रबारयता प्रधानमन्त्री ओली र गौतमबीच पटक-पटक संवाद भएका छन् । पछिल्लो समय प्रधानमन्त्री ओलीले डोल्पाबाट प्रतिनिधिसभाको चुनाव लड्न गौतमलाई प्रस्ताव गरेका थिए ।

गौतमले भदौ १५ मा प्रतिनिधिसभाको चुनाव सम्भव नभएको भन्दै आफूलाई राष्ट्रिय सभा र सरकारमा समेत लैजान ओलीसँग आग्रह गरेका छन् । गौतमको यस्तो अडानपछि अन्य कुनै आश्वासन दिएर फकाउने प्रयास भएको बालुवाटारले गरेको स्रोतले बतायो ।

फागुन १४ मा बसेको सचिवालयको बैठकले गौतमलाई राष्ट्रिय सभामा पठाउने औपचारिक निर्णय गरेको थियो । तर, बैठक सकिएको केही बेरपछि नै प्रधानमन्त्रीले उक्त निर्णय आफूले नमान्ने बताएका थिए ।

प्रकाशित : भाद्र १७, २०७७ २२:३५
प्रतिक्रिया
पठाउनुहोस्

भारतको हरियाणामा आठतले भवनबाट खसेर नेपाली चिकित्सकको मृत्यु

आत्महत्या हुन सक्ने प्रहरीको आशंका
साहले छोटो समयमै लिभर ट्रान्सप्लान्ट (कलेजो प्रत्यारोपण) का लागि कुशल चिकित्सकको परिचय बनाएका थिए ।
सुरेशराज न्यौपाने

नयाँदिल्ली — भारतको हरियाणास्थित मेदान्त अस्पतालमा कार्यरत ३९ वर्षीय नेपाली चिकित्सक सुजितकुमार साहको मंगलबार एउटा अपार्टमेन्टको आठौं तलाबाट खसेर मृत्यु भएको छ । विराटनगर निवासी डा. साह विगत चार वर्षदेखि मेदान्तमा लिभर ट्रान्सप्लान्ट युनिटमा कन्सल्ट्यान्टका रुपमा कार्यरत थिए ।

स्रोतका अनुसार डा. साह मंगलबार बिहान गुरुग्रामस्थित सेक्टर ४७ स्थित उनी बस्दै आएको अपार्टमेन्टको आठौं तल्लाको कौसीबाट खसेका थिए । गम्भीर घाइते उनलाई तत्कालै नजिकैको मेदान्त अस्पताल पुर्याइएको थियो । तर, चिकित्सकले मृत घोषित गरेका थिए । पारिवारिक स्रोतका अनुसार प्र्रहरीले प्रारम्भिक छानबिनमा मृत्युको कारण आत्महत्या बताएको छ । यद्यपि शवको पोस्टर्माटम हुन बाँकी रहेकाले प्रहरीले मृत्युको कारण निर्क्यौल गर्न भने बाँकी छ ।

डा. सुजित अर्पाटमेन्टमा एक्लै बस्दै आएका थिए । उनको पश्चिम बंगालकी एक चिकित्सकसँग नै विवाह भएको थियो । उनीहरुबाट एक ६ वर्षीय छोरी छन् । डा. सुजित सोमबार साँझसम्म पनि मेदान्त अस्पतालमा ड्युटीमा थिए । र, सहकर्मीहरुका अनुसार त्यसदिन पनि उनी अन्य दिनजस्तै सामान्य अवस्थामा थिए । तर, मंगलबार एकाएक साहको मृत्युको खबरले उनीहरु सबैलाई स्तब्ध बनाएको छ । मेदान्तमै डा. साहसँगै कार्यरत रहेका नेपाली चिकित्सक डा. सञ्जयकुमार यादवले घटनाबाट आफू स्तब्ध भएको बताए । ‘सुजित दाइसँग सोमबार दिनभर नै सँगै थियौं अरु दिन जस्तै रमाइलोसँग बितेको थियो, खै के भयो अचानक विश्वास नै गर्न कठिन भइरहेको छ,’ डा. यादवले भने ।

पारिवारिक स्रोतका अनुसार पछिल्लो समय साह र उनकी श्रीमतीबीच दम्पतीबीच राम्रो सम्बन्ध नभएको र श्रीमतीले छोडपत्रका लागि दबाब दिँदै आएकी थिइन् । त्यही दबाबले उनलाई आत्महत्या गर्ने परिस्थितिमा पुर्‍याएको आशंका साह परिवारले गरेको छ । मृतक साहको परिवारले पनि उनलाई आत्महत्या गर्न बाध्य पारिएको भन्दै छानबिनको माग गरेको छ ।

‘अघिल्लो दिनसम्म पनि सामान्य अवस्थामा ड्युटीमा खटिएको र सबै हिसाबले सामान्य अवस्थामा रहेको व्यक्तिले कसरी आफै आत्महत्या गर्न सक्छ त्यसैले ऊमाथि अन्तिम समयमा ठूलो दबाब परेको निश्चित छ,’ साहका बुबा नरेन्द्रप्रसाद साहले भने । बुबा साहका अनुसार सुजितमाथि श्रीमतीले डिभोर्सका लागि दबाब दिइरहेकी थिइन् । तर, सुजितले भने सानी छोरी पनि भएको हुँदा छोडपत्र गर्नका लागि अस्वीकार गरिरहेका थिए । तर, अन्तिम समयमा दबाब थेग्न नसकेर सुजितले आत्महत्या गर्न बाध्य भएको परिवारको दाबी गरेको छ । आत्महत्या गर्न बाध्य पारिएको भन्दै परिवारका तर्फबाट आत्महत्या दुरुत्साहनको मुद्दा दायर गर्ने तयारी गरिरहेको साहले कान्तिपुरलाई बताए ।

साह परिवारका कान्छा छोरा सुजितले पोखराको मणिपाल कलेजबाट एमबीबीएस गरेका थिए । पछि उनले भारतको चण्डीगढस्थित पीजीआईबाट मास्टर इन सर्जरी र पछि दिल्लीको एम्सबाट सर्जरीमा सुपर स्पेसलाइजेसन गरेका थिए । साहले छोटो समयमै लिभर ट्रान्सप्लान्ट (कलेजो प्रत्यारोपण) का लागि कुशल चिकित्सकको परिचय बनाएका थिए । र, उनलाई रोबोटिक लिभर ट्रान्सप्लान्टको विशेषज्ञका रुपमा चिनिन्थ्यो । सहकर्मीहरुबीच डा. साह निकै मिलनसार र सरल व्यक्तिका रुपमा परिचित थिए ।

‘चार वर्षसँगै काम गरियो तर, कहिल्यै पनि उहाँको अनुहार अध्याँरो देखिएन, सबैलाई माया गर्ने अति नै सरल हुनुहुन्थ्यो,’ डा. यादवले भने । बुबा नरेन्द्रप्रसादले पनि सुजितको मृत्यु आफ्नो परिवारका लागि मात्र नभएर पूरै देशका लागि ठूलो क्षति भएको बताए । ‘हाम्रो परिवारलाई पुगेको क्षतिको त कुरै भएन तर मुलुकले पनि एउटा कुशल चिकित्सक गुमाएको छ,’ नरेन्द्रप्रसादले कान्तिपुरसँग भने ।

प्रकाशित : भाद्र १७, २०७७ २२:२३
पूरा पढ्नुहोस्
प्रतिक्रिया
पठाउनुहोस्
×